EZEKIYEL 46

Ɓi mihĩˀĩ ɓa buy a sipaŋ

1Ya Bumbulvuŋ Buymisemuŋ i ɓi na: Mizlingre ngi ci nga wazlaray ngi huroˀo, mupulaˀ ngir tisi pas ngi miprik na, a sa ndir giceˀe ti hin mimerkeɗ ngi slrahay na. A sa wunaka tapas sabat, yo waɗ ti kiya weɗeɗ ma. 2Buy masa so ti mamay na, a sa co tir jawleeru ngi mizlingre, waɗ a sa cici zlumbaˀ ti dum ngi miviŋ. Akẽh na, masayay a sa gaka mikuli ngi buyo, mikuli ngi zlum ti zlum ati mikuli ngi ngiɓiˀay. Buy tuwa a sa huruk huruk dilak ar li ɗuva sar ngi miviŋ, a bi, amma miviŋ naŋ da baŋŋa hã pastaˀa. 3Tapas sabat ati kiya weɗeɗ na, mizli ngir walahayay a sa huruk hurukam a mizlingre a mbuŋ ya Bumbulvuŋ. 4Mikuli ngi zlum ti zlum, buy masa giy di da ya Bumbulvuŋ tapas sabat na, a sa ga ti ziri tumuŋhoy merkeɗ, manja hereweɗ avu taŋ, waɗ zlengerek purla, manja hereweɗ ava. 5Vur zlengerek gar na, a sa vul hapa aseˀe agwada purla, yo vur ziri tumuŋhoyo, a sa vul hapa weˀe avu naŋ muwuɗ le. Vur hapa agwada gar na, a sa vul mal aseˀe litir merkeɗ merkeɗe. 6Ti hin ngi kiya muslo le weɗeɗ na, a sa ga mikuli ti gusoŋ manja hereweɗ ava, ti ziri tumuŋhoy merkeɗ waɗ zlengerek purla, manja hereweɗ avu taŋ gar taŋ. 7Buy a sa vul hapa agwada purla vur gusoŋ gara ma, yo agwada purla vur zlengereke. Amma vur ziri tumuŋhoy na, a sa vul hapa avu gidaŋ naŋ si ɓula. Vur hapa agwada purla gar na, a sa vul aseˀe mal litir merkeɗ merkeɗe. 8Buyo, da naŋ mira ci na, a ci tir jawleeru ngi mizlingre, yo a sa bi tir jiviɗ mupurla nah vuna ma. 9Ti hin ngi muguzlum madiɗa, da mizli ngir walahay ara soko nga huruk huruk a mbuŋ ɗu na, a sa cam tir mizlingre vay muŋ, a sa bam tir mizlingre vay ngi ruwuy, yo mizli masa coko tir mizlingre vay ngi ruwuy na, a sa bam tir mizlingre vay muŋ. Mizlingre mucoko le ti raˀa na, anta sa bam ti raˀa mata, sey a bam tir mizlingre mupuɗak ar cala. 10Buyo, da mizli mira cam na, a cam bumoˀ, yo da taŋ mira bam na, a bam bumoˀ ma.

Ɓi ngi sipi vur mikuli wal wal

11Ti hin ngi zuɓa mulak vur ya Bumbulvuŋ waɗ vur muguzlumoyo, buy a sa vul hapa asi gusoŋ, yo asi zlengerek gar na, agwada purla purla, amma vur ziri tumuŋhoyo, a sa vul hapa avu gidaŋ naŋ si ɓula. Vur hapa agwada purla gar na, a vul mal aseˀe litir merkeɗ merkeɗe. 12Buyo, da ara ga mikuli ngi mongoy naŋ da Bumbulvuŋ, i mikuli ngi zlum ti zlum malla mikuli ngi jumoˀay na, a sa wunakaŋ mizlingre mupulaˀ hiri ngir tisi pas ngi miprik tuwaˀ, a sa ga mikuli naŋhaya, kaɓa naŋ maga tapas sabat tuwa. A dirba nah, a bi, naŋ mibi le put si na, a gicaka mizlingre giceˀ a muŋ si. 13Vur hin gar na, a sa giy mikuli ngi zlum ti zlum da ya Bumbulvuŋ ti zuŋ tumuŋ manja hereweɗ ava ngi vi purla. A sa ga vur miprik gar. 14Vur hin gar na, a sa vul kilo zlum waɗ mal litir cuw ngi fukuɗa hapa. Hana i gwat ngi vul ngi mikuli da ya Bumbulvuŋ, i ɓimuɗuva mandir caˀa kine. 15Vur miprik gar na, a sa gam mikuli ngi zlum ti zlumo ti zlengerek waɗ ti mal, hã caˀa kine.»

Mangal ngi buy mazuma hay ngi cine

16Ya Bumbulvuŋ Buymisemuŋ i ɓi na: «Buyo, da naŋ muvula gwat le da mbur purla asi ziri naŋ mizilehey na, gwat nah a sa ndir da mangala wãˀ, kaɓa a zum di i hay. Yo mangala kwana, gwat tuwa a sa ndir da ziri naŋhaya wãˀ, kaɓa a zumam di i hay. A sipi caˀa kine. 17Buyo, da a vula gwat le da mbur purla asi gawla naŋhay na, gwat naŋ muvulaŋ di, naŋ muzuɓa paɗ tir gwat nga naŋ na, a sa ndir da gawla naŋ na, hã angi vi ngi luuma hirnga naŋ, akẽh na, a sa mo ng'asi haŋ ngi buy a muŋ. Sey gwat muvula le da ziri mizile ngi buyoy na, a sa ndir i gwat taŋ wãˀ ɓula. 18Mizli Israyeleye, gwat taŋ mulumaka kaɓa ngi zuma hay na, anja buy a tiɓa taŋ di ta. Naŋ masa vul da ziri naŋ mizilehey, kaɓa a zumam di i hay na, a sa vula avu gwat nga naŋ. Kanah na, naɓa Israyel, mizli ɗuwoyo ko mbur loŋ masa ɓulakaŋ kileŋ avu gwat naŋ anta.»

Hudul ngir hay ngi Bumbulvuŋhoy

19Mbur tuwa a ci ti ya ng'avi viŋ muvuku vu taŋ tir li ci ngi ciki mizlingre, mikini tir vay muŋ. Viŋ tayna taŋ hĩˀĩ vur masayay. Ngasi li a diga na, li ada ngir kini tisi pas ngi pastaˀa. 20A ɓiy na: «Hana i li ngi masayay masa da ka useˀ ngi ginew mikiɗahay ngi gi mikuli ngi pula mungra, yo a sa da ka gwat ngi zum ti zumoy anga ma. Kanah na, vur taŋ masa bam di nga wazlaray vay ngi vra, yo vur mizli masa jaka haŋ avu gwat muvuku vu taŋ na.»

21A bi ti ya nga wazlaray ngi vra, a cuh ti ya gweˀ avu zlirɗiy mumufaɗ ngi wazlarayaya. Angi zliɗiy gar na, li ada firndiwey. 22Angi zlirɗiy mumufaɗ ngi wazlarayaya, li mifirndiwey tuwa taŋ meciɗek meciɗeke. Jek naŋ: metir kukur cuw, yo sliprik naŋ: metir kuruˀ nga zlum. Jek ati sliprik ngi li mifirndiw mumufaɗ tayna i misi purlahay. 23Taŋ mufaɗ taŋ gar, gun gun ti mohol, waɗ li di gwatay ɗiyeˀ ɗiyeˀ, zlumbaˀ zlumbaˀ da moholo, gun gun zlar. 24Mbur tuwa a ɓiy na: «Hanayna i huduloy, useˀ mizli Israyeley magam di mikuli na, gawla ngir hay hanayna a sa da ka anga.»

Currently Selected:

EZEKIYEL 46: BEGDC

Highlight

Copy

Compare