MIKUCUWULOY 26
26
Ɓi a hirnga gilaway
1Gi dudok a zlir avu mbur gilawa ta,
kaɓa yam mapo buk buk mizlir ti hin pas ta malla vuŋ ti sifi ta na ya.
2Nisa vu migbiŋ ngatara kine na, anta ja mburo ta,
kaɓa mecẽecet ati mezlezleŋ ngi pilis makam makapal na ya.
3Lejeŋ, a caka da pilisi, yo lawaya, a sliɗam di zungu,
amma gandaya, a kiɗam di gilaway a duba.
4Ki mbiɗa mi da gilawa, ti mi ngi gilaw naŋ na ta,
vur ka masa tiri gilaw ka naŋ vuna ya.
5Mbiɗa mi da gilawa weˀe avu gilaw naŋ vuna,
vur naŋ masa pura vu naŋ kaɓa naŋ ti sinmijileŋ.
6Mbur maslin gilaw ti mingiɓi naŋ na,
kite a sli di i zlambar naŋ tehhe, yo a si di i moˀore ng'avu vu naŋ.
7Mbur jegwere, sara galaɓ galaɓa,
mikicuwulo, a balam gilawa kwana, naŋ kanah ya.
8Vula dudok da mbur gilawa,
naŋ kaɓa hingaˀa ɗugur avu ŋvehŋvehlu.
9Ɓi ti mikicuwul a balam mbur gilawa,
naŋ kaɓa mihaŋ ngi widis misi hadaw mbur miwi le maduduɓa.
10Mbur mavula slra ngi gi da mbur gilaw malla da mizli macohom ti cuh na,
naŋ kaɓa buy maga waˀa da mizli gar.
11Mbur gilawa, a mahiri ngi gilaw naŋ a muŋ,
kaɓa kiri muvunuh le, masliɓa vunuh naŋ a muŋ na ya.
12Mbur mapura vu naŋ ka naŋ ti sinmijileŋ na, keɗ keɗ na,
zuwen njaha hiri haɗa asi mbur gilawa, a funa le.
Kpak ngi mbur masafaya
13Mbur masafaya a ɓi: «Gwat miji vu ada a jiviɗe,
mobor ada a jiviɗ madiɗahaya!»
14Miviŋ a mbiɗi daˀ ar mizlir naŋ na,
masafaya kwana, a mbiɗi daˀ ar li hin naŋ kanah ya.
15Masafaya a ca haŋ ng'ar sikiɗe ɓula,
amma ci naŋ nga mi na, a giraŋ.
16Masafaya a pura vu naŋ, ka naŋ ti sinmijileŋ,
fineˀ mizli tarnaˀ misina gwatay.
Mikicuwul mekelemey
17Mbur macuh, maci ar tiri micaŋ ta na,
naŋ kaɓa mbur mawuɗ ji kiri avu slimiɗe.
18Mbur gilaw maɗuv vu da gwatay,
malih luvut, na zle magi gwat ngi kiɗa hirnga gar na,
19naŋ kaɓa mbur maga gilaw da cil naŋ,
a dirba nah, a ɓaŋ: «I gi di i dungur!»
20Da dum anta asi vu ta na, vu a mucu,
yo da gila ɓi da mbur anta na, tiri a kiɗ mi.
21Ivire, a bul vu muhuɗiɗi, yo musluŋvu, a tiɓi vu giw giw,
naŋ kanah ya, mbur mitiri na, a mbulo hiri ngi tiri.
22Mi ngi mbur maji ɓi da mizli, naŋ kaɓa gwat ngi zum mezle,
a ci sesẽŋ asi vu ngi mburo.
23Ɓiri bara, manja bi ti zay naŋ avra mupuyaka le da hohoy na,
a bam vu ati mi mihimaˀ waɗ mevel malambaˀa.
24Mbur migi mesene, a ɗum ar mingiɓi naŋ,
yo a hur mevele na, i ɓi ngi slir ceke.
25Da ko ara ɓi ɓi mezle tekeɗe kwana, ki pulaŋ vu ta,
asi a mbizi wuluk malambaˀhay le mbizeˀ mbizeˀ durmuku.
26A ɗumo gi mesene naŋ na ɗum,
moˀore naŋ na, a sa njik a mihiri mizli gar.
27Mbur mali vigiɗ na, a sa diɗ ng'ara tehhe,
mbur magidigil ɗugur na, ɗugur a sa njirslaŋ.
28Irne magi slir na, a hirsa mizli, naŋ maguzuvura taŋ vuna,
yo mi mideɗeke, a zizi vu.
Bible en Langue Guiziga © L’Alliance Biblique du Cameroun, 2011.