TESALONIKEY MUCUW NAŊ 3
3
Diram dibiɗ vur ndra
1Sukum ndrahay, ɓi mindir ngi ɓukum di na, anihĩ: diram dibiɗ vur ndra ɓa ɓi ngi Bumbulvuŋ aru nga mbuŋ kutum kutum, yo ɓa mizli a duduɓaka ɓi nah kaɓa kum mududuɓaka a hay kum na ya. 2Tumbuloko Buymisemuŋ ma ɓa a laha ndra avu mizli malambaˀ misi moˀoreheye. Asi matiɓaka Ɓimezle hana, i mizli gar ta. 3Amma Buymisemuŋ naŋ kaslsla. A sa vulukum gidaŋ, a sa jiginukum avu Satana. 4Asi ndra mujom ati Buymisemuŋ na, kumo, i sinukum le njah, gwat ndra muɓukum di le ngi gi gar na, ki ra gakaŋ, yo kisa gaka nga mbuŋ ava na si. 5Anja Bumbulvuŋ a bugukum jiviɗ ngi wuɗa Buymisemuŋ a mevel kumo ati ngi ɓusa ɓi Kristu muɓusa na ya.
Gi slra i gwat mupuɗaw wãˀ
6Sukum ndrahay, ambuh ambuh kum, ti slimiɗ ngi Buy ndra Yesu Kristu: sukum kum masafayahay ati masipaka ɓi ndra madubunukum di ta gar na, kiraham kileŋ avu taŋ. 7Kumo, ki sinaka sipa sar ndra le kuy kuy, asi ndra micifam a wuzla kumo zleˀe na, ndr'i masafayahay ta. 8Ɗaf ndra muzumaka na, i cufuɗam ɗaˀ avu mbur ta wãˀ. Amma duvuɗ ti papas gar na, i ra gam slra hã i giram kupuyah kupuyah wãˀ, ɓa i vulam gir da mbur pal a wuzla kumo ta. 9Anja zliv ndr'ada ti jiviɗ ɓa i cufuɗukum, ki jinam ndra vuna zleˀe ngbaŋ, amma ndr'i wuɗam na, ɓa bugukum gwat mezle ngi gi. 10Naŋ kine, ti ndra misi zleˀe a wuzla kumo, i ɓukum na: «Da mbur a ngum ngi gi slra ta na, anja a zum gwat ta ya.» 11Ani, i cinam ma na, mizli mekelemey ada a wuzla kumo, i masafayahay, a cam tos tos lambaˀ ar ɓi ngi mizli, t'anta ngumam gi slra ta wãˀ. 12Mizli misi ka tayna na, anja a gam slra ti mi teˀteˀe, ɓa a zumam gidaŋ taŋ. Ndra maɓaka taŋ ati ndra makutaka taŋ kahana na, ti slimiɗ ngi Buy ndra Yesu Kristu. 13Kumo so na, sukum ndrahay, anja ki pulaka gimezle ta. 14Da mbur anta ngum tiɓa ɓi ndra maɓaka angi ɗerewol hana ta na, jaka buy naŋ kaw a hirnga kumo. Anja ki jumom ati naŋ mata wãˀ, ɓa a gaŋ mesem. 15Na so na, anja ki puraka kaɓa i mesene kum ta ɓula, amma kum kutakaŋ kaɓa i sukum kum misikristu si.
Ɗuwula mi ati ji haŋ
16Anja Bumbulvuŋ, buy ngi zuyo, naŋ ti haŋ naŋ a vulu kum zuy ndrehhe ti jiviɗ wal wal gar. Anja Bumbulvuŋ a ndir ati kum gar. 17I ya Pol majukum haŋ ti haŋ ɗu. Ɗerewol ya matoho taŋ gar na, i ɗuva haŋ ɗu angi taŋ, i toho kahana. 18Anja Buy ndra Yesu Kristu a gukum mezle gar kumo.
Currently Selected:
TESALONIKEY MUCUW NAŊ 3: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.