MISE Ɓi madiɗa madiɗa ngi raˀa
Ɓi madiɗa madiɗa ngi raˀa
Mijiviɗ Mise a gam slra ati mijiviɗ Ezayi ar vi mupurlahay, Mise a ga slra naŋ gisiŋ di na, ar vi 740 hã a ndila 700 dumbuŋ ar yi ngi Y. K. Mise naŋ kaɓa Ezayi vuna ya, a ɓa ɓi da zumabuy Zuda, naɓa ti nana, soje Asirihey a gucoko taŋ mi le.
Mise a ɓa mizli macinaka mingiɓi naŋ ɗaˀ ɗaˀ le, ruwuy taŋ, haŋ vendeke naŋ i Zeruzalem, berne miwãˀa, a sa lum ɓi mupurla kaɓa ngi Samari, berne miwãˀ ngi zumabuy ngi Israyeley na ya, a diɗ arvi 722 hã 721 dumbuŋ ar yi ngi Y. K. A ɓa taŋ na: mendere masa gi ti mbuŋ na, i migir ngi mungra taŋhay, kaɓa ani, gi gwat mijeŋ ta mazum buy a wuzla kum na. Mijiviɗ a cufuɗ ɓa Buymisemuŋ a mbiɗaŋ mi, vurˀe ɓi naŋ aru ti naŋ seŋ seŋ nga zlir dibiɗ ati mizli madiɗa ngi si ruwuyoy, soje madiɗa miwaka mizli: mizli misi gwatay haɗi, miwi mizli, migi kiitahay waɗ masayay. A ra ngila mi da mizli vur mijiviɗ mitikina vuhoy, a tisla mevel da mizli ti ɓi ngi vula mevel, yo ɓa a susuyumo gwat mimbiɗa gwat ngi gi taŋ na gar. Mise maɓa taŋ ɗaˀ ɗaˀle gar na gar na, a wuɗ ɓa mizli macinaka mingiɓi naŋ a wulkam, yo a wunam: A cinam mi da gwat Buymisemuŋ mawuɗo, a cinaka mi da mizli waɗ a wuɗaka taŋ tewle (6.8 ). A ɓa taŋ ɗaˀ ɗaˀ le na, jom ti tila mi ti lih nawayaŋ, Buymisemuŋ masa ga tumbuŋ ar mizli naŋhay.
Ɗerewol Mise na, i mutoho aseˀe aseˀe, asi ɓihey cuw mazlira kasl ar leˀe, kaɓa ani: Buymisemuŋ a ɓi a sa ga kiita da mizli naŋhaya, yo a sa kuta taŋ ti bonoy (pura 1—3; 6.1 —7.7 ), amma a ɓaŋ ɗaˀ ɗaˀ le, a sa lahaŋ ma (pura 4—5; 7.8 —20). A sa cifaŋ, yo a sa pulaŋ asi haŋ ngi buy masa bo tir tizer ngi Davit (pura 5.1-4a).
Currently Selected:
MISE Ɓi madiɗa madiɗa ngi raˀa: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.