Luk 23
23
Miram ti Yesu nga mbuŋ Pilat
(Yo pura Mat 27.1-2,11-14; Mark 15.1-5; Zaŋ 18.28-38)
1Dar taŋ a slikiɗam gar ar leˀeŋ, a ram ti Yesu nga mbuŋ Pilata. 2A kupakaŋ ɓi, a ɓam: «I lumaka mbur hana ar li pi mi da mizli ɓa a slikiɗam ɓi: a tika taŋ ɓa a wurkaka buutu da buy mimadiɗa#23.2 Buy mimadiɗa hana i ampere ngi Roma. ta, yo a wa vu naŋ i Mesi, buy madiɗaŋ.» 3Joˀ Pilat a cufuɗaŋ: «Ki buy madiɗa ngi Yudehey kwa?» Yesu a mbiɗaŋ di: «Ki ɓa le ta kwa!» 4A dirba nah, Pilat a ɓa masay madiɗahay ati zigiduwo: «Mbur hana, ko yi lum ɓi ava ngi jaŋ ti kiita ta.» 5Amma a hurdumom di, a ɓam: «A ra pa mi da mizli ti gwat naŋ madubuna taŋ di na, a zla zle angi hirwuy Galile, hã angi hirwuy Yude kurzluˀ gar, sesẽŋ aka.»
Yesu a mbuŋ Herod
6Ti Pilat micina mizli maɓam kanah na, a cufuɗ vu: «Mbur misenna vuna, i mbur Galile kwa?» A ɓakaŋ: «Hĩ.» 7Yo naŋ misina i mbur muso ti ruwuy Herod muwa na, a slinaŋ di. Ti nah na Herodo, naŋ a Zeruzalem. 8Herod mupura Yesu keɗ na, a mumul haɗa teˀe, asi zlezle na, a ro ti may ngi pur naŋ, a cin mizli maɓaka ɓi naŋ na le, a wa zleˀe kaɓa a sa puraŋ ar li gi cekene kwana. 9Vurˀe, a cufuɗa Yesu ti ɓi wal wal haɗi, amma Yesu a mbiɗaŋ di ko pal ta wãˀ. 10Masay madiɗahay ati buy ngi ɓimujuwahaya, t'ada kẽh, ara kupakaŋ ɓi ti gidaŋ. 11Herod ati soje naŋhay a gam di ka mbur ta, a singiram angaŋ. A dirba nah, a kakaŋ zana mezle miwilik wilik, a slinam di da Pilat a muŋ. 12Zleˀe na, Herod ati Pilata i mesenehey, amma zle ti hin nah na, a jam ngama le yum yum.
Migaka kiita ngi muc da Yesu
(Yo pura Mat 27.15-26; Mark 15.6-15; Zaŋ 18.39—19.16)
13Dar Pilat a kuso masay madiɗahay ati mizli madiɗahay waɗ mizli gar, 14a ɓa taŋ: «Ki sikiy ti mbur hana, ki ɓam, ara ziza mizli avu jiviɗ mezle. Ani, yi cufuɗa le a mbuŋ kumo, ko yi lum ɓi ava ngi jaŋ ti kiita ta. 15Herod mumo ndra di na, aseˀeŋ. Asi a gi gwat mindila ngi gaŋ kiita ngi muco ta. 16Vurˀe, yi sa ɓi ɓa a sliɗakaŋ. A dirba nah, yi sa pulaŋ a ru.» 17Angi muguzlum Pak gar na, sey Pilat a pula taŋ mbur dangay pal mbak le.#23.17 Verse hana naŋ anta ar mutoho micikiɗeffe mudumbuŋhoyo ta. Pura Mat 27.15; Mc 15.6. 18Mizli a tilam mi gar arleˀeŋ: «Kiɗa Yesu vagay, pula ndra Barabasa.» 19Barabasa, a kaka zleˀe ar dangaya, vur naŋ mislikiɗ ɓi ar walahay, yo naŋ makiɗ hirnga. 20Pilata, may naŋ ti pula Yesu, vurˀe a ɓa zigiduwo ma. 21Amma taŋ gar, a tilakaŋ mi cǝruw cǝruw: «Dira avu dum mizliraŋ! Dira avu dum mizliraŋ!» 22Dar Pilat a ɓa taŋ sar mimakir naŋ ma: «Na, mbur hana vuna a gi gwat malambaˀ mi ska? Yi lum gwat ko neˀ ava mindila ɓa a kiɗaka vagaya ta. Vurˀe, yi sa ɓi ɓa a sliɗakaŋ, a dirba nah, yi sa pulaŋ a ru.» 23Amma taŋ a cicam kaŋ kaŋ ti widi cõh cõh, a cufuɗam ɓa a diraka Yesu avu dum mizliraŋ, hã widi taŋ a fini gidaŋ. 24Dar Pilat a zil mi, ɓa a ga taŋ gwat taŋ mawuɗama. 25A pula taŋ mbur taŋ mawuɗam tuwaŋ, mbur micaka zleˀe angi dangay asi naŋ mislikiɗ ɓi ati naŋ mikiɗ hirnga tuwa, a vula taŋ Yesu, ɓa a gam di ka taŋ mawuɗam.
Midiraka Yesu avu dum mizliraŋ
(Yo pura Mat 27.32-44; Mark 15.21-32; Zaŋ 19.17-27)
26Ti taŋ maram ti Yesu na, a jaka mbur mekelem ada, a zilaka Simoŋ, mbur ngi Sirene. A ra so zleˀe ti ɓuh. Joˀ a zuɓakaŋ dum mizlira tuwa, ɓa a jijira ɓaˀ asi Yesu.
27Zigiduw haɗi ara sipaŋ. Ngwasay ada a wuzla taŋ ma, ara tuwakaŋ ˀirslik ˀirslik, haŋ a didak a didaka. 28Yesu a mbiɗi hiri ng'avi taŋ, a ɓa taŋ: «Kum ngwas Zeruzalemey, ki tuwam asi ya ta! Amma tuwam hirnga kum vuna waɗ vur ziri kumoy jaka! 29Ani, hin a sa ndilawa. Tapasa, mizli a sa ɓam: ‹Ngwas dirlayay ati ngwas miyam ɗaˀ tahay, yo muvulam ɗuwa da ziri ɗaˀ tahay na, yawwa, taŋ ar mumul!› 30Dar a sa ɓaka muwãhaya: ‹Mbuzloko ng'ar ndra!› Li miɗingir ɗingireye: ‹Ɗumom ndra!› 31Asi da ara gam ti dum mutukuzo kahana na, a sa gam ti dum muˀulo mbrike?»
32A ram ti mufuyovuhoy le cuw ɓa a kiɗaka taŋ vagay vagay ati Yesu aya. 33Ti taŋ mindilam ar li mazilaka Guduguzluŋ hirnga#23.33 Guduguzluŋ hirnga, i li miɗingir mubam vu ati guduguzluŋ hirnga ngi mbur. na, a diraka Yesu a diga avu dum mizliraŋ waɗ mizli migi malambaˀhay mucuw tuwa aya, mbur pal tir vay hazum, pal mekeleme tir vay gula. 34Yesu a ɓi: «Baha, puya gwat malambaˀ taŋ avra, asi a sinaka gwat taŋ magaka na ta.»
Dar sojehey a kiɗam caca ɓa a wuɗkaka zana naŋhaya. 35Mizli ada dedeŋ akẽh, ar li pura hiri. Mizli madiɗahaya, a singiram angaŋ, a ɓam: «A laha mizli mekelemeye le. Da i Mesi, Buymisemuŋ muwuna na, anja a laha hirnga naŋ ya ayɗi!» 36Sojehey kwana, a singiram anga ya, a kirohoko ɓa a vulakaŋ mbaazla mikwereke, 37a ɓakaŋ: «Da ki buy madiɗa ngi Yudehey na, laha hirnga ɗike ya ayɗi!» 38A tohom mingiɓi toh toh avu dum, law a hirnga naŋ, a tohoko na: «I buy madiɗa ngi Yudehey.» 39Mbur pal a wuzla mufuyovu midirahay tuwa, a za Yesu ya, a ɓaŋ: «Ki Mesi tuwa takwa? Laha hirnga ɗik vuna jom ati ndra ya ayɗi!» 40Amma mekelem a mbiɗaŋ hirnga, a ɓaŋ: «Ki zluwun ti Buymisemuŋ ta mbrike? Ki ra si bonoy misi purla ati naŋ vuna ya ngbaŋ. 41Ngi ndra, naŋ kaslsla le so, i wurkam di i gwat malambaˀ ndra migakaŋ, amma naŋ, a gi gwat malambaˀ ko neˀ ta.» 42Joˀ a ɓi: «Yesu, ti ka masa so ngi Zumabuy ɗik na, ki puyuk hirnga ti ya ta.» 43Yesu a mbiɗaŋ di: «Gisiŋ, yi ɓuw na: Dana dana, i sa ra cifam cuwa aciki Buymisemuŋ.»
Muc ngi Yesu
(Yo pura Mat 27.45-56; Mark 15.33-41; Zaŋ 19.28-30)
44Ti nah na, wuzla papas a wuɗo gi gweˀ. Luvuŋ a gi asi ruwuyo keɗeɗe gar, a zik, hã a ndila pas ngi ɓula away ngi hay. 45Pas a ɗum le. Dar godo ngir hay ngi Bumbulvuŋ a Zeruzaleme, a ngir puɗak a wuzla cuw. 46Yesu a til mi ti gidaŋ: «Baha, yi pula musuɗuk ɗu asi haŋ ɗiki.» Naŋ miɓi kanah na, a mucu. 47Madiɗa ngi sojehey mupura gwat nah migi gar na, a hunuma Buymisemuŋ, a ɓi: «Mbur hana i mbur mijeŋŋe zleˀe gisiŋ!»
48Mizli gar mikisoko ngi pura hiri, mupuraka gwat migi hana na, a mam haŋ bac bac a didaka. 49Ngama ngi Yesuhoy gar ati ngwasay musupoko di zle a Galile na, a cicam kileŋ neˀ, ara puroko di.
Mikaka vagay ngi Yesu ar vigiɗi
(Yo pura Mat 27.57-61; Mark 15.42-47; Zaŋ 19.38-42)
50Mbur mekelem ada, a ndilawa, a zilaka Zozef, naŋ a wuzla mizli ngir kus madiɗa ngi ngilawuy, i mbur mezleŋ, naŋ jeŋŋe. 51Wuluk taŋ waɗ gwat taŋ migaka na, a jum ˀay ati taŋ anga ta. I mbur ngi Arimate, ara kutuk Zumabuy ngi Buymisemuŋ. 52Mbur nah na, aru ng'avu Pilata, a cufuɗaŋ ɓa a vulaŋ vagay ngi Yesu. 53A po di sar tir dum mizlira tuwa, a tuwuɗa ti gabaga, ara ka angi vigiɗ muguro zleˀe angi mandazlay muwã. A kam vagay ngi mbur anga ɗaˀ taruŋ. 54Tapasa i hin ngi juwa vu ngi sabat asi sabata naŋ gweˀe.
55Ngwasay mikisoko Yesu zle a Galile tuwa, a sipaka Zozefe, a puraka zivi, yo a puraka da a kaka vagay ngi Yesu mbri mbrike na. 56Dar a mam ngi hay taŋhay, ara ɗiyoko malay ati urdihey.
Amma ngi hin ngi sabat na, a muskam vu kaɓa ɓimujuwa miɓaŋ.
Currently Selected:
Luk 23: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.