Zaŋ 11
11
Lazar mumucu
1Mbur ada, i misi jiji, a zilaka Lazar ar walahay Betani. Mariya ati sukum naŋ Marta, taŋ ar walahay nah vuna. 2I Mariya mipa urdi da sar ngi Buy Yesu, yo naŋ mutukuɗaŋ di ti himac hirnga zleˀe tuwa. Lazar misi jiji na, i sukum naŋ. 3Sukum naŋ tayna a slinam ng'avi Yesu, ɓa a ɓakaŋ: «Buy, yeme ɗike naŋ gu ta.»
4Yesu micina labara nah cin si na, a ɓi: «Anta sa muc ti jiji nah ta, amma i jiji ngi sa biga dudok ngi Buymisemuŋ, mizli a sa gaka dudok da Mangal ngi Bumbulvuŋ aseˀeŋ.»
5Yesu a wuɗ Marta ati Mariya waɗ Lazara. 6Na, a si na le, Lazara naŋ gu ta ngbaŋ, amma a zik hin cuw angi li naŋ misi anga tuwa ma. 7A dirba nah so na, a sa ɓa mizli ngi seˀeheye: «Mukum nga hirwuy Yude.»
8Mizli ngi seˀehey a ɓakaŋ: «Kumani, wureˀ ani aka, Yudehey a supukuw ɓa a kuyupukuw ti ɗugur. Ani ki wuɗ ki mi nga diga ma mbrike?»
9Yesu mbiɗa taŋ di: «Hiipasa, a wuɗuk taˀ taˀ kuruˀ nga cuw ta kwa? Mbur maru digi ti papas na, anta ru tiɗam tiɗam ta, asi ara pura li minjahha ngir duniya hana. 10Amma da mbur ara ru digi ti duvuɗ na, aru tiɗam tiɗam ɓula, asi li minjahha anta a hur naŋ ta.»
11A dirba Yesu miɓa ɓi hana na, a ɓi ma: «Ngama ndra Lazar a hinje le, amma i ra ru nga puɗukaŋ.»
12Joˀ mizli ngi seˀehey a ɓakaŋ: «Buy, da a hinje ti hinje na, a sa mbul.»
13Dambalaka Yesu a wuɗ a ɓi di i ɓi ngi muc ngi Lazar, amma mizli ngi seˀehey a waka kaɓa a ɓi di i ɓi ngi hinje tewle si. 14Joˀ Yesu a ɓa taŋ di njah so: «Lazar a muc le. 15Yo i ra mumul vur kum, asi ya misi anta a diga ta na, ɓa ki tiɓikiy. Amma wurenna akum ng'avaŋ.»
16Dar Tomas mazilaka «Misa» a ɓa mizli ngi si Yesu mekelemeye na: «Ndra kwana, akum aya, ɓa i micam bumoˀ ati naŋ.»
Yesu i mislikiɗa mumucahay, yo i siifa
17Ti Yesu mindil a Betani na, a luuma Lazara a caka le a ruwuy, a gi le hin mufaɗ si. 18Betani naŋ gweˀ avu Zeruzaleme, a ndila kilometir makire ta. 19Yudehey haɗa a soko ng'avi ti Marta ati Mariya, ɓa a tikinaka taŋ ar li tuwuy sukum taŋ mumuc na. 20Marta micina Yesu ara ndilawa na, ara ji di hirngaŋ. Amma Mariya a ro a hay. 21Marta a ɓa Yesu: «Buy, da k'ada aka zleˀe na, anja ani sukum ɗu na muc ta. 22Amma yi si na le, ko wurenna kwana, Buymisemuŋ a sa vuluw gwat gar ka mucufuɗ le ava.»
23Yesu a ɓaŋ: «Sukum ɗik a sa mo ti siifa a muŋ.»
24Marta a mbiɗaŋ di: «Yi si na le, tapas mizli mumucahay masa slikiɗam angi hin ngi dirba na, a sa mo ti siifa a muŋ.»
25Yesu a ɓaŋ: «Maslikiɗ mbur mumuca i ya, yo siifa i ya. Mbur matiɓiy na, ko da a muc le kwana, a sa ndir ti siifa. 26Yo ko wa gar misi ti siifa, da ara tiɓiy na, naŋ anta sa muc ta ndiɗaˀ. Ki tiɓa ɓi hana le kwa?»
27Marta a mbiɗa da Yesu: «Haˀaw, Buy! Yi tiɓa le, ki Mesi, ki Mangal ngi Buymisemuŋ masawa ar duniya tuwa.»
Yesu mutuwuy
28A dirba nah na, Marta a ru, ara zilo sukum naŋ Mariya, a ɓaŋ ti miyaŋ yaŋ: «Kumani a so le, ara ziluw.»
29Mariya micina si na, a slikiɗ kutum, aru ng'avi Yesu. 30Naɓa Yesu a walahaya t'aruŋ, a ro ar li Marta miji di hirnga tuwa. 31Yudehey a roko hay ati Mariya, ara tikinakaŋ ɓa a taˀa tuwuyo. Taŋ mupuraka naŋ mislikiɗ kutum, ara bi tuwa na, a sipakaŋ. Taŋ a waka kaɓa aru nga tuwuy a mizivi. 32Mariya mindil ar li Yesu misi anga tuwa, naŋ mupura Yesu keɗ na, a hin kuɓ asi sar naŋ, a ɓaŋ: «Buy, da k'ada zleˀe aka na, anja ani sukum ɗu na a muc ta.»
33Yesu mupura Mariya ati Yudehey musoko aseˀe tuwa matuwam na, a jijik, a gaŋ lesle welele. 34A ɓa taŋ: «Ki kaka amaka?» A mbiɗakaŋ di: «Buy, so puraŋ.»
35Dar Yesu a tuwuy. 36Yudehey a ɓam: «Puraka, a wuɗaŋ zleˀe haɗi!»
37Amma mekelemey a ɓam: «Naŋ muwuna hiri ngi dangar tuwa na, a tika muc ngi Lazara gu mata mbrike?»
Yesu mumo ti siifa ngi Lazar
38Ar nah na, a ga Yesu welele a mevele ma, aru nga mizivi. I buutum midislaka mi naŋ ti ɗugur. 39Dar Yesu a ɓi: «Kirahaka ɗugur avra.» Marta, sukum ngi vagay Lazar a ɓaŋ: «Buy, zliv ara zĩˀĩ si, vur i hin mumufaɗ naŋ.»
40Amma Yesu a mbiɗaŋ di: «Yi ɓuw le, da ki tiɓiy le na, kisa pura dudok ngi Buymisemuŋ kini ta kwa?»
41A kirahaka ɗugur tuwa avra so. Dar Yesu a zuɓa hiri nga muŋ, a ɓi: «Aw Baha, i guw sise vur ka mitiɓa mi ɗu na. 42Yi si na le, ki ra tiɓa mi ɗu ndrehhe. Amma yi ɓi asi zigiduw mugun hirnga ɗu hana, ɓa a tiɓaka i ka mislino ya.»
43A dirba naŋ miɓi kahana na, a til mi ti gidaŋ, a ɓi: «Lazar, bawa!»
44Joˀ mbur mumuca tuwa, a bawa, saray ati haŋhaya vah vah ti gabaga, waɗ hiri mbizeˀ mbizeˀ ti zana. Yesu a ɓa mizli: «Puskakaŋ, pulaka a ru.»
Gidiɓi ngi ji Yesu
(Yo pura Mat 26.1-5; Mark 14.1-2; Luk 22.1-2)
45Mizli haɗa a wuzla Yude tayna musoko avu Mariya, yo mupuraka gwat Yesu miga na, a tiɓaka Yesu le. 46Amma mekelemey a wuzla taŋ a ram ng'avi Farisahay, a slufaka taŋ ɓi ngi gwat Yesu miga na. 47Dar masay madiɗahay ati Farisahay a kusom ngi ngila wuy, a ɓam: «I gam mbrike? Ani mbur nah ara gi cekenehey haɗa. 48Da i pulaka le mbak a gi si na, mizli gar a sa tiɓakaŋ, yo romahay a sa coko, a sa hiryaka li ndra mipala, waɗ a sa hiryaka sukwi ndra!
49Mbur pal a wuzla taŋ, a zilaka Kayif, angi vi nah na, naŋ i masay madiɗa a mbuŋ Buymisemuŋ, a ɓa taŋ: «Kum anta slaka wala ngi ɓi ko neˀ ta! 50Zuwen mbur purla mamuc vur mizli gar, a funa zigiduw taˀ mazizi na le na, ki slaka wala nah ta wãˀ mbrike?»
51Naŋ miɓi kahana na, i mingiɓi ngi hirnga naŋ ta, amma asi naŋ i masay madiɗa a mbuŋ Buymisemuŋ angi vi nah, naŋ miɓi a zlir le ɓa Yesu a muc vur sukwi Yudehey na, a ɓi di i ɓi ngi mijiviɗi. 52Anta muc vur Yudehey tew ta ma, amma ɓa ngi kuso ziri ngi Buymisemuŋhoy mizliɗam hirnga gar, ɓa a tiram purla. 53Mizli madiɗahay majuwaka a mevel taŋ, ɓa a zizaka Yesu na, i ngi pas nah vuna. 54Yesu kwana, naŋ anta liˀi bidas a wuzla Yudeheye mata. Aru ng'ar li migweˀ avu wuzlaɓuh, ar walahay mazilaka Efrayim, a cifam ati mizli ngi seˀehey a diga.
55Naɓa muguzlum Pak ngi Yudeheye naŋ gweˀe. Ɓa li wun i muguzlum Pak nah vuna na, mizli ngir prokoy haɗa a ram nga buna vu taŋ a Zeruzalem. 56A ra sipaka Yesu, a cufuɗam vu ar hay Bumbulvuŋ, taŋ misi anga vuna: «Ki wulkam mbrike? N'anta sa sawa ar muguzlumo ta wãˀ kwa?»
57Masay madiɗahay ati Farisahay a ɓaka mizli na: «Da mbur misina li naŋ misi anga na le na, sey a njika ɓa a jakaŋ.»
Currently Selected:
Zaŋ 11: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.