SLRA 23

1Pol a ɗuva hiri taˀ ar mizli ngir kus ngi ngilawuy madiɗa tuwa, a ɓi: «Sukum ɗuwoy, ya mindirawa a mbuŋ Buymisemuŋ hã dana na, ar wuluk ɗu, ɓi ngi mbiɗiy hirnga aseˀe na, anta ko neˀ ta.» 2Amma Ananiyas, masay madiɗa, a ɓa mizli ngi cikeˀeheye ɓa a kiɗaka Pol avu mi. 3Dar Pol a ɓaŋ: «Buymisemuŋ a sa kiɗ di i ka, ka mohol mupuyaŋ burkoɗoko le! Ki cifi le ngi gi kiita kaɓa Ɓimujuwa miɓi. Na, ki hirsa ɓimujuwa ma, ki ɓi ɓa a kiɗikiy vur mike?» 4Mizli ngi ciki Poloy tuwa a ɓakaŋ: «Ki za masay madiɗa kwa?» 5Pol a mbiɗa taŋ di: «Sukum ɗuwoy, i masay madiɗa na, i si na zleˀe ta. Asi mike, a tohoko na: ‹Ki za mbur madiɗa ngi mizli ɗikeye ta.›» 6Pol a si na le, zigiduw mukos kos na, cah mekelemey i Sadukihey, yo cah numuŋhoyo kwana, i Farisahay. Vurˀe, a zla tila mi a wuzla kus tuwa, a ɓi: «Sukum ɗuwoy, yi mbur Farisa, mangal ngi mbur Farisa. Muwudam ti ya na, asi njaha hiri ndra, mizli mumucahay a sa slikiɗam a muŋ na.» 7Mingiɓi hana mikiɗ mi wãˀ t'aruŋ si na, ngilami a slikiɗ ar wala ngi Farisahay ati sadukiheye, kus nah na a wunuk a wuzla cuw. 8Asi mike na, Sadukihey a ɓam: «Mizli mumucahay anta sa slikiɗam ta, modro ngi Bumbulvuŋ anta, yo musuɗukoy anta.» Amma Farisahaya, taŋ a tiɓaka le taŋ gar. 9A ra tiram kuy kuy wãˀ. Farisa mekelemey a wuzla buy ngi ɓimujuwahay a slikiɗam, a ngumam ta, a cicam kaŋ kaŋ, a ɓam: «I lumam ɓi ngi mbiɗa hirnga da mbur hana ta wãˀ. Asinta, musuɗuk mekelem pal malla modro ngi Bumbulvuŋ a ɓaŋ ɓi le kwani!» 10Tiri mandih ti gidaŋ tuwa na, buy ngi sojehey a zluwun, vur taŋ masa puwaka Polo minjeɗ minjeɗe. Vurˀe, a ɓa sojeheye, ɓa a pam sar, ara ɗiɗaka ti wuzla taŋ, ɓa a mam di ng'ar hay ngi sojehey a muŋ. 11Ngi duvuɗ nah na, Bumbulvuŋ a biga vu da Polo, a ɓaŋ: «Ɓusa ɓus! Ki ga sedewo ɗu le a Zerusaleme, anja ki ra ga a Roma kanah ma.»

Migam gidiɓi ngi ziza Pol

12Put ngi miprik naŋ na, Yudehey a gam gidiɓi, a hudumom, a ɓam: a zumam gwat ta, a sam gwat ta, sey da a kiɗaka Polo le vagay ɗagay far. 13Mizli migam gidiɓi vuna, a funaka mizli kukur mufaɗa le. 14A ra lumaka masay madiɗahay ati mizli micawwahaya, a ɓaka taŋ: «Ndr'i hudumom le, i ɓam: i zumam gwat ta, i sam gwat ta, sey da ndra mikiɗaka Polo le vagay ɗagay far. 15Ani so na, kumo, jumom ati mingila wuy ngir kus madiɗahaya, ɓaka buy ngi sojeheye, ɓa a sukum ti Polo, kaɓa ngi ka virzi naŋ kuy kuy. Ndra kwana, naɓa i wam vu le weˀ, ɓa hã a sa ndilo tikeˀe avu kum na, i kiɗaka le vagay.» 16Amma gumseˀ ngi Polo, a cine ɓi taŋ majuwaka a mevel taŋ na le. Aru ng'ar hay ngi sojeheye, a ci, ara fa ɓi nah fet da Polo. 17Angi nah na, Polo zil mbur pal a wuzla soje madiɗahaya, a ɓaŋ: «Aru ti mangal gawla hana ng'avu buy ngi sojehey ta kwa. N'ada ti ɓi neˀ ngi ɓaŋ di.» 18Dar madiɗa ngi sojeheye, a zuɓa mangal tuwa, aru di ng'avu buy ngi sojeheye, a ɓaŋ: «Pol, mbur dangay na, a ziliy, a ɓiy ɓa yi suw ti mangal gawla misenna. N'ada ti ɓi neˀ ngi ɓuw di.» 19Buy ngi sojehey a ja mangal gawla tuwa kaw avu haŋ, a kirih di baˀ neˀ, a cufuɗaŋ: «Ki wuɗ ki ɓiy mbrike?» 20Mangal a mbiɗaŋ di: «Yudehey a ngiɓam ˀay le ngi cufuɗuw, ɓa ti prike, a ram ti Polo ng'ar kus madiɗa ngi ngilawuyo. A ɓam kaɓa kus taŋ madiɗa ngi ngilawuyo, naŋ da ti may ngi ka virzi ngi Polo kuy kuy. 21wãˀ naŋ na, anja ki cine taŋ di ta. Mizli fineˀ kukur mufaɗa, a wam vu le weˀ. A hudumom le, a ɓam: ‹I zumam gwat ta, i sam gwat ta, sey da i kiɗaka Polo le vagay ɗagay far.› Taŋ a wam vu le zlezle si, a kutukom na, ɓa ki zil mi.» 22Buy ngi sojehey a ɓa mangala: «Ɓi ka muslufiy di misenna, ko ki ɓa da mbur ta wãˀ.» Joˀ a pula mangal a ru.

Mislinam ti Pol ng'avi Felikse, buy miwi li

23Dar buy ngi sojehey tuwa, a zil mizli cuw a wuzla madiɗa ngi sojeheye, a ɓa taŋ: «Juwam vu, hilam sojehey skat skat cuw, misi pilisey kukur tarnaˀ, yo misi ziwitey skat skat cuw, ɓa hirak ti ci nga viŋ na, kisa ram nga buy mimadiɗa. 24Anja ki wuɗam pilisey, ɓa Pol a sa jiɗ anga ya, ɓa ki ram di da Felikse, buy miwi li, anja ko gwat a gaŋ neˀ ta.» 25A tuh ɗerewol toh toh, a ɓi anga na: 26«Felikse, buy miwi li, buy ngi ngilawuy, zuy zuyo ya, i ya Klod Lisiyas matuhuw ɗerewol misenna. 27Yudehey a ndilam vu kuvbum angi mbur ya maslinuw di hana na, a wuɗam a kiɗaka vagay zleˀe. Amma ti ya micina i mbur Roma na, yi hil sojehey, dar i ra loho di. 28Ti ya muwuɗ ɓa yi si na gwat taŋ muwudam di hĩˀĩ aseˀe na, yi ru di nga mbuŋ kus madiɗa ngi ngila wuyo. 29Yi luuma na, a wudam di asi ngila mi vur ɓimujuwa taŋ. Amma ko a gi gwat malambaˀ neˀ, ɓa a kiɗaka vagay malla a juwaka ti celelu vurˀe ta. 30Ti ya micina Yudehey a gam gidiɓi le ar mbur misenna na, yi slinuw di kutum. Yi ɓa mizli mijakaŋ ɓi vuna, ɓa ara wudam di a mbuŋ ɗike.» 31Sojehey a zuɓaka Polo, a ram di ngi duvuɗo sesẽŋ a Antipatris kaɓa miɓaka taŋ di. 32Li naŋ muwun na, a pulaka misi pilisey a ram di, joˀ taŋ a moko ng'ar hay ngi sojehey a muŋ. 33Misi pilisey tuwa mindilam ndil a buy mimadiɗa si na, a vulaka ɗerewolo waɗ Polo da Felikse, buy miwi li. 34Buy miwi li muslufa ɗerewolo slaf slaf na, a cufuɗa Polo: «A yukuw ar hirwuy wanaka?» Ti naŋ micina Pol i mbur ngi hirwuy Silisi na, 35a ɓaŋ: «Da mizli muwudam ti ka, a sa ndiloko le na, i sa cine mi ngi balam ɗike.» Dar a ɓa sojeheye ɓa a jiginaka Polo ar hay ngi buy Herodo.

Currently Selected:

SLRA 23: BEGDC

Highlight

Copy

Compare