SAMUYEL MUCUW NAŊ 2
2
A caka Davit i buy madiɗa ngi Zuda a Hebroŋ
1A dirba ɓi tayna mucohom na, Davit a cufuɗa Buymisemuŋ: «Ani, i ru ng'ar walahay purla a wuzla walahayay ngi ruwuy Zuda kwa?» Buymisemuŋ a ɓaŋ: «A ru.» Davit a mbiɗaŋ di: «I ru ng'ar walahay wanaka?» Buymisemuŋ a ɓaŋ: «Aru nga Hebroŋ.» 2Davit a ru, waɗ ngwas naŋhaya cuw taŋ aseˀeŋ, i ti Ahinoˀam, zuŋ Zisreyel, yo Abigayel, ngwas ngi Nabal zleˀe ngir walahay Karmel. 3Mizli ngi seˀeheye, a ram aseˀe ya. Mbur gar ati hay naŋ ati hay naŋ. A cifam ar walahayay ngi ruwuy Hebroŋ. 4Dar mizli Zudahay a soko, a caka Davite i buy Zuda a diga so. Mizli a soko, a ɓaka Davite na: «Midikaka Sawul na, i mizli ngi Yabesey ar hirwuy Galaˀat.» 5Davit a slin ng'avu mizli ngi Yabesey ar hirwuy Galaˀata, a ɓa taŋ: «Kum midikaka buy kum Sawul, yo kum mibigaka gi mezle kum ava ti slra misi kahana na, anja Buymisemuŋ a ɗuwulukum mi.» 6Wurenna, anja Buymisemuŋ a gukum mezle naŋ, yo a gi kaslsla avu kumo. Ya kwana, i sa gukum di i mezle mupurla nah, asi kum migam kanah na. 7Wurenna so na, ndiram gidaŋ gidaŋ, yo ndiram wirwir. Naŋ kanah, buy kum Sawul a muc le, yo sinaka sin le, Zudahay a cikiy ya le, yi buy ngi Zuda.
A caka Isebaˀal i buy madɗiɗa ngi Israyel
8Abner, mangal ngi Ner, i buy ngi soje ngi Sawuloy. Aru ti Isebaˀal mangal ngi Sawulo nga Mahanayim. 9A caŋ buy a diga ɓa a zum buy ar hirwuy Galaˀat, hirwuy Aser, Zisreyel, hirwuy Efrayim ati hirwuy Benjameŋ, a wuɗ a ɓi na, a hirwuy Israyel gar si. 10Isebaˀal, mangal ngi Sawulo, naŋ mitiri buy ngi Israyel na, naɓa naŋ ti vi kukur mufaɗa. A zum buyo vi cuw. Amma Zudahay a sipam nga taŋ i Davit.
11Davit a zum buy ar Zudahay a Hebroŋ, a gi di vi tarnaˀ ti kiya merkeɗe.
Kiɗavu ar wala ngi Zudahay ati Israyeley a Gabaˀoŋ
12Abner, mangal ngi Ner ati gawla ngi Isebaˀalay, mangal ngi Sawulo, a bam baɗ a Mahanayime, a ram kini nga Gabaˀoŋ. 13Zoˀap, mangal Seruya ati soje ngi Daviteye kwana, a bam a zuɓam jiviɗ aya. A gam vurum gweˀ avu futuŋ ngi Gabaˀoŋ tuwaŋ. Mizli mekelemey a pam sar ti duba futuŋ ti diga, yo numuŋhoyo kwana, a pam sar ti ka. 14Abner a ɓa Zoˀapa na: «Yi wuɗ na, anja gawla sojehey a slikiɗam, a gam dungur ti kiɗa vu pal taŋ a mbuŋ ndra aka.» Zoˀap a mbiɗaŋ di: «Anja a slikiɗam a gam.» 15Akẽh na, sojehey a slikiɗam, a slufaka taŋ na, ngi kwacay Benjameŋ, mizli ngisi Isebaˀal, mangal ngi Sawulo, taŋ kuruˀ ngaŋ cuw. Yo ngisi Daviteye kwana, soje kuruˀ nga cuw. 16Mburo gar a ja hirnga ngi mesene naŋ luɓ nga ruwuy, a zligaŋ ar cakaya ti maslalam, mbak taŋ gar taŋ a ndilam a micam. Vurˀe, a zilaka li ngi Gabaˀoŋ nah guva ɗugur. 17Tapasa, kiɗa vu a gi le tuwaˀ haɗa teˀe. Soje ngi Davitey a kiɗaka Abner ati mizli Israyeleye. 18Zoˀap, Abisay ati Asayel, i ziri ngi Seruyahay makir taŋ, t'ada ti di nah ar kiɗa vu nah. Asayele, Sara kefilew kefilew, a kil ka muuni. 19Asayel a bi ɓaˀ asi Abnere, manja a ngizli ti gula ti hazum. 20Abner, a mbuɗo hiri, a cufuɗaŋ: «I ka Asayel kwa?» Asayel a mbiɗaŋ di: «I ya Asayel.» 21Abner a ɓa Asayel tuwa: «Ngizli ti gula malla ti hazum, ji asi gawlahay na purla, tiɓa gwat naŋhaya da ka.» Amma Asayel a ngum pula sipa Abnere ta. 22Abner a ɓa Asayel tuwa ava ma: «Kirih, puliy, ki sipiy ta. Malla ki wuɗ ɓa i zlumburuw kwa? Naɓa y'anta i sa pura hiri ngi sukum ɗik Zoˀapa mata.» 23Amma, Asayel anta ngum ɓa a kirih ta. Akẽh na, Abner a kiɗa asi hur ti virzi ngi ziwit naŋ. Ziwit a bi gor njoŋ. A diɗ ar li nah vuna, a muc daˀ arleˀe. Mizli mindilam le gar ar li Asayel midiɗ tuwa na, a cicam deŋ le. 24Akẽh na, Zoˀap ati Abisay a cam sipa Abner tuwa. A ra ndilam a Gibeya. Amma na, naɓa pas ara diɗi. Gibeya naŋ tisi pas ngi miprik ngi Giya, ar jiviɗ nga wuzlaɓuh mikirɗak kirɗak ngi Gabaˀoŋ. 25Soje ngi Benjameŋhey a kusom ngasl ngasl a duba Abner, a cifam a hirnga muwã. 26Abner a tila mi da Zoˀap, a ɓaŋ: «Ki wuɗ maslalam a zuma mizli ko mbak le ta si kwa? Kiɗa mi naŋ i ndurɓo hiri na, ki si na ta kwa? Ki sa ɓa mizli ɗikeye, a sa pulaka sipi sukum taŋhay nder nder na ti vunaka?» 27Zoˀap a ɓaŋ: «I ra ɓuw ti slimiɗ ngi Bumbulvuŋ misi ti siifa, da ki ɓi zleˀe ta na, sipi sukumuŋ minder nder hana, anta pul ta hã tipriki.» 28Zoˀap a fi tulum. Mizli naŋhay a pulaka sipi Israyeleye, anta kiɗam vu mata. 29Abner ati mizli naŋhaya, kap ngi duvuɗo, a ram tir sozo ngi mizaw Zurdeŋ. A tuwuɗaka Zurdeŋ. A ngiraka Bitroŋ kããk, hã ara ndilam a Mahanayime. 30Ti Zoˀap mupula sipa Abnere na, a kuso mizli gar. A wuzla gawla ngi Daviteye, mizli anta kuruˀ nga ngoltir waɗ Asayel. 31Gawla ngi Daviteye, a kiɗam a wuzla mizli Benjameŋhey waɗ a wuzla mizli ngi Abnereye, skat skat makir ti kukur merkeɗe. 32A zuɓaka vagay ngi Asayele, a raka ka ar zivi ngi cine a Betelyem. Akẽh na, Zoˀap ati mizli naŋhaya, kap ngi duvuɗo ar li ru. Yo li mira wun weh weh na, ara ndilam a Hebroŋ.
Bible en Langue Guiziga © L’Alliance Biblique du Cameroun, 2011.