SLUFA VU 30
30
1Moyis a ɓa ɓi Bumbulvuŋ muɗuvaŋ di tuwa cek da Israyeleye.
Ɓimujuwa vur jimi
2A dirba nah, Moyis a ɓa buy ngi sukwi Israyeleye: «Bumbulvuŋ a pulukum ɓimuɗuva naŋ ani: 3Da mbur a ɓi le ɓa a sa vul gwat ngi mi ngi Bumbulvuŋ malla a juwa le ɓa a pul gwat na, anja a ngila ɓi nah ta, sey a gam cummo kaɓa naŋ miɓa vuna si. 4Amma, da kaɓa ani: zuŋ diili a hay cine aruŋ, a ɓi le a sa vul gwat ngi ji mi da Bumbulvuŋ, malla a juwa le ɓa a gi gwata, 5da cine a cine ɓi nah le, a ɓaŋ ta na, diili tuwa, a ga gwat naŋ ngi ji mi, naŋ mujuwa tuwa. 6Amma da cine micina le, a ɓaŋ le tapasa kalla, a ngum ta na, naɓa ɓi naŋ miɓa ngi jimi ati gwat naŋ mujuwa ngi gi tuwa, i ngataraŋ. Bumbulvuŋ a sa pulaŋ mungra nah, asi i cine mungum ta. 7Da kaɓa ani: zuŋ diili a ɓi le a sa ja mi ngi Bumbulvuŋ, malla a juw ɓi le ngi gi gwat, a dirba nah a sliˀi le. 8Tapas zil naŋ micina le, a ɓaŋ tapasa kalla ta na, naɓa a ga gwat naŋ miɓa ngi ji mi ati naŋ mujuwa ngi gi tuwa. 9Amma tapas zil naŋ micina le, a ɓaŋ le tapasa kalla, a ngum ta na, naɓa jimi naŋ ati gwat naŋ mujuwa ngi gi tuwa, i ngataraŋ. Ko ti naŋ miga gwat naŋ ngi ji mi na mata tekeɗe kwana, Bumbulvuŋ a sa pulaŋ mungra naŋ.» 10«Da wudiga malla ngwas muɓula le, a ɓi le a sa vul gwat ngi ji mi na, sey a ga gwat naŋ mujuwa ngi sa gi na. 11Da kaɓa ani, ngwas ngi hay zil a ɓi le a sa vul gwat ngi ji mi da Bumbulvuŋ, malla a juwa le ngi gi gwata. 12Amma zil naŋ micina na, a ɓaŋ ta na, naɓa gwat naŋ miɓa ngi ji mi waɗ gwat naŋ mujuwa ngi gi tuwa, a ga gu. 13Amma da zil naŋ a waɗ le ɓa a tika tapas naŋ micina vuna kalla na, naɓa gwat naŋ ngi ji mi malla naŋ mujuwa ngi gi tuwa, i ngataraŋ. Bumbulvuŋ a sa pula mungra ngi ngwas tuwa, asi i zil naŋ mungum ta. 14Da ngwas a ɓi le a sa vul gwat ngi ji mi malla a juwa le ngi pula gwat na, zil a pulaŋ jiviɗ malla a tikaŋ gu. 15Na, da zil naŋ a ɓaŋ ta, hã li wun na, naɓa gwat naŋ ngi ji mi malla naŋ mujuwa ngi gi na, a ga gu. Zil naŋ miteˀteˀ tapasa na, mbiɗeˀvra, a ngum le ɓa a ga. 16Amma da hin naŋ micina na, a cuh le si, da a wuɗ le ɓa a tika ɓula si na, naɓa zluɓ ngi ngwas naŋ a mbiɗi le nga hirnga naŋ.»
17Ɓimujuwahay, Bumbulvuŋ muvula taŋ da Moyis, vur ɓi ngi zil ati ngwas naŋ, vur cine ati zuŋ naŋ diili aruŋ na, i hanayna so.
Bible en Langue Guiziga © L’Alliance Biblique du Cameroun, 2011.