NAHUM 2
2
1Mizli Zudahay, mbur ara kilo ti ɓi mezle ani kini ti hirnga muwãhay:
ara til mi ti ɓi ngi zuy.
Mizli Zudahay, gaka muguzlum kumoyo,
yo gwat kum miɓaka ɗaˀ le da Buymisemuŋ na, gaka taŋ.
Asi mbur misi cucuko, naŋ anta sa ci ng'asi ruwuy kumo mata.
Gidaŋ naŋ a kiɗ mi le wãˀ.
2Hirwuy Niniv, sojehey ara zlukuw ngi kiɗa vu.
Jigina li ɗik muguno ti mohol,
wi vu a jiviɗeye,
juw vu, cici zlak gidaŋ gidaŋ wãˀ.
3Asi Bumbulvuŋ ara mo ti dudok ngi dideˀ ngi Zakopoy a muŋ,
haˀaw naŋ vuna i dudok ngi Israyeley na.
Mivi vuhoy a hilaka taŋ gwataya le zleˀe,
a hiryaka taŋ guva ngi gudubunoyo le zleˀe.
A tiɓaka walahay Ninive le, a vaka gwat ngi raˀahaya le
4Mbaray ngi soje gambara naŋhay i gagazahay ndezze,
yo migi vurumoyo, a kam zana gagazahay wirik wirik.
Da taŋ micinjaham le ngi kiɗa vu na,
mota taŋ ngi vurumoyo, ɓiri taŋhaya gar a wucuɗam.
Ziwitey a wusam jiwir jiwir.
5Mota ngi vurumoy a kilam a ɓuh taˀ dibiɗ lambaˀ,
a dumbuslam vu ar li ngi lumahaya,
mbur a ɓi ta na, i daliivu,
a kilam teˀ, kuɗiɗi kaɓa vuŋ mawucuɗu.
6Buy Niniv a zila madiɗa ngi soje naŋ miwirwireye,
amma a ram tangbaˀ tangbaˀ.
A wusam vu kini ng'avu moholo,
a ɗumom a duba gwat.
7Miviŋ mitaˀ hiri nga mubuliye, i mingilahay le,
mugum ngi buy ara mbizli.
8Kuli ngwas miciɗa ti ciɗe, a zuɓaka le, a ram di le.
Ngwas miji haŋ naŋhay matuwam kaɓa ɗiyuw dirgwaɗaya, a ram ti taŋ le,
taŋ haŋ bac a didak a didak.
9Ninive, naŋ zlezle hã wurenna kaɓa kisa madiɗa misi ti yam peɗe peɗe anga.
Amma ara kilam le.
A ɓaka taŋ: «Cicam! Cicam zlak gidaŋ gidaŋ!»
Amma ko mbur mambuɗo hiri nga dirba anta.
10Hilaka ɓiri bara, yo hilaka ɓiri tapasl tapasla slar slar,
asi zlili ngi raˀa anta kiɗ mi ta,
gwat mupuɗaw puɗaway, mbaf mbaf a huroˀo.
11A vaka gwataya le, a tiɓaka taŋ le, a hiryaka taŋ le.
Gidaŋ ara kiɗ mi,
poprokoy ara gam guluɓ guluɓ,
dumvu taŋ gar ara jijiki,
tuwuy a hiri kiliw kiliw.
Ninive naŋ kaɓa mobor mitikakaŋ ˀay le
12Kuɓuŋ ngi moboroy tuwa naŋ maka?
Ziri moboroy a humbuɗaka useˀ taŋ anga zleˀe.
Da mobor aru le nga ji useˀ na,
ko mbur maga zluwun da ziri naŋhay anta.
13Mobor a puwa useˀ, a vula da ziri naŋhaya,
a ɓuto useˀ da madiya moboroyo,
a naha kuɓuŋ naŋhaya mbaf ti useˀhey, naŋ mija taŋ ti ji,
a naha li hin naŋ mbaf ti useˀ mupuwa.
14Bumbulvuŋ misi gidaŋ wãˀ a ɓi ani:
«Ninivey, y'ani i ra zlir dibiɗ ti kum!
Haˀaw, i sa wura mota ngi vurum kumoyo, hã a tiram cunju sẽwwe.
I sa kiɗa gawla kumoy misi ka ziri moboroyo ti maslalam.
Gwat kum matuɓoko taŋ ti gidaŋ na, i sa kiɗa mi taŋ asi ruwuyo,
yo mizli anta sa cinam ˀay ngi mijiviɗ kumoyo mata.»
Currently Selected:
NAHUM 2: BEGDC
Highlight
Copy
Compare
Share
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
