MIKUCUWULOY 2
2
Sinmijileŋ a jigina mbur avu gi malambaˀa
1Mangal ɗu, da ki ra tiɓa mingiɓi ɗu,
ɓi ya muɓuw di le ɗaˀ na, i zlili avu ka,
2da ki ra jika slimiɗ asi sinmijileŋ,
ki ra ka mevel ɗik asi ɓi ngi lesle,
3haˀaw, da ki ra cufuɗ jini avu ɓi ngi lesl,
ki ra cufuɗ sli wala ngi ɓi,
4da ki ra sipa hirdam hirdam kaɓa dala,
ki ra gudoho di kaɓa zlili a ruwuy na,
5naɓa kisa sla wala ngi zluwun ti Bumbulvuŋ,
kisa lum sin ngi Buymisemuŋ.
6Asi mavula sinmijileŋ i Bumbulvuŋ,
yo sin ati sli wala ngi ɓi, a boko ti balam naŋ.
7Mizli mikaslslahaya, Buymisemuŋ a ga ɓa gwat taŋ a gi kasl kasla,
naŋ kaɓa mbaray avu mbur miteŋteŋ ar gwat ngi gi naŋ.
8Buymisemuŋ a wi vu ti mbur masipa jiviɗ mikaslsla,
a jigina mizli miteŋteŋ naŋhay ar gwat ngi gi taŋ.
9Akẽh so na, kisa sla wala ngi ɓi mijeŋŋe, ɓi mizlir le ati ɓi mikaslsla:
i jiviɗ maru ti mbur ng'ar wuya.
10Kanah na, sinmijileŋ a sa ci a mevel ɗike so,
joˀ sine, a sa vuluw mumul.
11Wuluk mukuy kuy wãˀa, a sa jiginuw,
sli wala ngi ɓi a sa lihuw,
12a purtuw avu gi gwat malambaˀa,
avu mizli maɓam ɓi ngi slir lambaˀhaya,
13avu mizli mapulaka sipi jiviɗ mikaslsla,
ɓa a sipam jiviɗ misi ar luvuŋ,
14macira taŋ hiri i gi malambaˀa,
mazluzluɓam ti gi moˀore taŋ mukuy ta wãˀ na,
15taŋ a mbiɗaka gwat ngi gi taŋ le malambaˀ,
jiviɗ taŋ masipaka, naŋ slurkoɗo.
16Kanah na, kisa muɗa vu ɗike gu tivi ngwas misi may zil,
avu ngwas burvula misi mi naŋ i ngi tikina vu,
17mupula zil naŋ muzuɓaŋ paɗ ti diili,
yo a puyuko hirnga ngi jumoˀay ngi Buymisemuŋ naŋ le.
18Haˀaw, hay naŋ ara ru di ng'ar mucu,
jiviɗ naŋ ara ru di ng'avi mizli ngi ruwuyoy.
19Ko wa gar muru le ngi hay naŋ na, naŋ anta mo mata,
yo naŋ anta luuma jiviɗ ng'ar siifa mata.
20Naŋ kine, gi gwat ɗike, a sa gi i gwat ngi gi ngi mizli gambarahay,
kisa sipi di i jiviɗ ngi mizli mijeŋŋehey.
21Masa cifam asi ruwuy hana i mizli mikaslslahay,
mizli miteŋteŋhey masa ndiram anga.
22Amma a sa gwahaka misi moˀorehey asi ruwuyo,
a sa ɓulaka mizli malambaˀahaya ti raˀa avra.
Bible en Langue Guiziga © L’Alliance Biblique du Cameroun, 2011.