SLRA 4
4
Piyer ati Zaŋ a mbuŋ ngilawuy madiɗa ngi Yudehey
1Piyer ati Zaŋ, ti taŋ maɓaka mizli aruŋ si na, masayay ati madiɗa mijigina hay ngi Bumbulvuŋ a Zeruzalem waɗ Sadukihey a ndiloko. 2A jam mevel haɗi angi mislin ngi Yesu mucuw tayna, asi taŋ mupuraka taŋ, ara dubunam gwat da mizli, yo ara tilaka taŋ mi ti ɓi ngi Yesu mislikiɗ ti wuzla mumucahay. 3Dar a jaka taŋ, a caka taŋ ar dangay, ɓa hã li a wun, asi hiikuɗo ji le si. 4Amma a wuzla mizli micinaka mingiɓi ngi misliney tuwa, mizli haɗi a tiɓaka le. Taŋ jom gar, a gam gwat ngi mizli durmuk zlum gu.
5Li naŋ muwun so na, madiɗa ngi Yudehey ati mizli micawwahay waɗ buy ngi ɓimujuwahay misi a Zerusaleme, a kusom. 6Mukusom i ti Han, masay madiɗa, Kayif, Zaŋ, Alekzandir waɗ mizli ngi hay masay madiɗahay gar. 7Joˀ a soko ti Piyer ati Zaŋ tuwa dedeŋ a mbuŋ taŋ, dar a zlaka a cufuɗaka taŋ: «Ki lumam di i gidaŋ ngi mike? Kum miɗiyaka mbur kilbeɗe nah ti slimiɗ ngi waka?» 8Piyer a nih le ti ˀUf Mipal, dar a ɓa taŋ: 9«Hey, kum madiɗa ngi mizli ati kum micawwahay, ani a wudam ti ndra le dana asi ndra migam mezle da kilbeɗe miɗiyi na. A cufuɗam ndra, a ɗiyi mbri mbrike ɓa i ɓam. 10Sey ki sinaka kuy kuy so, kum ati mizli Israyeley gar, miɗiya mbur hana i slimiɗ ngi Yesu Kristu ngi Nazaret, kum midiraka avu dum mizliraŋ, Buymisemuŋ mislikiɗaŋ a muŋ na. Mbur hana miɗiyi ngbatak a mbuŋ kum na, mbele naŋ. 11Yesu vuna: ‹I ɗugur kum mindira hayay mihizigaka avra, misa tiri ɗugur hirnga ngi ji mivay.#4.11 Pura Dim 118.22; Mat 21.42.› 12Milaha vu, i naŋ pal naŋ tewle. Asi gazlavay kurzluˀ gar na, Buymisemuŋ a vul slimiɗ mekelem da mizli, ɓa i laham ti naŋ na, anta.» 13Ti taŋ mupuraka Piyer ati Zaŋ maɓam manja zluwun na, a zuma taŋ hirnga le, asi a sinaka taŋ le, i mizli mudubunam ta, mizli ngatarahay ngbaŋ. Joˀ a sinaka, taŋ i mizli ngisi Yesuhoy. 14Amma ko a ɓam gu mata, asi ara puraka mbur miɗiyi tuwa, naŋ da deŋ gweˀ avu taŋ akẽh. 15Dar a ɓam ɗaˀ ɓa a bam taŋ tir hay ngi ngilawuy madiɗiɗa, dar taŋ a ngilam wuy ar wala taŋ, 16a ɓam: «I sa gaka mizli tayna mbri kpak ka? Asi mike na, cekene mubudas hana, migaka i taŋ gisiŋ, Zerusalemey gar a sinaka le. I jam di mi gu mata. 17Amma ɓa ɓi naŋ a njih nga mbuŋ a wuzla mizli mata na, sey i gaka taŋ zluwun, ɓa zle dana, ko waka gar, a ɓi ɓi ti slimiɗ ngi Yesu mata.» 18Dar a ziloko taŋ a muŋ, a tikaka taŋ kaŋ kaŋ, ɓa a ɓam ɓi malla a dubunam gwat da mizli ti slimiɗ ngi Yesu mata wãˀ. 19Amma Piyer ati Zaŋ a mbiɗaka taŋ di: «Mikaslsla a mbuŋ Buymisemuŋ i wanaka? I cinami da kum kwa, malla da naŋ? Avu kum maslaka wala nah so. 20Avu ndra na, gwat ndra mupuraka ati ɓi ndra micinaka na, ɓa i cifam di teˀ manja i ɓaka na, a gi ta.» 21Mizli ngir kus ngi ngila wuy madiɗa, a bucaka taŋ ti gidaŋ ava ma, a pulaka taŋ. A lumam ɓi midar ɓa a jaka taŋ ti kiita aseˀe ta, asi zigiduw gar ara hunuma Buymisemuŋ asi gwat migi nah vuna. 22Asi mike na, mbur miɗiyi ti cekene nah na, vi naŋ, a funa vi kukur mufaɗa le.
Mitiɓihey midiram dibiɗ
23A dirba mupulaka ti Piyer ati Zaŋ na, a ram ng'avi cil taŋhay, a slufaka taŋ ɓi ngi masay madiɗahay ati mizli micawwahay miɓaka taŋ di na gar. 24A cinaka taŋ di, a dirba nah, taŋ gar jom ar leˀe a diram dibiɗ, a ɓaka Buymisemuŋ na: «Aw Kumani, miga muŋ, hirwuy, mubuliy ati gwat ngi rahay gar na, i ka. 25I ka ti ˀUf ɗik Mipal, mica mingiɓi hana a balam dideˀ ndra Davit, gawla ɗike, ti naŋ miɓi: ‹Sukwi ngi mizli mekelemey a bucam ɓar ɓar vur mike? Mizli a juwam ɓi lambaˀ a mevel taŋ vur mike? 26Buy madiɗa ngi ruwuyoy, a juwam vu le, yo madiɗa ngi mizli, a jumom ˀay le, ɓa a gam vurum ati Bumbulvuŋ waɗ avu mbur naŋ muwunaŋ.› 27«Kanah, Herod, Pons Pilat ati sukwi ngi mizli mekelemey waɗ mizli Israyeley a jumom ˀay le gisiŋ ar walahay madiɗa hana vur Yesu, gawla ɗik mipal, ka muwunaŋ na. 28Gwat ka ɓi micica ɓi nah zleˀe daf dumbuŋ, ti gidaŋ ɗik ati wuɗ ɗik na, taŋ migam na, i nah so. 29Aw Bumbulvuŋ, wurenna so na, jik slimiɗ ar bonoy ngi mizli ɗikeye, pula jiviɗ da gawla ɗikeye, ɓa a tilam mi ti mingiɓi ɗike manja zluwun. 30Sika haŋ ɗike, ɓa misi jijihey a mbulom, ɓa gwat ngi zuma hirngahay ati gwat migam ɗaˀ tahaya, a gam ti slimiɗ ngi Yesu, gawla ɗik mipal na.» 31Angi kiɗa mi ngi diradibiɗ taŋ na, li taŋ mukusom anga, a wus hiɓik hiɓik, ˀUf Mipal, a naha taŋ le gar, a tilam mi ti ɓi ngi Buymisemuŋ manja zluwun.
Mitiɓihey muwunkaka gwat taŋhay ar wala taŋ
32Mitiɓiheye, taŋ zigiduw taˀ, taŋ ti mevel purla, lesl purla, ko mbur maɓi gwat hana inga ya na, anta. Amma a jumoko gwat taŋhay gar ar li purla jaka. 33Mislineye, a gaka sedewo ngi slikiɗ ngi Buy Yesu ti gidaŋ jak. Buymisemuŋ a ga taŋ mezle wal wal haɗa gar taŋ. 34Mbur misi murga anta a wuzla taŋ ta, mizli misi ti guvahay ati hayaya, a hiɗikaka taŋ avra, a soko ti dala nah, 35a paka a mbuŋ misliney, a wunkaka, ɓa mbur gar a lum mi nga naŋ weˀe avu naŋ muro ti may naŋ. 36Naŋ kine, mbur mekelem ada, a zilaka Zosef, sukwi ngi Levi, a ya ka a Sipre. Misliney a cakaŋ slimiɗ ti migala, Barnabas, mbiɗeˀvra: «mbur muvula gidaŋ da mizli», naŋ da ti guva. 37A hiɗika guva naŋ tuwa avra, a so ti dala nah, a pa a mbuŋ mislineye.
Currently Selected:
SLRA 4: BEGDC
Highlight
Copy
Compare
Share
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
SLRA 4
4
Piyer ati Zaŋ a mbuŋ ngilawuy madiɗa ngi Yudehey
1Piyer ati Zaŋ, ti taŋ maɓaka mizli aruŋ si na, masayay ati madiɗa mijigina hay ngi Bumbulvuŋ a Zeruzalem waɗ Sadukihey a ndiloko. 2A jam mevel haɗi angi mislin ngi Yesu mucuw tayna, asi taŋ mupuraka taŋ, ara dubunam gwat da mizli, yo ara tilaka taŋ mi ti ɓi ngi Yesu mislikiɗ ti wuzla mumucahay. 3Dar a jaka taŋ, a caka taŋ ar dangay, ɓa hã li a wun, asi hiikuɗo ji le si. 4Amma a wuzla mizli micinaka mingiɓi ngi misliney tuwa, mizli haɗi a tiɓaka le. Taŋ jom gar, a gam gwat ngi mizli durmuk zlum gu.
5Li naŋ muwun so na, madiɗa ngi Yudehey ati mizli micawwahay waɗ buy ngi ɓimujuwahay misi a Zerusaleme, a kusom. 6Mukusom i ti Han, masay madiɗa, Kayif, Zaŋ, Alekzandir waɗ mizli ngi hay masay madiɗahay gar. 7Joˀ a soko ti Piyer ati Zaŋ tuwa dedeŋ a mbuŋ taŋ, dar a zlaka a cufuɗaka taŋ: «Ki lumam di i gidaŋ ngi mike? Kum miɗiyaka mbur kilbeɗe nah ti slimiɗ ngi waka?» 8Piyer a nih le ti ˀUf Mipal, dar a ɓa taŋ: 9«Hey, kum madiɗa ngi mizli ati kum micawwahay, ani a wudam ti ndra le dana asi ndra migam mezle da kilbeɗe miɗiyi na. A cufuɗam ndra, a ɗiyi mbri mbrike ɓa i ɓam. 10Sey ki sinaka kuy kuy so, kum ati mizli Israyeley gar, miɗiya mbur hana i slimiɗ ngi Yesu Kristu ngi Nazaret, kum midiraka avu dum mizliraŋ, Buymisemuŋ mislikiɗaŋ a muŋ na. Mbur hana miɗiyi ngbatak a mbuŋ kum na, mbele naŋ. 11Yesu vuna: ‹I ɗugur kum mindira hayay mihizigaka avra, misa tiri ɗugur hirnga ngi ji mivay.#4.11 Pura Dim 118.22; Mat 21.42.› 12Milaha vu, i naŋ pal naŋ tewle. Asi gazlavay kurzluˀ gar na, Buymisemuŋ a vul slimiɗ mekelem da mizli, ɓa i laham ti naŋ na, anta.» 13Ti taŋ mupuraka Piyer ati Zaŋ maɓam manja zluwun na, a zuma taŋ hirnga le, asi a sinaka taŋ le, i mizli mudubunam ta, mizli ngatarahay ngbaŋ. Joˀ a sinaka, taŋ i mizli ngisi Yesuhoy. 14Amma ko a ɓam gu mata, asi ara puraka mbur miɗiyi tuwa, naŋ da deŋ gweˀ avu taŋ akẽh. 15Dar a ɓam ɗaˀ ɓa a bam taŋ tir hay ngi ngilawuy madiɗiɗa, dar taŋ a ngilam wuy ar wala taŋ, 16a ɓam: «I sa gaka mizli tayna mbri kpak ka? Asi mike na, cekene mubudas hana, migaka i taŋ gisiŋ, Zerusalemey gar a sinaka le. I jam di mi gu mata. 17Amma ɓa ɓi naŋ a njih nga mbuŋ a wuzla mizli mata na, sey i gaka taŋ zluwun, ɓa zle dana, ko waka gar, a ɓi ɓi ti slimiɗ ngi Yesu mata.» 18Dar a ziloko taŋ a muŋ, a tikaka taŋ kaŋ kaŋ, ɓa a ɓam ɓi malla a dubunam gwat da mizli ti slimiɗ ngi Yesu mata wãˀ. 19Amma Piyer ati Zaŋ a mbiɗaka taŋ di: «Mikaslsla a mbuŋ Buymisemuŋ i wanaka? I cinami da kum kwa, malla da naŋ? Avu kum maslaka wala nah so. 20Avu ndra na, gwat ndra mupuraka ati ɓi ndra micinaka na, ɓa i cifam di teˀ manja i ɓaka na, a gi ta.» 21Mizli ngir kus ngi ngila wuy madiɗa, a bucaka taŋ ti gidaŋ ava ma, a pulaka taŋ. A lumam ɓi midar ɓa a jaka taŋ ti kiita aseˀe ta, asi zigiduw gar ara hunuma Buymisemuŋ asi gwat migi nah vuna. 22Asi mike na, mbur miɗiyi ti cekene nah na, vi naŋ, a funa vi kukur mufaɗa le.
Mitiɓihey midiram dibiɗ
23A dirba mupulaka ti Piyer ati Zaŋ na, a ram ng'avi cil taŋhay, a slufaka taŋ ɓi ngi masay madiɗahay ati mizli micawwahay miɓaka taŋ di na gar. 24A cinaka taŋ di, a dirba nah, taŋ gar jom ar leˀe a diram dibiɗ, a ɓaka Buymisemuŋ na: «Aw Kumani, miga muŋ, hirwuy, mubuliy ati gwat ngi rahay gar na, i ka. 25I ka ti ˀUf ɗik Mipal, mica mingiɓi hana a balam dideˀ ndra Davit, gawla ɗike, ti naŋ miɓi: ‹Sukwi ngi mizli mekelemey a bucam ɓar ɓar vur mike? Mizli a juwam ɓi lambaˀ a mevel taŋ vur mike? 26Buy madiɗa ngi ruwuyoy, a juwam vu le, yo madiɗa ngi mizli, a jumom ˀay le, ɓa a gam vurum ati Bumbulvuŋ waɗ avu mbur naŋ muwunaŋ.› 27«Kanah, Herod, Pons Pilat ati sukwi ngi mizli mekelemey waɗ mizli Israyeley a jumom ˀay le gisiŋ ar walahay madiɗa hana vur Yesu, gawla ɗik mipal, ka muwunaŋ na. 28Gwat ka ɓi micica ɓi nah zleˀe daf dumbuŋ, ti gidaŋ ɗik ati wuɗ ɗik na, taŋ migam na, i nah so. 29Aw Bumbulvuŋ, wurenna so na, jik slimiɗ ar bonoy ngi mizli ɗikeye, pula jiviɗ da gawla ɗikeye, ɓa a tilam mi ti mingiɓi ɗike manja zluwun. 30Sika haŋ ɗike, ɓa misi jijihey a mbulom, ɓa gwat ngi zuma hirngahay ati gwat migam ɗaˀ tahaya, a gam ti slimiɗ ngi Yesu, gawla ɗik mipal na.» 31Angi kiɗa mi ngi diradibiɗ taŋ na, li taŋ mukusom anga, a wus hiɓik hiɓik, ˀUf Mipal, a naha taŋ le gar, a tilam mi ti ɓi ngi Buymisemuŋ manja zluwun.
Mitiɓihey muwunkaka gwat taŋhay ar wala taŋ
32Mitiɓiheye, taŋ zigiduw taˀ, taŋ ti mevel purla, lesl purla, ko mbur maɓi gwat hana inga ya na, anta. Amma a jumoko gwat taŋhay gar ar li purla jaka. 33Mislineye, a gaka sedewo ngi slikiɗ ngi Buy Yesu ti gidaŋ jak. Buymisemuŋ a ga taŋ mezle wal wal haɗa gar taŋ. 34Mbur misi murga anta a wuzla taŋ ta, mizli misi ti guvahay ati hayaya, a hiɗikaka taŋ avra, a soko ti dala nah, 35a paka a mbuŋ misliney, a wunkaka, ɓa mbur gar a lum mi nga naŋ weˀe avu naŋ muro ti may naŋ. 36Naŋ kine, mbur mekelem ada, a zilaka Zosef, sukwi ngi Levi, a ya ka a Sipre. Misliney a cakaŋ slimiɗ ti migala, Barnabas, mbiɗeˀvra: «mbur muvula gidaŋ da mizli», naŋ da ti guva. 37A hiɗika guva naŋ tuwa avra, a so ti dala nah, a pa a mbuŋ mislineye.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.