SLRA 11

Piyer muslufa ɓi naŋ a mbuŋ Cikil ngi misikristuhoy a Zeruzalem

1Misliney ati mitiɓi ngi Yudeheye, a cinam na, mizli Yudehey ta kwana, a tiɓaka ɓi ngi Buymisemuŋ le ya. 2Ti Piyer mindilo a Zerusalem na, mizli micam le a mizawa, a mbiɗakaŋ hirnga, 3a ɓakaŋ: «Ki ci le a hay sukwi ngi mizli macam mizaw ta, hã ki zumam gwat le bumoˀ.» 4Dar Piyer a slufa taŋ ɓi nah zle avu zli virzi naŋ ti sila ti sila. A ɓa taŋ: 5«Ti ya misi ar walahay Zafa ar li diradibiɗ na, i pur gwat ti kleŋ. Gwat ara po sar ti muŋ, naŋ kaɓa godo madiɗaŋ, a sin kini ta, a jaka mivay naŋhaya le kaw kaw mufaɗ taŋ, a po sar ti muŋ, a so sesẽŋ kasl avu ya. 6Yi ɗuva hiri taˀa, keɗ keɗ na, sukwi ngi gwat misahmi ngi ruwuyoy, useˀ ngi ɓuhoy, gwat mukurmuɗ ti kwacayay ati sukwi ngi ɗiyuwoy. 7Dar yi cin ˀay ngi mbur, a ɓiy: ‹Piyer, slikiɗ, sli ˀay naŋ ɓa ki zum!› 8Amma yi mbiɗaŋ di: ‹Buymisemuŋ, ndiɗaˀ wãˀ, asi gwat mitika le, malla gwat misi dili gar na, a ci ɗaˀ a balam ɗu ta wãˀ si.› 9ˀAy tuwa a cino ngi mucuw naŋ paɗ a muŋ, a ɓiy ma: ‹Gwat Buymisemuŋ mitiɓa le i ngi zum na, ka ki tiri di gwat lambaˀ ta.› 10A gi kanah kanah hã is makir, dar gwat tuwa gar a mi nga muŋ a muŋ. 11Angi nah vuna si na, keɗ na, mizli makir dedeŋ ar hay ndra misi anga tuwa, a slinoko taŋ baɗ a buy mimadiɗa nga vi ya. 12Dar ˀUf Mipal a ɓiy ɓa i ram ati mizli tayna manja wuluk cuw cuw. I sukum ɗu mitiɓi mimerkeɗ hanayna mikisikiy, dar i cam ngi hay Korneye. 13A slufa ndra, naŋ mupura modro ngi Bumbulvuŋ mibigaŋ vu a hay naŋ, miɓaŋ: ‹Slin mbur nga Zafa ɓa ara zilo Simoŋ mazilaka ti migal Piyer na. 14A sa buguw gwat masa lihuw, ka ati hay ɗik gar.› 15Ti ya mizla ɓa i ɓi si na, ˀUf Mipal a po sar ar taŋ kaɓa ti naŋ mipo sar zleˀe ar ndra na ya. 16Dar i wulka mingiɓi ngi Buy Yesu keŋ, a ɓi: ‹Zaŋ a ci mizli ar yam tewle, amma kumo, kisa lumam ci ar yam ti ˀUf Mipal.› 17Da Buymisemuŋ a vulo taŋ gwat mupurla ati ngi ndra le, asi tiɓi Buy Yesu Kristu na, yi mbur ngi tika Buymisemuŋ ar slra naŋ kwa?» 18A dirba taŋ micinaka mingiɓi hana na, mevel taŋ a tisl le, dar a hunumaka Buymisemuŋ, a ɓam: «Pura, Buymisemuŋ a pula jiviɗ le da mizli Yudehey ta, ɓa a mbiɗam mevel, a lumam siifa ya.»

Cikil ngi misikristu ngi Antiyosoy

19Hirak ti mikiɗaka Etiyen vagay tuwa na, ara guzuvuraka Cikil ngi misikristuhoyo, a zliɗam hirnga mber mber, mekelemey a ndilam hã a Fenisi, a Sipre, yo a Antiyos. Amma a tilam mi ti ɓi ngi Bumbulvuŋ sey da Yudehey tewle. 20Dambalaka mitiɓi mekelemey a wuzla taŋ, i mizli Sipre ati Sireney, taŋ mindilam a Antiyos na, a tilam mi ti Ɓimezle ngi Buy Yesu da Grekey aya. 21Bumbulvuŋ ara jina taŋ haɗi teˀe, hã mizli haɗi a mbuɗoko ng'avu Bumbulvuŋ, a tiram mitiɓihey. 22Cikil ngi misikristu ngi Zeruzalemeye, a cinaka ɓi nah le, dar a slinaka Barnabas nga Antiyoso. 23Ti naŋ mindil na, a pura gimezle Buymisemuŋ miga da mizli na le, a mumul haɗi, a vula taŋ gidaŋ ɓa a ndiram gumbaˀ avu Bumbulvuŋ ti mevel taŋ wãˀ. 24Asi mike na, Barnabas i mbur mikaslsla, a nih le ti ˀUf Mipal waɗ ti tiɓi. Zigiduw haɗi a jumo ng'avu Bumbulvuŋ kahana. 25Joˀ Barnabas aru nga puro Sawul a Tarse. 26A luuma a diga, dar a so di nga Antiyos. A gam vi soŋ wãˀ bumoˀ ar li gi slra a wuzla Cikil ngi misikristu tayna, yo a dubunaka gwat da zigiduw taˀ kuy kuy. Mizli a zlaka zila mizli ngisi Yesuhoyo «misikristuhoy» dumbuŋ na, a Antiyos vuna. 27Ti di nah na, mijiviɗey a ram baɗ a Zerusaleme nga Antiyos. 28Mbur pal a wuzla taŋ, a zilaka Agabus, ˀUf Mipal a njikaŋ di na, may a sa gi haɗi asi ruwuy gar. A gi le gisiŋ ti Klod mazum buyo. 29Dar mitiɓihey a ɓam ar wala taŋ, ko wa gar a vul gwat neˀ avu gidaŋ naŋ, ɓa a slinam di ngi jina sukum taŋ mitiɓihey misi angi hirwuy Yude gar. 30A gaka le kanah. A sa vulaka gwat nah, a haŋ Barnabas ati Sawul miram di da mizli micawwahaya.

Currently Selected:

SLRA 11: BEGDC

Highlight

Copy

Compare