LEVIHEY 11

GWAT MANJA DILI ATI GWAT MISI DILI

Gwat misãmi ngi zum ati ngi zum ta

1Bumbulvuŋ a ɓa ti Moyis ati Aroŋ na: 2«Ɓaka Israyeleye: A wuzla gwat misãmi ngi ruwuyoy gar na, misi ki zumaka taŋ zuyo, t'ani hĩ: 3Misi zlenek wurkek cuw, yo maˀurom maˀurom gar na, ki zumaka tayna zuy. 4Naŋ kine, gwat misãmihey maˀurom, yo misi zlenek wurkek cuw, malla misi zlenek wurkek ɓula, amma t'anta ˀurom ta na, ngi zumoy ta a wuzla t'anihĩ: zlogomo i ngi zum ta, asi a ˀur ɓula, amma zleneke wurkek cuw ta. I gwat mitika le ngi zumo.

5Kucum, a ˀur ɓula, amma zleneke wurkek cuw ta. I gwat mitika le ngi zumo.

6Mandaf, a ˀur ɓula, amma zleneke wurkek cuw ta. I gwat mitika le avu kumo.

7Fedeme, zleneke wurkek cuw ɓula, amma naŋ anta ˀur ta. I gwat mitika le ngi zumo.

8Ko ki zumaka useˀ taŋhaya ta, ko maara taŋ kwana, ki jaka haŋ avu taŋ ta. I gwat mitikahay le ngi zumo.

9A wuzla gwat misãmi ngir yamay gar na, misi ki zumaka zuyo, t'ani hĩ: gwat misãmi ngir mubuliy malla ngi mizaw, misi saray njor njor ava, yo dubaˀ tupãˀ tupãˀ ava gar na, ki zumaka zuy. 10Amma a wuzla taŋ, gwat misãmi memeɗehey ati gwat misi titiri ngir mubuliy ati ngi mizaway gar, misi gwat njor njor malla dubaˀ anta avu taŋ tupãˀ tupãˀ ta gar na, i mitikahaylengi zumo, 11yo a sa ndiram i mitikahay le avu kumo. Ko ki zumaka useˀ taŋ ta, yo ko ki gumbaˀaka maara taŋ ta. 12Gwat misãmi ngir yam, misi gwat anta njor njor ava ta, yo dubaˀ anta tupãˀ tupãˀ avu taŋ ta gar na, i mitikahay le ngi zumo.

13A wuzla ɗiyuwoyo, misi ki pulaka, ki zumaka taŋ ta, asi i mitikahay le ngi zumo na, t'anihĩ: kurom, moloturzo, kurom ngi mi yam, 14makalala, sukwi ngi kilkandaŋhay, 15sukwi ngi magagakay, 16maduli, kurek, cecegwrek, sukwi ngi zlamay, 17biizim, yamedewle, kusuk tumburum, 18pihu, sutete, mogodok, 19membese mbese, sukwi ngi ngirkakahay, jorojoro waɗ kwekwenje.

20Gwat misi zlara, misãmihey gar na, i mitikahay le. 21Na so na, gwat misi zlara, misãmihey, yo majiɗam car car gar na, 22misi ki humbuɗaka taŋ zuy a wuzla taŋ na, anihĩ: sukwi ngi yukoy, ngi jarayay waɗ ngi mungurzlekey. 23Amma gwat misi zlara waɗ sar mufaɗ si gar na, i mitikahay le ngi zumo.

Ji haŋ avu gwat maso ti dili da mbur

24Gwat misãmi tayna gar, a sukum ti dili, waɗ ma na, ko wa gar mija haŋ le avu maara naŋ na, naɓa naŋ ti dili, hã pastaˀa. 25Da mbur muzuɓa maara taŋ le na, sey a buna zana naŋhaya ceɗ ceɗ le, yo naŋ ti dili hã pastaˀa. 26Gwat misãmihey, misi zlenek wurkek wurkek ta, yo maˀurom ta gar na, i gwat misi dilihey avu kumo, mbur mija haŋ le avu taŋ na, naŋ ti dili. 27Gwat misãmi misi sar mufaɗ mifaɗay maram ti mododok saray gar na, i gwat misi dilihey avu kumo, mbur mija haŋ le avu maara taŋhaya gar na, naŋ ti dili, hã pastaˀa. 28Yo mbur muzuɓa maara taŋ le ng'avra na, sey a buna zana naŋhaya ceɗ ceɗ le, yo naŋ ti dili, hã pastaˀa, asi i gwat mitikahay le ngi zumo.

29Gwat misãmi mingweɗeŋ ngweɗeŋ ngi ruwuyoy, misi dilihey avu kum ani: guɗer, kotokom, sukwi ngi matakwal madiɗahay, 30mitiɓirslim, miɓilim ɓilim, ɗuwel, mombroŋ waɗ mozongozongo, 31A wuzla gwat tayna cek, kum masa puram i mitikahay le ngi zumo na, i taŋ. Maara taŋhaya, da mbur mija haŋ le avu taŋ na, naŋ ti dili, hã pastaˀa. 32Gwat tayna, da maara naŋ a diɗ le ar gwat wanaka gar na, naɓa gwat nah, a tiri le, naŋ ti dili, mbiɗeˀvra, ko gwat wanaka gar magam di slra, da i gwat ngi dum, da i zana, garak malla gabal, na zle, ko gwat ngi slra wanaka gar si. Sey a bunaka gwat nah ceɗ ceɗ le, amma a ndir naŋ ti dili, hã pastaˀa, a dirba nah, naŋ manja dili. 33Da gwat nah, a diɗ ng'ar magayak na, naɓa gwat ngir magayak nah gar a tiri le naŋ ti dili, yo sey a wahaka magayak nah avra wãˀ. 34Da mbur a pa yam ngir magayak nah le ng'ar gwat ngi zum wanaka gar na, naɓa gwat nah a tiri le naŋ ti dili. Naŋ kanah ma, gwat ngi si masaka zuy, misi zleˀe ar magayak ko wanaka gar na, a tiri le naŋ ti dili. 35Gwat purla a wuzla gwat misãmi tayna, da a diɗ le ng'ar gwat na, naɓa gwat nah a tiri le, naŋ ti dili. Da ko i li di ɗaf malla liwis kwana, sey ki wahaka taŋ avra, asi taŋ ti dili, yo sey a ndiram, i gwat misi dilihey avu kumo. 36Amma, da a diɗ ar miviɗiviɗi ngi yam, malla ar vigiɗ ngi yam na, yama taˀ naŋ na, naŋ manja dili, amma mbur mija haŋ le avu maara ngi gwat nah na, naɓa a tiri le naŋ ti dili ɓula. 37Gwat tayna, da maara taŋ purla a diɗ le ar hilfa gwat muwam di vu ngi zligi na, hilfa gwata, a ndir manja dili. 38Amma hilfa gwata, da kaɓa a pam yam le zleˀe ara si, yo maara ngi gwat tayna tuwa, a diɗ le ng'araˀa na, naɓa hilfa gwat nah na, naŋ ti dili.

39Da ginew ngi zum kum, a muc le, mbur mija haŋ le avu maara nah na, a tiri le, naŋ ti dili, hã pastaˀa. 40Mbur muzuma useˀ ngi ginew nah le na, sey a buna zana naŋhaya ceɗ ceɗ le, yo a tiri le naŋ ti dili hã pastaˀa. Mbur muzuɓa maara naŋ le ng'avra na, sey a buna zana naŋhaya ceɗ ceɗ le, yo a tiri le, naŋ ti dili, hã pastaˀa.

41«Gwatay majam suɓulak ngisi ruwuy gar na, i mitikahay le ngi zumo. 42Gwat tayna majam suɓulak a ruwuy gar, makurmuɗom ti kwacay, maram ti sar taŋhay mufaɗ malla ti saray mbeˀ mbeˀ gar na, ki zumaka taŋ ta, asi i mitikahay le ngi zumo. 43Gwatay majam suɓulak asi ruwuyo, ki dukoko taŋ ta, vur taŋ macam ti kum ar dili, yo ki pulaka taŋ a dukukum ta ndiɗaˀ, vur taŋ macam ti kum ar dili. 44Asi Bumbulvuŋ, Buymisemuŋ kumo i ya. Gam gwat kaɓa mizli muvuku vu taŋ, asi ya, ya pal. Gwatay mikirnini ngisi ruwuy hana na, ki jaka haŋ avu taŋ ta, vur kum macam ar dili ti haŋ kumo. 45Asi mubo ti kum ti ruwuy Ezipte i ya Bumbulvuŋ, ɓa yi tiri Buymisemuŋ kum. Sey so na, ndiram kum pal, asi ya, ya pal.»

46Ginewey, ɗiyuwoy ati gwat misi titirihey mingweɗeŋ ngweɗeŋ ngisi yamay, yo majam suɓulak asi ruwuy gar na, gwat mudubunahay vur ɓi taŋ i hana. 47Gwat mudubunahay na, ɓa ngi sli wala ngi gwat misi dili ati gwat manja dili, yo ngi sli wala ngi gwat misãmi ngi zumoy ati ngi zumoy ta.

Currently Selected:

LEVIHEY 11: BEGDC

Highlight

Copy

Compare