Zaŋ 15
15
Yesu i gudubun migisiŋ gisiŋ naŋ
1«Yesu a ɓa mizli ngi seˀeheye: «yi gudubun migisiŋ gisiŋ naŋ, yo Baha i muhuf naŋ. 2Mihaŋ mikaˀ avu ya mayi ta gar na, a sa nguma avra. Amma mihaŋ mayi gar na, a sa kilaha, ɓa a yi haɗa ti vendeke ma. 3Kumo, mingiɓi ya muɓukum di na, a ɗiyukum le kuy kuy si. 4Ndiram jom ati ya, ka ya mujom ati kum na ya. Mihaŋ ngi gudubun a yi pal naŋ gu ta, sey da naŋ da kaˀ avu madiya naŋ far. Kumo kwana, kanah ya, da kum anta jom ati ya ta na, ki yam gu ta. 5Yi gudubun, kum i mihaŋhay. Mbur mandir jom ati ya, ya kwana jom ati naŋ na, a sa yi locok locok haɗa. Mbele ya ta na, kum anta gam gwat ko neˀ gu ta. 6Da mburo, naŋ anta jom ati ya ta na, kite i mihiziga le avra, kaɓa mihaŋ ngi gudubun mihizigaka le, dar a muˀul, a dirba nah, a hilaka, a paka ng'ar vu, a wur. 7Da kum ada jom ati ya, yo mingiɓi ɗu kwana, naŋ da hur a kumo na, kum misa cufuɗam gwat kum mawuɗam le gar na, kisa lumam. 8Da ki ra yam locok locok haɗa, yo kum ada i mizli ngi si yahay na, a vula dudok da Baha. 9Yi wuɗukum le kaɓa Baha mawuɗiy na ya. Ndiram jom ar wuɗavu ɗu. 10Ɓimuɗuva ɗuwoyo, da ki ra jaka a hirnga na, naɓa kisa ndiram jom ar wuɗavu ɗu, kaɓa ya mija ɓimuɗuva ngi Baha a hirnga, yo ya misi ada jom ar wuɗavu naŋ na ya.
11«Ya muɓukum ɓi misenna na, ɓa mumul ɗu a ndir a hur kumo, yo ɓa ki mumulom mumul minjah wãˀ. 12Ɓimuɗuva ɗu anihĩ: wuɗam vu ar wala kumo, kaɓa ya muwuɗ kum na ya. 13Da mbur muvula hirnga naŋ le vur ngama naŋhay na, wuɗavu mifineˀ hana anta mata. 14Gwat ya maɓukum di ɗaˀ le na, da ki ra gaka na, naɓa kum i ngama ɗuwoy. 15Y'anta zulukum gawla ɗuwoy mata, asi gawla ngi mburo, gwat buy naŋ maga na, naŋ anta si na ta. Amma yi zulukum ngama ɗuwoy, asi mingiɓi ya micino di avu Baha gar na, yi ɓukum di le. 16I kum miwinikiy ta, amma i ya muwunukum. Yi slinukum ɓa ki ram, ki ra yam zingaˀa, zingaˀ mazik haɗa. Naŋ kine, gwat gar kum misa cufuɗam le avu Baha ti slimiɗ ɗu na, a sa vulukum di. 17Ɓimuɗuva ya ɓukum di na, i wuɗavu ar wala kum.
Duniya magi mesene ti Yesu ati mizli naŋhaya
18«Da duniya ara gi mesene ti kum na, sinaka sin le, naɓa a gi mesene le ti ya dumbuŋ. 19Da kum i ngi duniyahay zleˀe na, anja duniya a wuɗ kum le, asi kum inga naŋhay. Amma kum i ngi duniyahay ta, i ya mupukum sek pal avu duniya, puraka duniya magi mesene ti kum na aseˀeŋ. 20Wulkaka ɓi ya muɓukum di zleˀe na: ‹Gawla a funa buy naŋ ta.› Da a sipikiy ya le nder nder na, a sa supukum kumo nder nder aya. Da a jaka mingiɓi ɗu le a hirnga na, a sa jaka mingiɓi kum a hirnga ya. 21Amma a sa gukum gwat hana gar na, asi slimiɗ ɗu, asi a sinaka mbur mislino ya ta. 22Da yi so zleˀe ta, yo da yi ɓa taŋ ɗaˀ le zleˀe ta na, anja mungra anta avu taŋ ta. Amma wurenna, mungra taŋ anta pul teˀe ta. 23Mbur magi mesene ti ya na, a gi di i mesene ti Baha. 24Slra tayna, ya miga taŋ a wuzla taŋ na, da i slra misi mbur miga taŋ ɗaˀ zleˀe ta na, anja mungra anta avu taŋ ta. Amma wurenna, a puraka le ngbaŋ, na kwana, ara gam mesene ti ndra ati Baha ɓula na si. 25A gam mesene ti ndra na, ɓa ɓi mutohoko angi ɓimujuwa taŋ na, a gi muduba: ‹A gam mesene ti ya gbiŋ ngatara kine›.
26Mijiniˀis, ˀUf mijeŋŋe, ya masa slinukum di baɗ avu Baha na, da naŋ misa so le na, i naŋ vuna masa ga sedewo ɗu. 27Yo kumo kwana, kisa gaka sedewo ɗu ya, vur kum ada ati ya zle angi zlivirzi naŋ.»
Currently Selected:
Zaŋ 15: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.