SLRA 27

Mislinam ti Pol nga Roma

1Ti taŋ majuwaka ɓi nah, ɓa i cam palalam nga Itali na, a vulaka Pol ati dangay mekelemey asi haŋ ngi madiɗa ngi sojehey mazilaka Zuliyus. Naŋ ar vurum ngi Roma mazilaka vurum ngi buy mimadiɗa. 2Dar i cam palalam maso ti Adramit, ɓa aru kini ng'ar li pi sar ngi hirwuy Azi, i zuɓam jiviɗ. Ndra bumoˀ ati Aristarke, mbur Maseduwan ngi Tesaloniki. 3Li naŋ muwun na, i ndilam a Sidoŋ. Zuliyus ada ga mezle da Polo haɗa, vurˀe a vulaŋ jiviɗ ɓa aru ng'avi ngama naŋhaya, ɓa a lum gwat avu taŋ. 4Ndra mislikiɗam baɗ akẽh na, i kam kini ti ciki hirwuy Sipre, asi burkataŋ ara go puɗak ar ndra. 5A dirba ndra mutuwuɗaka mubuliy ngi ciki Silisi ati Pamfili na, i ndilam ar walahay Mir, hirwuy Lisi. 6Adiga, madiɗa ngi sojehey a lum palalam muso ti ngi hirwuy Alekzandir, ara zuɓ mulak nga Itali. Joˀ a ci ti ndra ng'araŋ. 7I ram zayãˀ zayãˀ, gwat ngi hin mbeˀ mbeˀ, hã i ra ndilam a Kinide tuwaˀ tuwaˀa. Burkataŋ matika ndra nga dirba nga dirba tuwa na, i cohom kini tivi Salomoŋ, a ciki matura ngi Kret. 8I kam ɓaˀa ti mibuzugumo, i sa ndilam tuwaˀ tuwaˀ ar li mazilaka Li Pi Sar Mezle, migweˀ avu walahay Laze. 9I zikam hã hin ngi dalyam ngi Yudehey a cuhu. Vurˀe, zuɓa mulak ti palalama naŋ ɓiɓir haɗi. Pol a wuɗ a ɓa taŋ wuluk naŋ, 10a ɓa taŋ: «Hey ngama ɗuwoy, i pura na, zuɓa mulak ndra hana, a sa hiryi gwat, yo a sa zizi gwatay haɗi. I palalam ati gwat ngi huroˀohoy tew ta ma, amma bis ta hirnga ndra vuna ma.» 11Amma madiɗa ngi sojehey a cin mi ngi mbur misi palalam ati ngi buy naŋ fineˀ ɓi ngi Polo. 12Ti kiya ngi burkataŋ na, cifi ar li pi sar ngi palalam na nah na, naŋ kuy ta. Vurˀe, vendeke ngi mizli a juwaka le a mevel taŋ, ɓa a cohom ti kẽh. A wuɗam, da a gi na, ara ndilam a Fenike, ɓa ara baka kiya ngi himiɗ a diga. Fenike i li pi sar ngi palalamay ar matura ngi Kreta, hiri pulaˀ ngir ti ruwuy tisi pas ngi pastaˀ naŋ, yo ngir ti muŋ tisi pas ngi pastaˀ naŋ.

Burkataŋ angi mubuliy

13Ti himiɗ mifiɗek fiɗek vay ngi ruwuy maso na, taŋ a waka kaɓa a lumaka gwat taŋ muwuɗama le, vurˀe, a zuɓaka ɓiri ngi cica palalama. A tutumaka ngi ru nga ciki matura ngi Krete. 14Amma neˀ si na, burkataŋ gambara mazilaka ‹himiɗ vay muŋ ngir tisi pas ngi miprike›, a slikiɗo tir matura, a so luuma taŋ. 15Burkataŋ ara kil ti palalama. Ti ndra mupuraka palalama anta ngira burkataŋ gu mata na, i pulakaŋ vu mbak, i ra ram nga zizi. 16I cohom ti ciki matura meciɗek ada, a zilaka Koda, a tika ndra himiɗe neˀe. Joˀ i tikaka ˀay da palalam meciɗeke tuwaˀ tuwaˀa. 17A dirba nah, i zuɓaka palalam meciɗeke humbaɗ mi ng'ar palalam madiɗa, dar migi slra ngir yamaya, a vahaka zeweɗ da palalam madiɗa ɓa jinaŋ, yo taŋ mazluwunam vur taŋ mara tikam is angi muyuŋ ngi mi buzugum ngi hirwuy Libi na, a kusluroko zana#27.17 Zana hana, mekelemey a zilaka ɓiri mududok ngi cica palalam ar mubuliy. maru ti palalama, a pulaka ɓa himiɗ a kil taŋ kahana. 18Burkataŋ ara ga ndra bonoy ti gidaŋ ava na si. Li naŋ muwun na, i hizigaka gwat ngir palalamaya ng'ar yam. 19Yo angi hin mimakir naŋ na, misi palalamaya, taŋ ti haŋ taŋ, a hizigaka gwatay maram ti palalam avra. 20A gi le hin mbeˀ mbeˀe, ko pas, ko wurzlahay anta puram ta, amma burkataŋ migi ɗaˀ kanah ta, ara muɗa ndra didak na si. Ar nah na, ɓa i njaham hiri, i sa laham na, anta mata. 21Mizli ngir palalamaya, ko a zumam gwat neˀ ta wãˀ hin mbeˀ mbeˀe. Dar Pol a cici deŋ a wuzla taŋ, a ɓa taŋ: «Ngama ɗuwoy, puraka so. Ya muɓukum i pulaka Krete ta na, da ani ki cinikiy mi le zleˀe na kuy, anja ni i hiryaka gwataya, yo i zizaka taŋ lambaˀ ta takwa? 22Amma wurenna, ambuh kum, anja ki zluwunam ta si. Ko mbur pal asi kum masa zizi anta, sey palalam tewle masa hiryi ɓula. 23Asi mike na, modro ngi Bumbulvuŋ ɗu ya mahuruk huruk a mbuŋ naŋ na, a bigiy vu le ngi duvuɗ nga dana vuna si, 24yo a ɓiy na: ‹Pol, ki zluwun ta, anja ki ra cici gbaˀ a mbuŋ buy mimadiɗa ngi Roma, mizli kum misi bumoˀ a hur palalama gar na, Buymisemuŋ a puluw siifa taŋ le asi haŋ ɗike, ɓa ki ra tuwuɗam.› 25Tusom didak so ngama ɗuwoy. Asi yi pula hirnga ɗu le wãˀ da Buymisemuŋ, gwat naŋ miɓiy di na, a sa gi kanah gisiŋ. 26Amma so na, palalama, a sa ra tiki is ti ndra ar matura ɓula.» 27Ngi duvuɗ mukuruˀ nga mufaɗ naŋ na, burkataŋ ara kil ti ndra ar Mubuliy Mediterane na si. Ng'avu wuzla duvuɗ na, misi palalamaya, a waka kaɓa ara lumaka hirwuyo gweˀe. 28Dar a waka jileŋ ngi yama ti zeweɗ ɓiri kaˀ ava. A lumaka na, naŋ metir kukur makir nga tarnaˀa. Ne nga mbuŋ ma na, a waka ma, a lumaka na, metir kukur cuw nga dangafaɗa. 29A ra zluwunam vur palalam mara dumbusl ɗugur asi yam, vurˀe, a pulaka ɓiri ngi cica palalamay mumufaɗ vay dirbahaya ng'asi yam, a kutukoko li ɓa a wuno ti yam ar gojogoɗo. 30Mukukuro palalamaya, ara puram jiviɗ ngi sumuɗ le tir palalama. A poko sar ti palalam meciɗek tuwa ng'ar yam, a gam kaɓa a ram nga pula ɓiri vay ngi mbuŋhoy ngi cica palalama. 31Pol a ɓa sojehey ati madiɗa taŋ: «Da mizli misi palalamaya, t'anta a hur palalam aka ta na, ki laham gu ta.» 32Dar sojehey a slaka zeweɗ ngi palalam meciɗek tuwa, a pulaka mbak a ru. 33Ti taŋ makutukoko li masa wun tuwa na, Pol a ɓa mizli gar ɓa a zumam gwat, a zla a ɓa taŋ na: «A gi le dana hin kuruˀ nga mufaɗa, ki ra kutukom, manja zuma gwat. 34I ɓukum na, kum zumam ɗafa muduba. Asi kum ti may naŋ ɓa kisa lahama, yo i mukum hiri naŋ ava ma, ko mbur pal asi kumo, masa ziza himac ngi hirnga naŋ pal, anta.» 35A dirba naŋ miɓi kahana na, a zuɓa ɗaf, a ga sise da Buymisemuŋ a mbuŋ mizli gar, a ngila, dar a zla a zum. 36Joˀ taŋ gar a tumom vu muduba, a zumam aya. 37Ndra jom gar ndra a hur palalama, mizli skat skat cuw ti kukur tarnaˀ nga merkeɗe. 38A dirba taŋ mimbam na, a zliɗaka daw alkamari ng'ar yam, ɓa a ga kefek neˀ da palalama.

Diɓel ngi yam muwaha palalam meɗ meɗ

39Li muwun muduba na, misi palalamaya, a sinaka taŋ aka mata. Amma a puram sliŋ muyuŋ sliɗ a miyam mici zoɗ nga wuzla hirwuy, taŋ a wulkam, da a gi na, ara tikam is ti palalama angaŋ. 40Dar a slaka ɓiri ngi cica palalamaya, a pulaka taŋ ng'asi yam, naɓa ara puskaka zeweɗ mujuwam taŋ dum ngi misi palalama cici. Joˀ a slikiɗaka godo ngi mbuŋ palalama, ɓa himiɗ a hizigiɗa nga mibuzugum. 41Amma palalam ara lum muyuŋ tisi yama. Mbuŋ ngi palalam a cici kaŋ avu muyuŋ, a wus mata. Angi nah, yam a slikiɗo fuyõ fuyõ ti gidaŋ, diɓel naŋ a waha virzi ngi palalama meɗ meɗ wãˀ. 42Sojehey a wuɗam ɓa a kiɗaka dangayaya vagay vagay zleˀe, vur taŋ masa kaka yama, a kilam. 43Amma madiɗa ngi sojeheye, naŋ a wuɗ laha Polo. Vurˀe a tika taŋ, ɓa a gaka gwat taŋ majuwaka a mevel taŋ na ta. A ɓa mizli misina ki yamaya, ɓa a ndilam dumbuŋ ar yama, a ndilam nga ˀaydidike. 44Is ngi mizli mindirama kwana, a sa tuwuɗam ti dum misliprak sliprak ati mupuɗaˀ puɗaˀ ngi palalam muwuh tuwa. Naŋ kahana, mizli gar mindilam zuy zuy a ˀaydidike.

Currently Selected:

SLRA 27: BEGDC

Highlight

Copy

Compare