SLRA 8

1Sawulo kwana, naŋ tisi mizli hĩhĩyaka muc ngi Etiyen na ya.

Sawul misipa Cikil ngi misikristuhoy nder nder

Angi hin nah vuna, a zlaka sipi Cikil ngi misikristu ngi Zerusalemeye nder nder haɗi. Taŋ gar a zliɗam hirnga nga hirwuy Yude, waɗ nga Samari, sey misliney mindiram tewle. 2Mitiɓihey a dikaka Etiyene, a tuwakaŋ haɗi teˀe. 3Sawulo, naŋ ara ngizla Cikil ngi misikristuhoyo, a ci vur hay vur hay, a ja zil ati ngwas mitiɓiheye, a pa taŋ ng'ar dangay.

Filip mitil mi ti Ɓimezle a Samari

4Mizli mizliɗam hirnga tuwa, a ram aka aka, a tilam mi ti Ɓimezle. 5Naŋ kine, Filip aru ng'ar walahay Samari, a til mi ti Ɓi ngi Mesi da mizli a diga. 6Zigiduw a jo kaw kaw, ti ˀay purla, slimiɗ jak ngi cine mingiɓi ngi Filipe, asi ara cinaka ɓi ngi cekenehey naŋ maga taŋ, yo ara puraka taŋ. 7Asi mike na, setenehey haɗi, a bam ti hirnga mizli, a wudam ti gidaŋ, yo mizli mihilɓahay ati misi blehey haɗi a ɗiyam le. 8Mizli ngir walahay Samari, a mumulom haɗi. 9Dambalaka, angi walahay nah na, mbur mekelem ada, a zilaka Simoŋ. I misi cucuk, yo a zuma hirnga le da mizli ngir walahay Samari. A wa vu naŋ i mbur mududoko. 10Mizli gar, zle avu ziri memeɗehey hã avu mizli madiɗahaya, a vulakaŋ vu taŋ le taˀ wãˀ, a ɓam: «Mbur hana i gidaŋ ngi Buymisemuŋ mazilaka Gidaŋ Madiɗa.» 11Taŋ muvulakaŋ vu taŋ taˀ wãˀ vuna na, asi ara zuma taŋ hirnga diga zlezle ti ketele, naŋ maga taŋ na. 12Amma Filipe, naŋ mitila taŋ mi ti Ɓimezle ngi Zumabuy ngi Buymisemuŋ waɗ ti slimiɗ ngi Yesu Kristu na, a tiɓaka ɓi naŋle, dar a caka taŋ ar yam, ziley ati ngwasaya. 13Simoŋ tuwa kwana, a tiɓa ɓi nah le ya, a cakaŋ ar yam, a pula Filipe mata. Naŋ mapura cekenehey ati gwat migam ɗaˀ tahay magam tuwa na, ara zumaŋ hirnga da naŋ vuna ya muduba. 14A dirba nah, misliney misi a Zeruzalem a cinaka na, Samarihey a tiɓaka ɓi ngi Buymisemuŋ le, a slinaka ti Piyer ati Zaŋ nga diga. 15Ti Piyer ati Zaŋ mindilam a diga na, a diram dibiɗ vur Samariheye, ɓa a lumam ˀUf Mipal. 16Asi mike na, ˀUf Mipal a so angi mbur pal asi taŋ ɗaˀ t'aruŋ, a caka taŋ ar yama ti slimiɗ ngi Buy Yesu tewle si. 17Piyer ati Zaŋ a bucaka haŋ ar taŋ, joˀ Samarihey a lumam ˀUf Mipala so. 18Amma ˀUf Mipal, Simoŋ mupura mitiɓiheye, a lumaka ti misliney mabucaka haŋ ar taŋ na, a wuɗ ɓa a vula taŋ dala. 19A ɓa taŋ: «Vulikiy gidaŋ misenna da ya ya, ɓa ko mizli wanaka gar, ya misa buca haŋ le ar taŋ na, a sa lumam ˀUf Mipala ya.» 20Amma Piyer a mbiɗaŋ di: «Ka ati dala ɗik vuna gar, zizam! Vur gwat ngi vul ngatara ngi Buymisemuŋ na, ki wa kaɓa ki hiɗika ti dala gu kwa? 21Hana i slra ɗik ta, mi ngi ɗik anta ra ta, asi mevel ɗik anta kaslsla a mbuŋ Buymisemuŋ ta. 22Zil marava, pula malambaˀ ɗik na, yo tumbulo Bumbulvuŋ. Asinta, a sa puyuw wuluk muso kahana a mevel ɗik na kwani. 23Asi mike, yi pura na, ka ti mevel miɗalak ka meɗeleke, yo mungra a juwuw le.» 24Dar Simoŋ a mbiɗa taŋ di: «Na, kum vuna, tumbuloko Bumbulvuŋ vur ya, ɓa ɓi kum miɓaka na, a gi avu ya ta.» 25A dirba Piyer ati Zaŋ migaka sedewo taŋ, mitilam mi ti ɓi ngi Bumbulvuŋ na, a mam nga Zerusalem a muŋ, bal ti tila mi ti Ɓimezle angi prok ngi Samarihey haɗi.

Filip ati mbur madiɗa ngi Etiyopi

26Modro ngi Bumbulvuŋ a ɓa Filipe: «Slikiɗ, aru kini tir vay ngi ruwuy, ti ngi jiviɗ mapo sar baɗ ti Zeruzalem nga Gaza na. «Jiviɗ nah na, anta ram ti ngaˀa mata. 27Filip a mur mata, dar a ru. Dambalaka mbur Etiyopi, mbur munguɗo, a zuɓ mulak le zleˀe vur Bumbulvuŋ nga Zeruzalem, i mbur madiɗa miji zlili ngi Kandas, ngwas mazum buy a Etiyopi. 28A cifi le ar mota ngi pilisey, ara mi ngi hay naŋ bal ti slufa ɗerewol ngi mijiviɗ Ezayi. 29ˀUf Mipal a ɓa Filipe: «Aru, ja is da mota ngi pilis ngi diga na.» 30Filip a kil nga diga, a cine mbur Etiyopi maslufa ɗerewol ngi mijiviɗ Ezayi tuwa, a ɓaŋ: «Ani k'ada ki cine mbiɗeˀvra ngi ɓi ka maslufa vuna gisiŋ kwa?» 31Mbur tuwa a mbiɗaŋ di: «Da mbur majiniy anta na, yisa cine gu mbri mbrike? «Joˀ a zila Filipe, ɓa a jiɗ, ara cifi gweˀ acikeˀe. 32Ɓi naŋ maslufa ar Ɓimutoho vuna, n'ani: «Naŋ kaɓa tumuŋ maram di nga sli ˀay, kaɓa tumuŋ milek lek a mbuŋ mbur maslaŋ ngwici. Naŋ kine, ko a wun mi ta. 33A ma hirnga naŋ nga ruwuy, a gakaŋ kiita naŋ jeŋ ta. Mbur masa slufa ɓi ngi sukwi naŋ ada kwa? Vur hin ngi siifa naŋ a ruwuyo, a kiɗ mi le.» 34Mbur Etiyopi tuwa a ɓa Filipe: «Ambuh, ɓiy di: mijiviɗ maɓi kahana vuna, a hirnga waka? A hirnga naŋ tehhe a muŋ kwa, malla a hirnga mbur mekelem kwa mbrike?» 35Dar Filip a zla a ɓaŋ Ɓimezle ngi Yesu, a wa weˀ avu ɓi naŋ muslufa hana tuwa. 36A zuɓaka jiviɗe, ara ndilam kasl a mi futuŋ, joˀ mbur Etiyopi a ɓa Filipe: «Yam anihĩ, matikiy ɓa ngi ci ar yam i mi maka?» 37Filip a ɓaŋ: «Da ki tiɓi le a mevel ɗik wãˀ na, a gi. «Mbur Etiyopi a mbiɗaŋ di: «Yesu Kristu i Mangal ngi Buymisemuŋ, i tiɓa le.» 38Dar a ɓi ɓa a cicaka mota ngi pilise, taŋ cuw taŋ a pam sar ng'ar yama, joˀ Filip a caŋ ar yama. 39A dirba taŋ mubam tir yama na, ˀUf ngi Bumbulvuŋ a zuɓa Filipe faw, mbur Etiyopi a pura mata, a zuɓa jiviɗ naŋ ti mumul haɗi. 40Filipe, a sa pura na, naŋ deŋ a Azot, a rudigi bal ti tila mi ti Ɓimezle angi walahay micawwahay gar, hã ara ndil a Sezare.

Currently Selected:

SLRA 8: BEGDC

Highlight

Copy

Compare