ZOZUWE Ɓi madiɗa madiɗa ngi raˀa
Ɓi madiɗa madiɗa ngi raˀa
Ɗerewol Zozuwe ara ɓa ndra ɓi ngi sukwi Irsrayeley muzumka hirwuy Kana’a, yo taŋ mipam anga, muru ti taŋ ng’ara i Zozuwe mici ar li ngi Moyis. I lumam ɓi madiɗahay wal wal makir ar ɗerewol misenna: -Taŋ mitiɓaka hirwuy Kanaˀa (sap. 1-12); -Taŋ muwuɗkaka hirwuy Kanaˀa (sap 13-21); -Hin ngi siifa ngi Zozuwe mikiɗ mi (Sap. 22-24). Bumbulvuŋ miɓa dideˀ ngi Israyeley zleˀe ɗaˀ le, yo naŋ mimahiri ngi ɓa ɓi nah da Moyis na, a ga gwat nah le ti naŋ muvula taŋ hirwuy na. Ɓi ngi ngiɓi’ay ar wala ngi Bumbulvuŋ ati Israyeley, yo Israyeley mitiɓaka hirwuy Kanaˀa na, ɓi nah a bam vu le ati ɓi ngi bo ti Ezipte. Taŋ mubam vu ati ɓi ngi bo ti Ezipte na, mibiga i Bumbulvuŋ makiɗ vu asi mizli naŋhay, naŋ maga ɓa a bam ti jiŋ waɗ ɓa a lumam bugawla. Hirwuy mutuɓka le si ati misi mindir manja tiɓi na, wuɗuk naŋ ati vul naŋ da sukwi ngi mizli a biga le, i gwat Bumbulvuŋ hĩhĩy, ɓa ŋgi pula jiviɗ da Israyeley a ngiram, mbele li mitiri inga taŋ. I wuluk nah maga, anja a zlir le ngi slufa ɓi ngi li mekelemey misi angi sapiter ngi ɗerewol hana na, (kaɓa ani sap 13, 15 ati 16). Ɓi ngi tiɓi hirwuy Kanaˀa ati wuɗuk naŋ gar na, ɗerewol Zozuwe ara ma ndra hiri ngi ɓa ndra ɓi ngi Bumbulvuŋ migi teŋteŋ ar ɓi naŋ miɓa taŋ ɗaˀ le, yo a wuɗ anja mizli naŋhay a vulaka vu taŋ vurˀe. Israyeley mipam a wuzla mulakay, misinaka Bumbulvuŋ ta na, i ɓi nawaya ngi so taŋ ti gi teŋteŋ ta ma. Vurˀe, ar kus madiɗa migaka a Sikem, ɗerewol hana mikiɗ mi ti ɓi nah na (sap 24), ar ɓi ngi taŋ vula aseˀe na, Zozuwe a ga, ɓa a maka hiri ngi jumoˀaya, a ndir i ɓi madiɗa ŋwaˀ. Mizli Israyeley a wunam ɓa a gam mezegwele da Bumbulvuŋ. Wurenna jiviɗ ngi ɓi ngi Israyeley ati ngi hirwuy taŋ, a tiri le tororo haɗa, ɓa hirwuy a ndir da taŋ na, ɓi ada anga, yo ma na, mizli Israyeley muwunam nga taŋ i Bumbulvuŋ na, sey ngi ma taŋ hiri ngi gwat naŋ mawuɗ hirdam hirdam avu taŋ ndrehhe.
Currently Selected:
ZOZUWE Ɓi madiɗa madiɗa ngi raˀa: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.