SLUFA VU 34
34
Maakway ngi Kanaˀan
1Bumbulvuŋ a ɓa Moyise na: 2«Mingiɓi ani, ɓa da Israyeley ɗaˀ ɗaˀa: kisa cam nga Kanaˀana, hirwuy ya muvulukum di ɓa ki wunkaka na, maakway naŋhay anihĩ: 3Tir vay ruwuyo, maakway a zlo a wuzlaɓuh mikirɗak kirɗak ngi Sin, hã a sipa Edomo silaɓɓa. Tisi pas ngi miprike, maakway a zlo zle tir vay hirwuy ngi mubuliy mumuca. 4A sa guno tir vay ruwuy ngir li jiɗ ngi urucoy, a sa bi baɗ a Sin, hã sesẽŋ ar vay ruwuy ngi Kades-Barneya, a sa bi baɗ akẽh nga Hasar-Adar ati Asmoŋ. 5A bi baɗ akẽh ma na, hã ara zliram ati mizaw Ezipte, ara kiɗo mi a mi mubuliy. 6Tisi pas ngi pastaˀa, maakwaya ti mbubuliy Mediterane. 7Tir vay muŋ, kisa ciraka maakwaya ar wala ngi mubuliy ati muwã Hor. 8Ki sa ciraka zle a muwã Horo, hã sesẽŋ a Lebo-Hamat ati Sedat. 9Yo a sa ra bi a Sifroŋ, ɓa ara kiɗo mi a Hasar-Enaŋ. Maakway kum misi tir vay muŋ, i hana so. 10Tisi pas ngi miprike, kisa ciraka maakwaya zle a Hasar-Enaŋ, kini ngir ti Sefam. 11A sa bi baɗ a Sefama nga Ribla, tisi pas ngi miprik ngi Ayin. A dirba nah, a sa pi sar sesẽŋ, ara duko li musunok ngi mi yam Zenezaret. 12A sa ra zliram ati mizaw Zurdeŋ, ara kiɗo mi a mi mubuliy mumuca. Maakway ngi hirwuy kum i hana so.» 13Moyis a slufa ɓi hana da Israyeleye. A dirba nah, a ɓa taŋ: «Hirwuy Bumbulvuŋ muvulukum di ɓa ki wunkaka ti ceregezleŋ tuwa i hana. Ki sa wunkaka da sukwi mungoltir ti reta na. 14Naŋ kine, sukwi ngi Ruben ati hay taŋhay, sukwi ngi Gat ati hay taŋhay waɗ sukwi ngi Manase cah, a lumam hirwuy nga taŋ le si. 15Sukwi mucuw ti reta tayna, a lumam hirwuy mi nga taŋ le si, naŋ tir vay ruwuy ngi dubazaw Zurdeŋ, puɗak angi Zeriko.»
Slimiɗ ngi mizli madiɗahay masa wunkaka hirwuy Kanaˀan
16Bumbulvuŋ a ɓa Moyise: 17«Masay Elazar waɗ Zozuwe mangal ngi Nuno, a sa wunkaka hirwuyo da mizli.» 18Ki sa zuɓam buyɓihey pal pal ar sukwi gar, ɓa ngi jini taŋ. 19Slimiɗ taŋhay ani: Sukwi ngi Zuda: Kalep mangal ngi Yefune. 20Ar sukwi ngi Simeyoŋ: i Semuyel, mangal ngi Amihuɗ. 21Ar sukwi ngi Benjameŋ: i Elidat, mangal ngi Kisiloŋ. 22Ar sukwi ngi Daŋ: i Buki, mangal ngi Yogli. 23Ar suwki ngi Manase, mangal ngi Zozef: i Haniyel mangal ngi Efot. 24Ar sukwi ngi Efrayim, mangal ngi Zozef: i Kenuwel manhal ngi Siltaŋ. 25Ar sukwi ngi Zabuloŋ: i Elisafaŋ, mangal ngi Parnak. 26Ar sukwi ngi Isakar: i Paltiyel, mangal ngi Azaŋ. 27Ar sukwi ngi Aser: i Ahihut, mangal ngi Selomi. 28Ar sukwi ngi Neftali: i Pedahel, mangal ngi Amihuɗ.
29Mizli, Bumbulvuŋ muwuna taŋ ngi wunka hirwuy Kanaˀan da sukwi Israyele, i taŋ.
Bible en Langue Guiziga © L’Alliance Biblique du Cameroun, 2011.