DANIYEL 8

Gwat mucuw naŋ mupura ti kleŋ: zlengerek ati bazuway

1Ti Baltazar mazum buy ngi vi mimakir naŋ na, ya Daniyel i pur gwat le ti kleŋ, a dirba ngi dumbuŋ na. 2I ra pur gwat ti kleŋ, keɗ na, ya a Sus walahay madiɗaŋ, angi hirwuy ngi buy miwi li ngi Etam, i ra pura ti kleŋ, ya vuna, ya gweˀ a mi mizaw Ulay. 3I zuɓa hirnga paɗɗa ɓa i pur hiri, keɗ na: zlengerek deŋ a mi mizawa. Naŋ ti durumoy cuw. Durumoyo, taŋ jek jek haɗa, pal numuŋ naŋ jek haɗa, a funa mekeleme le, mijek tuwa, a puso a dirba. 4I pura na, zlengerek tuwa, ara kiɗ gwat ti durumo kini tisi pas ngi pastaˀ, tir vay muŋ, waɗ tir vay ruwuyo, gwat misahmi macici a mbuŋ naŋ gu anta ko pal ta, yo matiɓa gwat gu ti vaˀa ko pal anta. A ga gwataka naŋ mawuɗ, yo ara gil. 5I ra wuluk ara zleˀe, keɗ na, bazuway a bo tisi pas ngi pastaˀa. A bula ruwuyo bal bal kurzluˀ, amma a ɗuva sar a ruwuyo ta. Bazuway nah vuna, naŋ ti durumoy giŋ giŋ ar wala ngi hiriheye. 6A so sesẽŋ a ciki zlengerek misi durum cuw, ya mupura deŋ a mi mizaw tuwa, a kil ng'ava ti gidaŋ naŋ wãˀ. 7I ra pura, a ndil a ciki zlengereke, a zuɓ mevel fõh fõh ng'ara. A kiɗa zlengerek tuwa, a ngilaŋ durumoyo cuw taŋ, zlengerek a lum gidaŋ ngi cici a mbuŋ naŋ gu ta. A zlumbura nga ruwuy, a gudubura asi sar. Mbur ngi tiɓa zlengerek avaˀa, ko anta loŋ ta. 8Bazuway ara gil kuy kuy. Amma naŋ minaha vu so na, durum naŋ madiɗa tuwa a ngil, mekelemey yor mufaɗ, a boko ar li naŋ, pulaˀ pulaˀ ng'asi diˀis mumufaɗaya. 9Avu durum pal numuŋ, mekelem meciɗek wãˀ a bawa, a gil haɗa ng'ar vay ruwuy, ng'asi pas ngi miprik waɗ tir vay#8.9 hirwuy mimezle haɗa, i hirwuy Israyel hirwuy mimezle haɗa. 10A cici zlak ngi kiɗa vu ati vurum ngi muŋhoy. Vurum ngi muŋhoy cah waɗ wurzlaŋhaya, a zliɗo taŋ nga ruwuy, a gudubura taŋ asi sar. 11A cici zlak ngi kiɗa vu ko ati yarma ngi vurum ngi muŋhoy vuna, a tika mikuli magakaŋ di vur hin gara, a waha si virzi ngi hay ngi Buymisemuŋ. 12Vurum ngi muŋhoy jom ati mikuli magaka vur hin gara, a vulaka taŋ ti mevel. Durumo, a hizigo ɓi mikaslsla nga ruwuy. Gwat naŋ muwuɗ gar ngi gi na, a gi le. 13Akẽh so na, i cin ˀay ngi modro maɓi, yo modro mekelem a cufuɗaŋ: «Gwat ngi mikuli magaka vur hin gar, mevel ngi waha virzi ngi hay muvula le da Buymisemuŋ ati vurum ngi muŋ maguduburaka asi sar na, pur naŋ ti kleŋ, a sa kiɗ mi hã ti vunaka?» 14A ɓiy: «Sey hiney a cohom durmuk durmuk cuw ti skat skat makir ɗagay, a dirba nah, hay ngi Buymisemuŋ a sa ndiraka ti jiviɗ naŋ.»

Mbiɗeˀvra ngi gwat Daniel mupura ti kleŋ sar mudumbuŋ naŋ

15Dambalaka, ti ya Daniyel mira pura gwat ti kleŋ, i wuɗ i sla wala naŋ tuwa, keɗ na, mbur mibam vu ati mbur, a so deŋ a ciki ɗu. 16Joˀ i cin ˀay ngi mbur mawudo ti mizaw Ulay, a ɓi: «Gabriyel! Mbur hana mupura gwat ti kleŋ na, inga slaŋ wala nah.» 17A so ng'aciki ɗu, ar li ya mideŋ ara na, ti naŋ maso na, didak a muɗiy, i huruk huruk a ruwuy. Dar a ɓiy: «Ka mburu, cin ɗi, gwat ka mupura ti kleŋ na, i ngi kiɗa mi ngi hin.» 18Ti naŋ maɓiy na, i ro ɗokɗok, durus a ruwuy. A wusiy, a slikiɗiy deŋ ar li ɗu a muŋ. 19Joˀ a ɓiy: «Gwat masa ndilo a dirba mevel mufõh fõh na, i wuɗ i njukuw di, asi kiɗa mi ngi hin i misla le si. 20Zlengerek misi durum cuw ka mupura na, i buy ngi Medi ati ngi Persehey. 21Bazuway misi ngwic dibizik na, i buy Grek. Durum madiɗa misi a wuzla hirihey na, i buy mudumbuŋ. 22Ti durum mingil na, mekelemey a boko mufaɗ ar li naŋ. Tayna i buyoy mufaɗ masa boko ti hirwuy nah, amma anta a lumaka gidaŋ nga naŋ na ta. 23Ar kiɗa mi ngi zumabuy taŋ na, misi moˀorehey a gaka moˀore taŋ, a mbam di le muduba so na, a dirba nah, buy muhuhumo vu, misi wer ngi tikina vu a sa bawa. 24Gidaŋ naŋ ngi wi mizli, a sa ru nga mbuŋ nga mbuŋ, amma anta ti gidaŋ ngi hirnga naŋ ta. A sa wuh gwatay haɗa, yo gwat naŋ muwuɗ le ngi gi gar na, a sa gi. A sa ngizl mizli migidaŋhay, mizli ngi Bumbulvuŋhay. 25Naŋ misi ti wer tuwa, a sa si na tikina vu gisiŋ gisiŋ. A sa gil ti huhumo vu a mevele, yo a sa ngisl zigiduw mapuraka kaɓa taŋ zuy zuyo. A sa zlir didak ati madiɗa ngi yarmahay, amma a sa ngilakaŋ ngiɓac ngiɓac, ko mitiɓi naŋ anta pal ta. 26Ka mupur gwatay ti kleŋ ngi pastaˀ ati ngi miprik kaɓa miɓaka ɓi naŋ na, naŋ kaslsla gisiŋ. Ka ja gwat ka mupura ti kleŋ hana ɗum a kwacay ɗik. Asi naŋ vur hin mikileŋhey.» 27Ya Daniyele, i ra hĩhĩy, ya guta, ɓaˀ hin mbeˀ mbeˀe. A dirba nah, i slikiɗ, i gi slra ngi buy. Wuluk ara giriy, vur ɓi ngi gwat ya mupura ti kleŋ na, amma ko mbur misla wala naŋ anta.

Currently Selected:

DANIYEL 8: BEGDC

Highlight

Copy

Compare