Zaŋ 21
21
Yesu mibiga vu da mizli ngi seˀehey tarnaˀ
1A dirba nah, Yesu a biga vu da mizli ngi seˀehey a miyam madiɗa ngi Tiberiya ma. Ɓi nah a gi anihĩ: 2Simoŋ Piyer, Tomas mazilaka Misa, Natanayel ngi Kana, hirwuy Galile, ziri ngi Zebedehey waɗ mizli ngisi Yesu mekelemey cuw, taŋ bumoˀ. 3Simoŋ Piyer a ɓa taŋ: «I ru nga ji kilifi.» Mekelemey tuwa a ɓakaŋ: «Akum bumoˀ.» Dar a bam, a cam palalam. Amma ngi duvuɗ nah na, ko a lumam kilif pal ta. 4Yesu a bugo vu deŋ a miyam akẽh, naɓa li a wun le si, amma i Yesu na, mizli ngi seˀehey tuwa a si na ka ta 5Dar Yesu a ɓa taŋ: «Gawlahay, ki jam kilife le neˀ kwa?» A mbiɗakaŋ di: «I jam ta.» 6A ɓa taŋ: «Hizigaka zuva tir vay hazum ngi palalama, ɓa kisa lumam.» Joˀ a hizigaka zuva tuwa, a nih mbaf ti kilife, hã a ɗiɗoko di tisi yama gu mata. 7Dar mbur Yesu mawuɗaŋ zleˀe tuwa a ɓa Piyere: «I Buy Yesu!» Simoŋ Piyer micina i Buy Yesu na, a juwa zana hirlak, vur a cuko zana le zleˀe, a diɗ griv ng'ar yama. 8Mizli ngi si Yesu mekelemey a soko ti palalama, a ɗiɗoko zuva mimbaf ti kilif tuwa a haŋ. Taŋ zleˀe kileŋ avu mibuzugumo, a gi gwat ngi metir skata. 9Taŋ mupoko sar tir palalama na, a puram vu hilɓiɓ ti kilif ɓaˀ araŋ waɗ ɗaf. 10Yesu a ɓa taŋ: «Soko ti kilif kum mujoko di wurenna na so.» 11Joˀ Simoŋ Piyer a ci ng'ar palalama, a ɗiɗo zuva mimbaf ti kilife nga ruwuy, kilif madiɗahay anga skat ti kukur zlum ngaˀ makir. Kilif ara haɗa ngbaŋ, amma ko zuva a ngir ta. 12Yesu a ɓa taŋ: «Soko, zumam.» Ko mbur pal a wuzla taŋ mutum vu ɓa a cufuɗaŋ: «I ka waka?» na, anta. Asi a sinaka le i Buy Yesu. 13Dar Yesu a so zuɓa ɗaf tuwa, a vula taŋ di, a vula taŋ kilife ma. 14Hana i sar mimakir naŋ, Yesu mibiga vu da mizli ngi seˀeheye, zle ti naŋ mislikiɗ ti wuzla mumucahaya.
Yesu ati Piyer
15A dirba zuma ɗafa, Yesu a ɓa Simoŋ Piyere: «Simoŋ, mangal ngi Zaŋ, k'ada wuɗiy fineˀ mizli tayna kwa?» A mbiɗaŋ di: «Kanah Buy, ki si na le, i ra wuɗuw.» Dar Yesu a ɓaŋ: «Jigina zir tumuŋ ɗuwoy.» 16Yesu a ɓaŋ sar mucuw naŋ ma: «Simoŋ, mangal ngi Zaŋ, k'ada wuɗiy kwa?» A mbiɗaŋ di: «Kanah Buy, ki si na le, i ra wuɗuw.» Yesu a ɓaŋ: «Jigina tumuŋ ɗuwoy.» 17A ɓaŋ sar mimakir naŋ ma: «Simoŋ, mangal ngi Zaŋ, k'ada wuɗiy kwa?» Yesu miɓa Piyere sar mimakir naŋ: «Kˀada wuɗiy kwa?» na, a gaŋ kuy ta, a slaŋ di, a ɓaŋ: «Buy, ki si na gwataya le gar, ki si na le, i ra wuɗuw ngbaŋ!» Joˀ Yesu a ɓaŋ: «Jigina tumuŋ ɗuwoy. 18Gisiŋ gisiŋ, yi ɓuw na: ti ka misi ti gawla ɗik zleˀe na, i ka majuwa kanda ɗike ti haŋ ɗike, yo ki ru ar li ka muwuɗ le gar. Amma ti ka misa gi midigila le na, kisa pula haŋ mbak mbaka, i mbur mekelem masa juwuw kanda, yo asa ru ti ka ar li ka mawuɗ ru anga ta.» 19Yesu miɓi kahana na, ɓa ngi biga muc ngi Piyer masa muc ngi ga dudok da Buymisemuŋ. A dirba mingiɓi hana, a ɓaŋ ma: «Sipiy.»
Yesu ati mbur naŋ mawuɗaŋ
20Piyer a mbiɗi hiri, a pura mbur Yesu mawuɗaŋ zleˀe tuwa, ara supo taŋ. I mbur muguɓ ng'avi Yesu ti taŋ mazumam ɗaf zleˀe, mucufuɗaŋ: «Buy, masa vuluw ɓa a jukuw i waka» tuwa. 21Piyer mupura na, a ɓa Yesu: «Buy, mbur hana, masa gi ava i mike?» 22Yesu a mbiɗaŋ di: «Da ko yi wuɗ le ɓa a ndir ti siifa hã ti ya masa mawa tekeɗe kwana, a cuw ka le kwa? Ka, ka sipiy!» 23Zle avu mingiɓi hana, mitiɓihey a ɓam ar wala taŋ: «Mbur ngisi Yesu nah na, anta sa muc ta.» Dambalaka mbur nah anta sa muc ta na, Yesu a ɓa Piyere kine ta, amma a ɓi: «Da yi wuɗ le ɓa a ndir ti siifa hã ti ya masa mawa tekeɗe kwana, a cuw ka le kwa» kini ngbaŋ.
24Miga sedewo ngi ɓi hana, yo mutoho na, i mbur ngisi Yesu nah vuna. Yo i sinaka le, sedewo nah, naŋ kaslsla.
Kiɗa mi naŋ
25Yesu a gi gwat mekelemey le wal wal haɗa. Da a tohoko taŋ le purla purla gar zleˀe na, yi wa, ko angi duniya kurzluˀ gar kwana, li ngi pi ɗerewol tayna, anta.
Currently Selected:
Zaŋ 21: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.