TILA MI Ɓi madiɗa madiɗa ngi raˀa
Ɓi madiɗa madiɗa ngi raˀa
Mitila mi, zle ar mingiɓi mudumbuŋ ngir ɗerewol naŋ si na, a biga le, naŋ i mbur misi sinmijileŋ. Amma sinmijileŋ ngi ɗerewol Tilami, naŋ wal avu misi mijileŋ jileŋ ngir ɗerewol Mikicuwulo, asi naŋ a ɓa ndra di i ɓi ngi sinmijileŋ ngi duniya ta. Misi sinmijileŋ ngir ɗerewol Tilami, a lum sin le haɗa ar gwat naŋ miga ar joˀ naŋ, naŋ kine, a luuma na, ndum ngi duniya, anta zik ta, yo gidaŋ ngi mizli titirahay ngi luuma ndumvuna kwana i gwat ngatara lambaˀa. Dar a cufuɗ a kwacay naŋ, ndir ti siifa vuna i gwat ngi pula gir kwa. A tikaˀay da mbur maslufa ɗerewol hana kwana, ɓa a cufuɗ a kwacay naŋ kahana ya. Kaɓa ani ar ɗerewol Jopo, cufuɗ mutuwaˀ tuwa’hay wãˀ ta na, ɓi ada ar taŋ, na so na, ay’ ngi cufuɗ tayna wal neˀe. Dambalaka na, Jop a mbulmi nga naŋ, bonoy mbur titira masa na, anta sli wala ta. Amma mbur Mitilami, a ɓi di i ɓi ngi mumul ngi mbur titira, anta sli wala ta. Mbur misi sinmijileŋ, ɓi naŋ hana, naŋ mibiga na, naŋ kaɓa i ki wala ngi ɓi macuh a ruwuy aka. Mumul ati gidaŋ ngi mbur titira (Zuŋ zuŋ, zlili, dudok, slra, sinmijileŋ gi jeŋŋe) na, a mo ar ɓi nah, a mo ar ɓi nah, a si na le, kpak naŋ na, i gwat mazik ta, yo i gwat migisiŋ gisiŋ ta ma. Cifi setete ta, muc maguc mi, mbak le ta, yo gi jeŋŋe ta mazum buy a wuzla mizli, waɗ jiviɗ ngi slra, Buymisemuŋ miɗiya le vur mizli ar duniya hana, mbur anta si na gu mata na, gwat masa gi avu mburo tuwa mata, yo a tik ta ma na, matir di kanah vuna i gwat tayna. Sukwi ngi gwat ngi gi, misi zliv mbur a sirika gu a ruwuyo na, gwat mimbeˀ misi ngi gihey ta hana, ara ga ɓa i wulkam ara. Cufuɗ ngi mbur misi sinmijileŋ mawuso di na, ar li mekelemey ar ɗerewol ngi Mingiɓi ngi Bumbulvuŋ, zila mi ngi se’e, naŋ wal. Amma a wuzla ɓi tayna gar na, a tiɓaŋ le, ɓa i lumam zila mi ngi ndra a hirnga gwat mahĩhĩya ndra ati misi maga ndra ɓa i wulkam cuw cuwo. A tiɓaŋ le ma, anja mbur mutoho mingiɓi ngi Bumbulvuŋ a ma ndra hiri ngi ɓa ndra ava ma, manja ɗuva hiri kuy kuy ar kpak ngi mbur titira na, naɓa tiɓi migisiŋ anta.
Currently Selected:
TILA MI Ɓi madiɗa madiɗa ngi raˀa: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.