Zaŋ 17
17
Yesu midir dibiɗ vur mizli ngi seˀehey
1Yesu, a dirba naŋ miɓi kahana na, a zuɓa hiri nga muŋ, a ɓi: «Baha, pas a ndila le, ga dudok da Mangal ɗike, ɓa Mangal ɗik a guw dudok aya, 2yo ɓa a vula siifa ngi sete da mizli, ka muvulaŋ taŋ gar na, kaɓa ka muvulaŋ madiɗa a hirnga mizli titirahay gar. 3Da mizli a sinukuw le, Buymisemuŋ mijeŋŋe pal i ka, yo Yesu Kristu, mbur ka mislino di na, da a sinaka le na, naɓa siifa ngi sete i nah. 4I guw dudok le asi ruwuyo, yo slra ka muvuliy di ngi gi na, i kiɗa mi nah le. 5Wurenna so na, Baha, giy dudok a ciki ɗike, dudok ya misi ti naŋ a ciki ɗik zleˀe, dumbuŋ angi duniya muɗuv virzi t'aruŋ. 6Mizli ka mubo ti taŋ tir duniya, ka muvuliy taŋ na, yi biga taŋ slimiɗ ɗike le. Taŋ i ngi ɗikey, ki vuliy taŋ le, a jaka mingiɓi ɗike le a hirnga. 7Wurenna a sinaka le, gwat ka muvuliy di gar na, a so ti vu ka. 8Yo mingiɓi ya miɓa taŋ di gar na, a bo ti vu ka. A tiɓaka le, a sinaka le gisiŋ gisiŋ, yi bo ti vu ka. A tiɓaka le, i ka mislino ya.
9Ya madir dibiɗ na, vur taŋ. Y'anta dir vur duniya ta, amma yi dir vur mizli ka muvuliy taŋ na, asi i ngi ɗikey. 10Gwat ɗu gar na, i ngi ɗiki, yo gwat ɗik gar kwana, inga ya aya. Ya mulum dudok na, vur taŋ. 11Zle dana, y'anta ar duniya mata, taŋ a ndiram ar duniya ɓula, amma ya i ra ru ng'avi ka. Baha mipal, jigina taŋ ti gidaŋ ngi slimiɗ ɗik ka miciy di na, ɓa a tiram purla kaɓa ndra mupurla ati ka na ya. 12Ti ya misi zleˀe ati taŋ na, yi jigina taŋ le ti gidaŋ ngi slimiɗ ɗik ka miciy di na. Yi cik vu le angi taŋ, ko mbur pal mizizi asi taŋ, anta, sey mbur mihĩˀĩ ngi zizi na, ɓa Ɓimutohoko a gi muduba. 13Wurenna, i ra ru ng'avi ka. Ya maɓa ɓi hana na, ti ya misi ar duniya aruŋ, ɓa a lumaka mumul ɗu wãˀ a mevel taŋ. 14Yi ɓa taŋ mingiɓi ɗike le, yo duniya a gi mesene le ti taŋ, asi taŋ i ngi duniyahay ta, kaɓa ya misi yi ngi duniya ta na ya. 15Y'anta tumbuluw ɓa ki hila taŋ tir duniya ta, amma ɓa ki jigina taŋ avu Malambaˀvu na. 16Taŋ i ngi duniyahay ta, kaɓa ya misi yi ngi duniya ta na ya. 17Mingiɓi ɗike naŋ kaslsla. Tiri ti taŋ ngi ɗikey wãˀ ti mingiɓi ɗik mikaslsla na. 18Yi slina taŋ ng'ar duniya, kaɓa ka mislino ya ng'ar duniya na ya. 19Yo i ra vula hirnga ɗu ti haŋ ɗu vur taŋ, ɓa a tiram ngi ɗikey wãˀ ti mingiɓi ɗik mikaslsla.
20«I dir dibiɗ vur taŋ pal ta, amma vur mizli masa tiɓikiy mbele mingiɓi taŋ na ya. 21Anja taŋ gar a tiram purla kaɓa ka Baha, ka mujom ati ya, ya kwana, ya mujom ati ka na ya. Anja taŋ kwana, a ndiram jom ati ndra ya, ɓa duniya a tiɓa i ka mislino ya. 22Ya kwana, dudok ka muvuliy di na, yi vula taŋ di le ya, ɓa a tiram purla ka ndra mupurla ati ka na ya. 23Ya, ya jom ati taŋ, ka kwana, ka jom ati ya, ɓa a ndilaka jum mupurla wãˀ na, ɓa duniya a sina, i ka mislino ya, yo ki wuɗa taŋ le kaɓa ka muwuɗiy na ya. 24Baha, mizli ka muvuliy taŋ na, yi wuɗ ɓa taŋ kwana, a ndiram ati ya ar li ya misi anga na ya, ɓa a singilaka dudok ka muvuliy di na, asi ki wuɗ ya le zle ti duniya mizli virzi t'aruŋ. 25Baha mijeŋŋe, duniya a sinuw ta, amma ya i sinuw le. Taŋ hanayna, a sinaka le, i ka mislino ya. 26Yi biga taŋ slimiɗ ɗike le. I sa biga taŋ di ava ma, ɓa wuɗavu ɗik, ka mawuɗiy na, a ndir a hur taŋ, yo ya kwana a hur taŋ ma.»
Currently Selected:
Zaŋ 17: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.