Sáni Markusï 5

Jerasa anapu acheti enka nóampakiti incharhetini jápka

(Mt 8.28-34; Lk 8.26-39)

1Niárasptiksï jiniani japuntarhu parhimetini, Jerasa uanontani. 2Enka Jesusi icharhutarhu kétsepkia, kúmaspti acheti ma enka nóampakiti incharhetini jápka, enka uarhiri jatsintskuarhu uéntikupka, 3jimpoka jima irekaspka. Ka nónema úsïrempti p'ínkuni, náuek'i tiámu tepekata jimpo. 4Mémechaniksï tiámu tepekata jimpo jótaspti, ka ima kachunturhiasïrempti tiámuechani, nónema úsïrempti p'ínkuni. 5Juátarhu ka uarhiri jatsintskuarhu isï, méntkisï jiuakorheparini jámsïrempti ka tsakapu jimpo atakorheparini. 6Ka enka Jesusini iauani jatini erapka, uiriaspti kúmani ka tinkuixurhikuspti, 7ka uinhachaparini arhini:

–¡Jesusi, auantarhu anapu Diósï Uáp'a! ¡Ásïrini inchaakuche, kómarhixakakini, ásïrini nósesi p'ikuasta! 8Ísï uantakorhesïrempti jimpoka Jesusi arhispka:

–¡Nósesi jásï espiritu, uérhentsï íni achetini!

9Ka ístu kurhamarhespti:

–¿Nénari arhinhasïnki?

Ka ima arhispti:

–¿Anti nóri míteski na enkani arhinhak'a ji? Ji Lejioniska, ka no jík'ueska jimpokani jucha uáneska. 10Ka Jesusiniksï kánekua kómu arhispti eska no kéntitaapirinka. 11Ka no iauani jarharetini, juátarhu jantukutiniksï uánekua kúchicha jámaxapti t'ireni, 12ka nósesi jarhati espirituechaksï kómu arhispti Jesusini arhiparini:

–Kúchiachani jinkuntsïni axa ka íntskuts'ïni sésekua eskani jucha imechani incharheauaka. 13Jesusi jiáretaaspti, ka nósesi járhati espirituechaksï achetini uérhentaspti, ka iúmu irepeta ísïsptiksï enkakï kúchichani incharheapka, ka ísku úntasptiksï nósesi jántu ka kétsemantu isï uiriani. Japuntarhuksï inchameraspti ka jimaksï uarhimespti. 14Ka kúchi erankutichaksï uiriaspti sïpakorheni ka iretarhu ka juátecharhu isïksï uantant'a'spti. Ka uánekua ninhaspti exenhani ampesï úkorheni japi. 15Eka niáranhapka jima enka Jesusi jápka, ima acheti enkaksï nósesi járhati espirituecha incharhetini jápka, uaxakatixaptia xukuparhantatini ka míakua jinkuni. Ka chérakorhenhatixapti. 16Ka ima enkaksï Jesusini exepka, néna enka ampakerantapka imani achetini, enkaksï nósesi járhaticha incharhetini jápka, ka enkat'uksï exepka nénaksï jámaspki kúchicha, imaksï aiankuaspti máteruechani. 17Ka arhisptiksï Jesusini eska uéakuntapirinka imani iretarhu.

18Enka Jesusi jatant'a'ni jápka icharhutarhu, ima acheti enka Jesusi ampakerantapka, kómu arhisïrempti eska jiáretapirinka chúxapani. 19Ka Jesusi ménteru arhispti:

–Ni níntani, ka aiankpe eskakini Acha ampakerantaska ka eskakini kóntentaska.

20Ima acheti níntaspti, ka uantant'a'spti eska Jesusi ampakerantaspka; ka ísku pakareranhaspti.

Jáirueri uátsï ka uarhiti p'amenchati

(Mt 9.18-26; Lk 8.40-56)

21Enka Jesusi icharhutani jatarini ménteru parhimentapka, uanamukutini pakaraspti ka uánekua tánkorhenhantaspti. 22Jima antarheraspti Jáiru, enka k'umanchekua tánkorhentskuarhu urhets'ïkuripka, ka Jesusini exerini, tinkuikuatsekuspti. 23Ka kánekua kómu arhiparini arhispti:

–Jucheti uátsï nanaka uarhixati; ju p'áts'ïkuni eska ampakentaaka ka eska sánteru irekaaka.

24Jesusi niraspti ima jinkuni, ka uánekuaksï chúxapaxapti, katsinhperapanhaxapti. 25Jima niraxapti ma uarhiti enka témpeni tsimani uéxurhinipkia enka p'amenchaparini jámani jápka, iurhiri késkuparini. 26Kánekua ka ióni mískorhesptia, ka uánekua tsinap'irichani maiamuasptia, ka nómpema marhuakuspti, sánteru kánerapaxapti p'amenchakuani. 27Enka kurhach'pepka eska Jesusi jimesï jámaxapka, ima uarhiti tátsepani isï inchaakurhaparini antankuspti Jesusini, ka xukuparhakua jupirhukukuspti. 28Jimpoka ísï eratsentaspka: “Xukuparhakuak'uni enkani jupirhukukuska, ji ampakentaaka.” 29Ka iurhiri anhakuataspti, ka ampakentani p'ikuarheraspti. 30Ka Jesusi p'irhipakurhispti enka p'ikuarherapka eska uinhapekua uérhespka, ka kurhamarhpespti:

–¿Nérinisï xukuparhakua jupirhukuche?

31Ka imeri jurhenkorherichaksï arhispti:

–Exexakari eskats'ïni katsinhaxaka, ka útasteruri kurhankorhesïnka, ¿Nérini xukuparhakua jupirhukucheski?

32Ka Jesusi p'irhip'irhinharhixapti, uékani exeni nésï xukuparhakua jupirhukukupki. 33Ka jimpoka ima uarhiti míakorhexapka ampe enka úpka, Jesusini chéparini ka manaraparini antarheraspti ka tinkuixurhikuspti, ka aiankunt'aspti. 34Ka Jesusi arhispti:

–Jucheti uátsï, chéti jakak'ukua jimpori ampakentaskia, ni níntani ka Diósïkini urhechepante.

35Enka Jesusi útasï uantani jápka, jimaksï niáraspti máru k'umanchekua tánkorhentskua urhets'ïkurio uératini, ka arhisptiksï nanaka sapichueri tátjempani:

–Chéti uátsï uarhistia, ¿Ampeteruri úni ók'utaxaki jurhentpirini?

36Ka Jesusi ísku kurhach'aaspti ka Jáiruni arhini:

–T'u ásï jáma chéni, mintsikarini.

37Pédru ka Santiagu ka Juánuni, taniperantku jiáretaaspti eskaksï pámpetapirinka. 38Ka enkaksï niárapka Jáiruo, exep'espti eska mískorhenhaxapka, ka eskaksï máru uinhamentu ueraxapka, 39inchaspti ka arhiani:

–¿Antisï xáni uenhak'i ka mískorhenhani? Nanaka sapichu k'uíxati, inte no uarhirixati.

40Ka Jesusiniksï teresmarhuspti, ka ima iámentuechani petarkorheantaspti, ka inchaspti jima enka nanaka sapichu ka tátjempa jápka, amampa ka imeri pámpirichani jinkuntku. 41Ka nanaka sapichuni jupik'uspti ka arhini:

–¡Talita kumi! (Enka arhikuekak'a: “¡Nanaka sapichu, t'únkenisï arhik'a, jauara!”)

42Ka nanaka sapichu jauarapaspti ka xanharantaspti, jimpoka témpeni tsimani uéxurhini jatirispkia. Ka kánekua ísku pakareranhaspti ísï exerini. 43Ka Jesusi arhiaspti eskaksï nónemani aiankupirinka ka arhiasptit'u eskaksï nanaka sapichuni t'irerapirinka.

Currently Selected:

Sáni Markusï 5: DKPJ

Highlight

Copy

Compare