EZEKIYEL 30

Bumbulvuŋ masa vunaha mevele ng'ar Ezipte

1Bumbulvuŋ a ɓiy mi naŋ ani: 2«Ka mburu, njika ɓi ɗu ani, ɓi: Bumbulvuŋ, Buymisemuŋ a ɓi na:

Kay, tuwam ar hin ngi mendere hana!

3Asi hin ngi Bumbulvuŋ ara ndilawa,

a ndilo le gweˀ vuna si.

I hin ngi gazlavay titira kuyta wãˀ. Hin ngi ga kiita da sukwi ngi mizli.

4Vurum ara ru nga hirwuy Ezipte,

bonoy a sa luuma hirwuy Etiyopi.

A sa kiɗaka mizli kuros kuros asi ruwuy Ezipte,

a sa hilaka zlili naŋhaya,

yo a sa wahaka walahaya wah wah kasl asi virzi naŋ.

5Mizli Etiyopihey, Putoy ati Lutoy, mizli Arabihey ati Libihey, yo ko mizli ya mujumˀay ati taŋ na kwana, maslalam a sa hina taŋ finiˀ finiˀ a ruwuy.

6Ya Bumbulvuŋ i ɓi na:

Mijini hirwuy Eziptehey gar na, a sa ndilam,

yo gidaŋ naŋ mahuhum di vu na, a sa mi a ruwuy.

Maslalam a sa zuma taŋ, zle a Mikdol, sesẽŋ a Asuwaŋ.

I ya Bumbulvuŋ, Buymisemuŋ maɓi.

7Hirwuy tayna a sa ndiram i hirwuy midaŋ daŋ wãˀ fineˀ hirwuy midaŋ daŋhay, yo walahay naŋhay a sa ndiram i walahay diŋ miwãˀ fineˀ walahay diŋhey. 8Ti ya misa ɗuva vu le da hirwuy Ezipte, yo ya misa ngizla mijiniˀis aseˀehey tuwa le na, mizli gar a sa sinaka yi Bumbulvuŋ. 9Tapasa, misliney a sa slikiɗam baɗ avu ya ti palalamay, ɓa ara jijikaka hirwuy Etiyopi muro setette na. Ti ya masa ngizla hirwuy Ezipte na, bonoy a sa luuma taŋ. Asi ara ndilo le vuna si.

10Ya Bumbulvuŋ, Buymisemuŋ i ɓi na:

I sa ga ɓa Nabukodonozor, buy madiɗa ngi Babiloŋ

a ngizla Zigiduw ngi Ezipte.

11Naŋ ati mizli naŋhay, misi moˀorehey fineˀ misi moˀore ngi wuzla sukwihey gar,

a sa ra ngizlaka hirwuyo.

A sa muɗaka maslalam taŋhay ng'ar Eziptehey,

hirwuy a sa nih ti vagay ngi mizli.

12I sa hisika mizaw Nile ngbazlazlaŋ.

I sa vula hirwuy Ezipte da mizli misi moˀorehey, a hiɗikakaŋ.

I sa ga ɓa mizli mulakay a tiram ti hirwuyo daŋ daŋ, ko gwat loŋ anta ra ta.

I ya Bumbulvuŋ maɓi.

13Ya Bumbulvuŋ, Buymisemuŋ i ɓi na:

I sa susuyumo kulihey avra,

gwatay mizli mahuruk hurukam a mbuŋ taŋ misi a Memfis na, i sa zliɗa taŋ avra.

Miwi lihey anta sa ndiram asi ruwuy Ezipte mata,

yo i sa ya zluwun cak cak da hirwuy Ezipte.

14I sa tiri ti Ezipte vay ruwuyo daŋ daŋ. I sa wura walahay Soˀana,

waɗ i sa ga kiita da walahay No.

15Sin, li ngi Ezipte mbur mandil ng'ara ti tuwaˀ na, i sa vunaha himaˀ ɗu angi naŋ. I sa ngizla zigiduw ngir walahay No kuɗupu. 16I sa wura hirwuy Ezipte, didak a sa muɗa mizli Sineye haɗa. A sa slinam li njoŋ avu walahay No, yo walahay Memfise, mesene naŋhay a sa zumaka ti papasa si. 17A sa kiɗaka gawla ngir walahay On ati ngi Pi beseteye kuros kuros ti maslalam. Ngwasaya, a sa jaka taŋ ng'ar hirwuy mulak. 18Tapas ya masa ngila galalaŋ Ezipte maka asi ˀay ngi mizli, yo ya masa kiɗa mi ngi huhumo vu naŋ na, a Tapanese, ko i papas kwana a sa tiri avu taŋ i duvuɗu. Gazlavay a sa sirta hirwuy Tapanese sirit, a sa jaka ziri mongoso naŋhaya nga ruwuy mulak. 19I sa ga kiita da hirwuy Ezipte, joˀ mizli a sa sinaka yi Bumbulvuŋ.»

Buymisemuŋ magi slra ti buy madiɗa ngi Babiloŋ

20A dirba ji mizli ng'ar hirwuy mulak, hin mitarnaˀ, kiya mudumbuŋ ngi vi mukuruˀ ngaŋ kaˀ naŋ na, Bumbulvuŋ a ɓiy mi naŋ ani: 21«Ka mburu, buy madiɗa ngi Ezipte, buy Ezipte, i ngilaŋ haŋ le. Nˀani, manja a mbizakaŋ, manja a pakaŋ slalak, manja a tuwuɗakaŋ di ti gabaga, ɓa a kuf ngi ja maslalama. 22Vurˀe, Ya Bumbulvuŋ, Buymisemuŋ i ɓi na: y'ani i ra luuma buy madiɗa ngi Ezipte. I sa ngilaŋ haŋhaya, haŋ mukuy kuy ati haŋ mingila vuna cuw taŋ, waɗ i sa ga ɓa maslalam a diɗ tisi haŋ naŋ. 23I sa zliɗa hirnga ngi Ezipteheye nga wuzla sukwi ngi mizli, i sa waha taŋ hirnga mber mber ng'asi ruwuy wal wal. 24I sa vula gidaŋ da buy madiɗa ngi Babiloŋ, i sa vulaŋ maslalam ɗu kaw asi haŋ. I sa ngila haŋ ngi buy madiɗa ngi Ezipte, a sa niˀic, niˀic ngi mbur mulum waˀa le ngi mucu. 25I sa vula gidaŋ da buy madiɗa ngi Babiloŋ, haŋ ngi buy madiɗa ngi Ezipte a sa ngil. Ti ya misa vula maslalam ɗu le da ngi Babiloŋ kaw asi haŋ, yo naŋ misa puka le pak ng'ar hirwuy Ezipte na, mizli a sa sinaka, yi Bumbulvuŋ. 26I sa zliɗa hirnga ngi Ezipteheye nga wuzla sukwi ngi mizli, i sa waha hirnga taŋ mber mber ng'asi ruwuy wal wal. Dar a sa sinaka, yi Bumbulvuŋ.»

Currently Selected:

EZEKIYEL 30: BEGDC

Highlight

Copy

Compare