SLUFA VU 4
4
Slra ngi sukwi ngi Levi
a. Slra ngi dideˀ ngi Kehatay
1Bumbulvuŋ a ɓa Moyis ati Aroŋ na: 2«Tohoko slimiɗ ngi ziri mizile ngi Kehataya, vur muyo vur muyo, yo vur wazlaraya vur wazlaraya. 3Mizli gar mindilaka le vi kukur makir, hã kukur zlum na, a sa vulaka taŋ slra mekelemey ada ngi gi ar guɗuk ngi zlir ti ya. 4Slra masa vulaka da ziri mizile ngi Kehatay ngi gi ar guɗuk ngi zlir ti ya na, ani: a sa vulaka taŋ buyɓi ngi gwat muvuku vu taŋ wãˀa. 5Da Israyeley ara slikiɗam le na, Aroŋ ati ziri naŋhay a sa soko, a turoko zana minjar ngi tika hiri na kwaɗay, a sirtaka sirit nga hirnga akoti ngi jumoˀaya. 6A sa ciyam garak mupuɗaw cay a hirnga naŋ, zana gagaza miwitwit, sirit a hirnga taŋ ngbulum wãˀ, waɗ ɓeɓelehey kulaˀ kulaˀ ava, ɓa ngi zuɓ naŋ. 7A sa sirtam zana mekelem, migagaza wit wit, sirit ar tabul misi ɗaf muvulikiy di le da ya Buymisemuŋ na, yo taasa mipitikay pitikaya, ziri sikiɗey, kopoy, sikiɗ ngi pusla mbaazlahaya, a sa paka taŋ ara, waɗ ɗaf mindrehhe tuwa sek ar tabul nah vuna ma. 8A sirtam gabaga mindezze ngi ngwic ngi tumuŋ a hirnga nah, waɗ garak mupuɗaw mislirkeɗ cay a hirnga taŋ gar, a caka ɓeɓele ngi zuɓ naŋ kulaˀ kulaˀ ava. 9A wuɗam gabaga gagaza wit wit ngi sirta gwat ngi ɗuva lampe ngi ciɗika li waɗ lampe naŋhaya, gwat ngi slrahay gar, megecey, macamayay, gungwa ngi hila fucuhoy waɗ gojogoɗ ngi mal ngi lampehey vuna. 10A sa sirtaka gwat tayna gar ti garak mupuɗaw, a kaka ɓaˀ ar ɓeɓelehey. 11A sa sirtam gabaga gagaza miwitwit, sirit a hirnga li gi mikuli miɗiya ti ɓiri tapasl tapasl, garak mupuɗaw sirit a hirnga nah, waɗ ɓeɓele ngi zuɓ naŋ kulaˀ kulaˀ ava. 12A dirba nah, a sa hilaka gwat ngi gi mezegweleye gar, magam taŋ slra ar hay ngi Buymisemuŋ. A sa mbizaka taŋ ti gabaga migagaza wit wit, garak mupuɗaw sirit a hirnga nah, waɗ a sa kaka ɓaˀ ar ɓeɓeleheye. 13A sa hilaka fucu ngir li gi mikuli numuŋ, a sa sirtam gabaga migaga sirit a hirnga naŋ, 14a sa paka gwatay magam taŋ slra ngi mikuli cek nga hirnga naŋ: gwat mazlumam di urdi, kuyer ngi zliga useˀ, peley, ziri sikiɗ ngi kuca lihey. Dar a sitaka taŋ gar ti garak mupuɗaw, waɗ ɓeɓele kulaˀ kulaˀ ava, ɓa ngi zuɓ naŋ. 15Da a wuɗam a slikiɗam le na, Aroŋ ati ziri mizile naŋhay, a sa mbizaka gwat ngir guɗuko gar kwaɗay, a dirba nah, ziri mizile ngi Kehatay, a sa hilaka taŋ. Naŋ kine, ziri ngi Kehatay, a jaka haŋ avu gwat muvuku vu taŋ tayna ta, vur taŋ mamicam. Slra ngi ziri ngi Kehatay ngi gi ar guɗuko i nah. 16Elazar, mangal ngi masay Aroŋ, i buyɓi ngi mal ngi lampehey, urdi ngi zlum, gwat ngi migam ngi vul vur hin gar waɗ mal ngi vula slra. I buyɓi ngi guɗuk ngi Buymisemuŋ ati gwat ngi raˀahay gar, waɗ gwat ngir hay ngi Buymisemuŋ ati gwat ngi slra naŋhay gar.» 17Bumbulvuŋ a ɓa Moyis ati Aroŋ ma na: 18«Kam slimiɗ anja ɓa muy ngi Kehatay a ndiram ti siifa a wuzla levi mekelemeye. 19Da a kiraham le ng'avi li mipala, ɓa a ndiram ti siifa, a micam ta na, gam vur t'ani: ka Aroŋ ati ziri ɗik mizileheye, a ram ti mburo sesẽŋ kasl avu slra naŋ, yo avu gwat naŋ masa ga. 20Kanah na, naɓa t'anta sa sliɗaka hiri ngi pura gwat muvuku vu taŋ ko neˀ le ta, vur taŋ masa micam.»
b. Slra ngi dideˀ ngi Gersoŋhoy
21Bumbulvuŋ a ɓa Moyise na: 22«Toho slimiɗ ngi ziri mizile ngi Gersoŋhoy aya, vur wazlaray vur wazlaraya, vur muy vur muyo. 23Mizli mizilehey gar, mindilaka le vi kukur makir hã kukur zlum na, a sa vulaka taŋ slra mekelemey ada, ngi gi ar guɗuk ngi zlir ti ya. 24Slra ngi muy ngi Gersoŋhoy masa gaka ati gwat taŋ masa jijiraka, ani: 25A sa jijiraka zana ngi sirta guɗuk ɗu ngi zlir ti ya ati guɗuk ɗu ngi huroˀo, waɗ borgo ngi garak mupuɗaw misirit anga waɗ zana minjar avu miviŋ ngi guɗuko, 26zana ngi zlavaɗ ati zana ngi mizlingre ngi wazlaray muguno guɗuk ngi huroˀo ati li gi mikuli, zeweɗ naŋhay ati gwat ngi slrahay waɗ gwatay muvulaka taŋ da Gersoŋhoy cek ngi gi slra ti naŋ. 27I Aroŋ ati ziri naŋ mizilehey masa pulaka jiviɗ da Gersoŋhoy ɓa a gaka slra taŋ. Slra ngi jijir waɗ ngi gi ti gi. I taŋ masa ɓaka taŋ ɓi ngi gwat ngi gi ati ngi jijire. 28Slra ngi sukwi ngi Gersoŋ ngi gi ar guɗuk ngi zlir ti Buymisemuŋ i nah. Masa pura taŋ ar slra taŋ i Itamar mangal ngi Aroŋ.»
c. Slra ngi dideˀ ngi Merarihey
29Bumbulvuŋ a ɓa Moyise na: «Ki sa slufa ziri mizile ngi Merariheye vur muyo vur muyo, vur wazlaraya vur wazlahaya. 30Ki sa slufa mizli mindilaka le vi kukur makir hã kukur zlumo cek, a sa vulaka taŋ slra ngi gi ar guɗuk ngi zlir ti ya Buymisemuŋ. 31Slra taŋ masa gaka ani: A sa jijiraka mbal ngi guɗukoyo, ɓeɓelehey, ɓamtalay, sar ngi ɓamtalaya. 32Ɓamtal ngi sar zlavaɗay waɗ sar naŋhay, dum mikaˀ kaˀhay waɗ zeweɗey ati gwat taŋ magam taŋ slrahay gar. Masayay a sa bigaka gwat ngi jijir ngi mburo ngi mburo. 33Slra ngi dideˀ ngi Merarihey i hana, i slra ngi gi ar guɗuko. Masa pura taŋ ar slra, i Itamar, mangal ngi Aroŋ.»
Slufa mizli levihey magam slra
34Moyis ati Aroŋ waɗ mizli micawwa ngi Israyeley a tohoko slimiɗ ngi Kehataya, vur muyo vur muyo, yo vur wazlaraya vur wazlaraya. 35I mizli levihey mindilaka le vi kukur makir hã kukur zlum, mindilaka le ngi gi slra ar guɗuk ngi zlir ti Buymisemuŋ. 36Mizli leviheye, taŋ jom gar na: durmuk cuw ti skat skat tarnaˀ ti kukur zlum. 37Muy ngi Kehetay, mindilaka le ngi gi slra ar guɗuko, mizli Moyis ati Aroŋ muslufaka taŋ, kaɓa Bumbulvuŋ muɗuva da Moyise. 38Mizli ngi Gersoŋhoy, vur muyo vur muyo, yo vur wazlaray vur wazlaraya, 39mizli mindilaka le vi kukur makir hã kukur zlum, yo mindilaka le ngi gi slra ar guɗuk gar na, 40muy taŋhay ati wazlaray taŋhaya, taŋ jom gar na, durmuk cuw ti skat skat merkeɗ ti kukur makir. 41Hana i taˀ ngi muy ngi ziri ngi Gersoŋhoy, mizli mindilaka le ngi slra ar guɗuk gar, Moyis ati Aroŋ muslufa taŋ kaɓa Bumbulvuŋ miɓa ɗaˀ le.
42Muy ngi Merarihey ani: slaf slaf vur muyo vur muyo, yo vur wazlaray vur wazlaraya, 43mizli mindilaka le vi kukur makir hã kukur zlum, yo mindilaka le ngi gi slra ar guɗuko, 44muy taŋhay a jom gar na, durmuk makir ti skat skat cuw. 45Hana i taˀ ngi muy ngi ziri ngi Merarihey, i mizli gar mindilaka le ngi slra ar guɗuk, Aroŋ ati Moyis mutohoko slimiɗ taŋ kaɓa Bumbulvuŋ muɗuva da Moyise.
46Hana i taˀ ngi levihey Moyis ati Aroŋ waɗ mizli micawwa ngi Israyeley mutohoko slimiɗ taŋ vur muy vur muyo, yo vur wazlaray vur wazlaraya. 47I mizli mindilaka le vi kukur makir, hã vi kukur zlum, yo mindilaka le ngi gi sla ati ngi jijira gwat ar guɗuko gar. 48Taŋ jom gar na: mizli durmuk dangafaɗ ti skat skat zlum ti kukur dangafaɗ. 49Mburo gar na, a ɓakaŋ ɓi ngi gwat naŋ masa ga ati ngi gwat naŋ masa jijira, kaɓa Bumbulvuŋ muɗuva da Moyise.
Bible en Langue Guiziga © L’Alliance Biblique du Cameroun, 2011.