SLUFA VU 6
6
Ɓimujuwa ngi vula mbur da Bumbulvuŋ
1Bumbulvuŋ a ɓa Moyise: 2Ɓa Israyeleye na: mbur zil malla i ngwas, da a wuɗ le ɓa a vula vu naŋ da ya Bumbulvuŋ ɓa a tiri mbur nazir na,#6.2 Nazir i mbur muvula vu naŋ le ngi gi slra ngi Bumbulvuŋ, a biga ti gwatay wal wal cuw: a si mbaazla ta, yo a hica hirnga ta, pura verse 3 hã 7. . 3Mbur nah, sey a pula mbaazla ati gwat mawi vuhoyo gar: ko yam ngadaw, ko mbaazla mikwereke, a si ta, ko yam ngi gudubun wanaka magam di mbaazla gar na, a sa ta, ko yi ngi gudubun mutukuzo malla muˀulo kwana, a zuma ta. 4Angi hin gar, naŋ muvula vu naŋ le na, gwat ngi zum migaka le ti gudubun, ko ti zinga naŋ, malla ko dubaˀ naŋ kwana, a zuma ta. 5A hija hirnga ati mazlamaya ta ma. A vula vu naŋ taˀ ngi gi gawla ngi Bumbulvuŋ, sey a pula hamac hirnga ati mazlamaya, a gil si, hã a ndila hin naŋ misla na. 6Ar hin naŋ misla da ya Bumbulvuŋ gar na, a gumbuˀ ng'avu vagay ngi mburo ta. 7Ko cine malla mumuŋ naŋ mumucu, ko sukum naŋ mizile malla mongoso, da ko a muc wureˀ aruŋ kwana, jiviɗ anta ɓa a gumbuˀ ng'avu vagay ngi mburo ta. Asi mike na, a vula vu naŋ le ngi gi gawla nga ya Bumbulvuŋ, i ngwic hirnga naŋ manja hic na, mabigaŋ. 8Ar hin naŋ misla ti hudum tuwa na, naŋ a sa ndir inga ya Bumbulvuŋ. 9Da mbur a muc le gurjik a cikeˀe na, hin naŋ misla le ti hudum tuwa, a pusuk le, vur naŋ mugumbuˀ ng'avu vagay ngi mbur na. Da a gi le luuma pal na, a tiri le manja dili a muŋ, a hija hirnga so. 10Li naŋ mawun na, aru ti gonokoy cuw malla ɗiyuw dirgwaɗay cuw ng'avi masay, a mizlingre guɗuk ngi zlir ti ya Buymisemuŋ. 11Masay a sa gi mikuli ngi puya mungra ti ɗiyuw purla, numuŋ a sa gi di mikuli mizlam zlam wãˀ. A dirba nah, a sa ga mezegwel ngi puya mungra a hirnga mbur tuwa, asi naŋ mugumbuˀ ng'avu vagay ngi mbur na, a gi mungra le. Masay a vula mbur tuwa da ya Bumbulvuŋ a muŋ, kalla tapasa vuna si. 12Akẽh na, a vula vu naŋ da ya Bumbulvuŋ, naŋ muɗuva hin naŋ zleˀe tuwa, a zla virzi naŋ hirik a muŋ ma, a vul tumuŋ ngi vi pal ngi gi mikuli ngi ɗiya ɓi. Hin mucohomoy na, a slufam anga mata, asi hin naŋ misla zleˀe tuwa, a pusuk le. 13Mezegwel masa gaka da mbur muvula vu naŋ le da ya Bumbulvuŋ, ani: da hin naŋ misla ti hudum tuwa, a tiki le na, a zilaka nga mizlingre guɗuk ngi zlir ti ya. 14Aru ti ginew makir ngi vul da ya Bumbulvuŋ: zuŋ zlengerek ngi vi pal, manja hereweɗ ava, ngi gi mikuli mizlam zlam wãˀ, zuŋ tumuŋ mongoso ngi vi pal, manja hereweɗ ava, ngi gi mikuli ngi puya mungra, waɗ zlengerek manja hereweɗ ava, ngi gi mikuli ngi luuma zuy. 15Aru ti ɗaf mida ti hapa mezle mukuɗ kuɗ manja ˀis ara, gadagar pal, maɗaf mufukuɗa ti mal, tos tos ar vu waɗ sukwi ngi helelem mikefer kefer, manja ˀis ara, mugujaˀaŋ mal le, waɗ hapa ati mbaazla ngi pusl. 16Masay aru ti gwat muvulahay tuwa nga mbuŋ ɗu, a gi taŋ mikuli ngi zuɓa mungra waɗ mikuli mizlam zlam wãˀ. 17A ja zlengereke, a gi di mikuli ngi luuma zuy, jom ti ɗaf manja ˀis ara, gadagar pal tuwa. A dirba nah wãˀ na, a vula hapa ati mbaazla ngi puslo. 18Ar nah so na, mbur muvula vu naŋ ngi gi slra ngi Bumbulvuŋ tuwa, a hica hirnga a mizlingre guɗuko. A hila himac ngi hirnga naŋ, a pa ng'ar vu misi ar li mazlumam di gwat ngi mikuli ngi luuma zuy tuwa. 19Da pepere ngi zlengerek a di le na, masay a zuɓaŋ, makala manja ˀis ara misi ar gadagar tuwa, a zuɓ purla waɗ helelem mikefer kefer manja ˀis ara purla. A dirba mbur tuwa mihija hirnga le na, a paŋ taŋ sek nga haŋ. 20Akẽh na, masay tuwa, a vula taŋ ti haŋ naŋ da ya Bumbulvuŋ, ti gi mezegwel ngi vula gwata. I gwat muvula le da ya Bumbulvuŋ mandir da masay, bac nga hirnga didak naŋ ati tuwal naŋ, misi inga naŋhay tuwa ma. A dirba nah so na, mbur muvula vu naŋ ngi gi slra ɗu tuwa, a si mbaazla zuy muduba. 21Mezegwel magaka a hirnga mbur muvula vu naŋ le da ya Bumbulvuŋ ti hudumo, i hana. Yo gwat naŋ mavula da ya Bumbulvuŋ vur vula vu naŋ na i hana. Da a ndila le ngi vula gwat mekelem nga hirnga naŋ kwana, a vula zuy. Na zle, sey a vula gwat naŋ miɓa ɓi naŋ na taˀ le, kaslsla kaɓa magam di mezegwel ngi vula vu da ya Bumbulvuŋ.
Mingiɓi masay maɗuwul di mi da mizli
22Bumbulvuŋ a ɓa Moyise na: 23«Ɓa Aroŋ ati ziri naŋ mizileheye: a sa ɗuwulaka mi da Israyeleye ti mingiɓi ani: 24‹Anja Bumbulvuŋ a ɗuwulukum mi, a jiginukum! 25Anja Bumbulvuŋ a purukum kuy avu hiri, a gukum mezleŋ. 26Anja Bumbulvuŋ a ndir hiri taˀ avu kum, a vulukum zuy.› 27Da masayay ara ɗuwulaka mi da Israyeleye ti slimiɗ ɗu kahana na, naɓa ya kwana, i sa ɗuwula taŋ mi ti haŋ ɗu.»
Bible en Langue Guiziga © L’Alliance Biblique du Cameroun, 2011.