BI NGI ISRAYELEY 11

Ɓumbulvuŋ miɓa ɓi ngi bonoy ngi dirba wãˀ

1Bumbulvuŋ a ɓa Moyise: «I wuɗ i ga bonoy ngi kiɗa mi wãˀ da buy madiɗa ngi Ezipte Ezipteheye. A dirba nah, a sa pulukum, ki ram hã a sa ɓulukum ti kẽh ti ɓul wãˀ ma kini. 2Ɓa Israyeleye so na: gwat mipaka ti ɓiri tapasl tapasl malla ti ɓiri gaza na, anja mizli mizilehey a cufuɗam avu cil taŋ Eziptehey, yo ngwasay kwana, a cufuɗam avu cil taŋ Eziptehey aya.» 3Bumbulvuŋ a ga ɓa Eziptehey a gaka mezle da Israyeleye. Na zle Moyis vuna i mbur micawwa a hirwuy Ezipte, yo i mbur micawwa avu gawla ngi buy Ezipteheye waɗ avu mizli gar. 4Moyis a ɓa buy Ezipte: «Bumbulvuŋ a ɓi ani: ng'avu wuzla duvuɗ na, i sa bi, i ngira hirwuy Ezipte puɗak. 5Modogom misi asi hirwuy Ezipte gar na, a sa mucu, zle avu modogom ɗik masa zum buy ar li ɗiki, modogom ngi ngwas miyaˀa daw, hã avu modogom ngi ginewey. 6A sa wudam cərəw cərəw asi ruwuy Ezipte gar, ko a cinam widi kanah ɗaˀ ta ndiɗaˀ wãˀ, yo anta sa cinam tumbuŋ mata ndiɗaˀ wãˀ. 7Amma a hay Israyeleye, ko a cinam kiri mawidi mbur malla mawidi ginew tekeɗe anta, ɓa ki sinaka Ezipte ati Israyele, Bumbulvuŋ a pura taŋ, taŋ wal wal. 8Dar gawla ɗikey misenna, a sa soko, a huruk hurukam a mbuŋ ɗu, a ɓikiy: «cohom ati mizli ɗikeye!» Akẽh so na, i sa cuhu.» Joˀ Moyis a bi ti mevel fõh fõh ti hay buy Ezipte. 9Bumbulvuŋ a ɓa Moyise na: «buy Ezipte mangum cine mi kum ta na, ɓa gwat migam ɗaˀ tahaya, i ga taŋ asi hirwuy Ezipte ti vendeke jaka.» 10Moyis ati Aroŋ a gaka gwat migam ɗaˀ tahay tayna le cek a mbuŋ buy Ezipte, amma Bumbulvuŋ a ga ɓa hirnga ngi buy Ezipte a tiri gidaŋ na si, ko a ngum pula Israyeley a bam tisi hirwuy naŋ ta.

Currently Selected:

BI NGI ISRAYELEY 11: BEGDC

Highlight

Copy

Compare