Sáni Lúkasï 8

Uarhiticha enkaksï Jesusini jarhuatempka

1Tátsekua enka i ampe úkorhepka, Jesusi uánekua ireta k'ératicharhu ka ireta sapirhaticharhu jámaspti, Diósïri irechekua jimpanhe aiankperakuani arhits'ïkpeparini. Ka témpeni tsimani jurhenkorherichaksï pámpetapaxapti, 2ka ístuksï máru uarhiticha pámpetapaxapti enka ima ampakerantaapka ka máru enka nósesi járhati espirituechani petarhetant'a'apka. Imani uarhitichani jinkuni niraxapti, Magdalena arhikata ka Juanat'uksï jima niraxapti, ima Juana enkaksï iúmu tsimani nóampakiticha uérhentapka; 3Kúseri témpa, ima enka Erodesiri patsaripka ka Susana, ka uánekuateruksï uarhiticha enkaksï jatsikorhekua ampe jinkuni jarhuatauempka.

Tsíri jatsiriri uantantskua

(Mt 13.1-9; Mk 4.1-9)

4Uánekua uéakunhaspti iretecharhu Jesusini exeni, ka ísï jámani uánenhantaspti. Jimak'ani Jesusi arini uantantskua terukutarantskua aiankuaspti: 5“Tarheri ma niraspti tríju k'uáp'ani. Ka tríju k'uáp'ani jámani, máruksï tríjuecha xanhari antatseraspti ka t'auach'akunhasptiksï ka kuínichaksï ántaspti. 6Máteruksï namoni tsakapentu antatseraspti; ka enka na antarapka, itsïksï kueratanchani k'arhispti. 7Máteruksï namoni akarheni jinkuni antatseraspti; ka jimpokaksï márku antaraspka, akarheni óch'akuraspti. 8K'óru máteru namoni tríju ampakiti echerintu antatseraspti; ka k'éraspti, ka ampanharhiksï tríju jukaspti.”

Ísï uantaspti Jesusi ka uinhamu uantasptiteru: “¡Ne enkaksï kámka kurhankukua, kurhankueksï!”

9Jurhenkorherichaksï kurhamarhespti Jesusini, ima uantantskua terukutarantskua ampe arhikuekasïrempki. 10Ima arhiaspti: “Chánksïnksïni Diósï imeri irechekuarhu anapu ampe mítetaraxati enka nótki nema mítek'a, ka máteruechani uantantskua terukutarantskuechani jimpok'u aiankuasïnti, eskaksï ísï jámani no exeaka, náuek'iksï xáni éskani jarhani, ka náuek'iksï xáni kurhani jarhani eskaksï no kurhankuaka.”

Jesusi tsíri jatsiriri uantantskua aiankpespti

(Mt 13.18-23; Mk 4.13-20)

11“Uantantskua terukutarantskua íni ampesï arhikuekat'i: Tríju jatsintskua Diósïri uantakuesti; 12ima namoni enka xanhari jimpo antatseraka imechani arhikuekaxati enkaksï aiankperakuani kurhak'a ka jurhasïnti nóampakiti ka mintsitarhu kéntitakuasïnti, ásïksï ísï jámani jakak'ue ka p'ímutanhantanksï. 13Ima namoni tríju enka tsakapentu antatseraka; imechani arhiaxati enkaksï aiankperakuani kurhak'a ka tsípekua jinkunksï jiókorheni, k'óruksï no kánekua sïrankua pásïnti; namoni jurhiak'uksï jakak'usïnti, ka nóksï úsïnti jima enkaksï ts'ék'unhak'a. 14Ima tríju enka akarhenirhu antatseraka imechani arhikuekaaxati enkaksï kurhak'a, ka enkaksï sánhani arhik'a uantanheani ka jatsikorhenhchani ka ampeksï kánhchani ka xénhchani, ísï jámanksï no úsïnti ampakiti ampe íntspentani. 15Ka ima k'ória tríju enkaksï ampakiti echerintu antatseraka, imestiksï enkaksï ampakiti mintsita jinkuni uékaparini kurhak'a ka nóksï ísku kurhani, ka enkaksï sési anhaxurhikorhetini ampakiti ampe íntspentak'a.”

Erak'utarakueri uantantskua

(Mk 4.21-25)

16“Nónema erak'utarakua ma étskutini óch'akurasïnti o jískani; sánteru sáni, karhakua pérasïnti eskaksï exeaka ima enkaksï inchak'a. 17Méntkueni, nómpema jarhasti enka no mítekorheaka, ka nót'u ampe ma jarhasti enka sïpatekuarhku patsakata jaka enka no mítekorheaka, ka iámentu ampe k'amak'amasï mítekorheati.”

18“Ísï jimpo sési kurha je, jimpoka ima enka jatsikorheka, sánteru intsïnhaati; ka ima enka nómpema jatsikorheka, imani jamperi euanhaati enka eratseni jaka eska jatsikorheska.”

Jesusiri amampa ka erachi jémpecha

(Mt 12.46-50; Mk 3.31-35)

19Jesusiri amampa ka erachichaksï jima niáraspti enka ima jápka, ka nóksï úspti antarherani jimpoka uánekua janhaspka. 20Jesusinksï aiankuspti:

–Chéti nánte ka chéti erachichaksï uérakua jarhasti, ka uantaxechenksïni uékaxati.

21Ka ima arhiaspti:

–Imaksïsï jucheti nánteti ka jucheti erachini, enkaksï Diósïri uantakuani kurhak'a ka marhuatanksï; ka nóksï ísku kurhani.

Jesusi tarhiatani p'ínkuspti

(Mt 8.23-27; Mk 4.35-41)

22Ma xanhari, Jesusiksï imeri jurhenkorherichani jinkuni teparirhu ma jataspti, ka arhiaspti:

–Ju je japuntani parhimeni.

Ka uérasptiksï nirani, 23ka enkaksï parhimeni jápka Jesusi k'uíspti. Ka uénaspti uinhamu tarhiameni, ka tepari uénaspti itsï jatani ka uekamexaptiksïa. 24Jimak'anksï Jesusini tsínharhitaspti ka arhinksï:

–¡Jurhentpiri! ¡Jurhentpiri! ¡Uekamexakachia!

Jesusi jauarasti ka tarhiatani ka jenkuerakuechani xukaaspti, ka ampap'atespti. 25Tátsekua imeri jurhenkorherichani arhiaspti:

–¿Antichkats'ïnisï no mintsikak'i?

Ka imaksï chérakorhetini ka ísku pakareratini kurhamarhperani uénaspti:

–¿Néxamue i enka tarhiatani ka itsïni juramukuk'a ka kurhach'asïntiksï?

Jerasa anapu acheti enka nóampakiti incharhekorhetini jápka

(Mt 8.28-34; Mk 5.1-20)

26Ka úsptiksï Jerasa niárani, enka japuntarhu parhimetini jaka, Galilea erankurhini. 27Enka Jesusi kétsepka, iretarhu uéakuspti acheti ma enka nóampakiti incharhetini jápka, ka Jesusini antarheraspti. Ióni patsïkjasï jámasptia, ka k'umanchekua no jatsikorhespti, uarhiri jatsintskatecharhu ísï irekaspti. 28Enka exepka Jesusini, tinkuixurhikuspti ka uinhachaparini arhispti:

–¡Jesusi K'éri Diósï Uáp'a, ásïrini inchaakuche! ¡Kómarhixakakini eskarini no nósesi kámaaka!

29Ísï uantaspti jimpoka Jesusi nósesi jásï espirituni juramukuspka eska uérhentapirinka. Nóampakiti mémechani uéntaspti achetini mínkorheni; ka náuek'i sïntari tiámueri jimpo jók'unhani ka jóntukunhani, ima katsïnturhiasïrempti, ka nóampakiti jimesï pásïrempti enka nónema irekapka. 30Jesusi kurhamarhespti:

–¿Nári arhikorheski?

Ka ima arhispti:

–Lejioni arhinhasïnka.

Ísï uantaspti jimpokaksï uánespka nóampakiticha enkaksï incharhetini jápka, 31nósesi járhati espirituechaksï arhispti Jesusini eska no k'éri kauaru uekanhaapirinka. 32Imani juátarhuksï uánekua kúchicha jámaxapti, ka nóampakitichaksï kómarhispti eska jiáretaapirinka eskaksï kúchichani incharheapirinka; ka Jesusi jiáretaaspti. 33Nóampakitichaksï uérhentaspti achetini ka kúchichanksï incharheaspti, ka imaksï uiriaspti kétsemani japuntarhu jamperi ka jimaksï uarhimespti.

34Ima kúchi erankuticha enkaksï exepka néna enka úkorhepka uiriasptiksï sïpakorheni ka iretarhu ka juátarhuksï niraspti uantant'a'ni. 35Uéranhaspti exenhani ampe enka úkorhepka. Ka enkaksï niárapka jima enka Jesusi jápka, exesptiksï eska ima acheti enkaksï nóampakiticha uérhentapka uaxantetixaptia Jesusini kurhach'ani, xukuparhatini ka sési ampakentatini; ka chérakorhenhaspti. 36Ka ima enkaksï exepka néna enka úkorhepka, uantant'a'sptiksï na enkaksï ampakeranhantapka ima enka nóampakitichani káani jápka. 37Iámentu Jerasa isï anapuechaksï jíani uénaspti Jesusini kómarhini eska uéakukuantaapirinka, jimpokaksï kánekua chéxapka. Jimpo, Jesusi jatant'a'spti icharhutani ka níntaspti. 38Ima acheti enkaksï nóampakiticha uérhentapka, kómarhispti eska jiáretapirinka imani jinkuni nirani, enka úpka, Jesusi juramukuspti eska pakarapirinka, arhispti:

39–Chénio níntsï ka uantantsï ampe enka t'únkeni jimpo Diósï xáni úka.

Ima acheti níntaspti ka iámu iretarhu uantant'a'spti ampe enka Jesusi úkupka.

Uarhiti p'amenchati ka nanaka Jáiru uáp'a

(Mt 9.18-26; Mk 5.21-43)

40Enka Jesusi japuntarhu parhimentapka, tsípekua jinkuni eronhantaspti, jimpokaksï iámentuecha erontaxapka. 41Jimak'u niáraspti ma enka Jáiru arhinhempka, ima enka k'umanchekua tánkorhentskuarhu k'érini jápka. Ima acheti, Jesusini kápatsekuspti, ka kómarhispti eska p'urhempepirinka, 42jimpoka mák'u nanaka sapichuni kánkorhesïrempka, témpeni ka tsimani uéxurhini isï jatiri ma enka uarhini jápkia.

Enka Jesusi nirani jápka, katsinhapaxaptiksï jimpokaksï uánekua chúxapaxapka. 43Jima niraxapti uarhiti ma enka témpeni tsimani uéxurhini iurhiri késkuparini jámani jápkia, ka enka na k'amak'utapkia eska xáni jatsikorhepka, xáni tsinap'irichani maiamuaani, ka enka nónema úpka ampakerantani. 44Ima uarhiti Jesusini tátsepani ísï antarheraspti ka karona jupirhukukuspti, ka iurhiri anhakuatsekuspti. 45Jimak'ani Jesusi kurhankorhespti:

–¿Nérini p'árheski?

Ka jimpoka nónema jiókorhesïrempka, Pédru ka enkaksï márku jápka arhisptiksï:

–Jurhentpiri, iápuru ísïksïni katsinhaxati ka p'ákchakuni ka útasïri kurhankorhesïnka: ¿Nérini p'árheski arhini?

46Ka Jesusi ménteru uantaspti:

–Nemarini p'árhesti, jimpokani p'ikuarheraska eskarini uinhapekua uérheska.

47Ima uarhiti, enka na jánhaskakorhepka eska piáranhaspka, manaraparini niraspti Jesusini tinkuixurhikuni. Iámentuechani japarini aiankuspti antisï p'árhepi, ka néna enka ampakentapapka enka p'árhepka. 48Jesusi arhispti:

–Jucheti uátsï, p'ímutanhantaskaria jimpokarini mintsikaska. Sési p'ikuarherapantsï.

49Jesusi útasï uantaxapti, enka Jáiro anapu uantakua pári ma niárapka, ka arhispti:

–Ásteru ók'utani jaia jurhentpirini; chéti nanaka sapichu uarhistia.

50Enka Jesusi kurhapka, arhispti:

–Ásï che; ma mintsita jinkuntkurini mintsika, ka chéti nanaka sapichu ampakentaati.

51Ka eka k'umanchekuarhu niárapka, íchanku jiáretaspti eskaksï ima jinkuni inchapirinka: Pédruni ka Santiaguni ka Juánuni, ka nanaka sapichueri tátjempa ka amampani. 52Iámentuechaksï nanaka sapichuni uekuxapti ka p'amok'uni, ka Jesusi arhiaspti: “Ásï uera je; nanaka sapichu no uarhirixati, k'uíxati.

53Iámentuechaksï Jesusini teresmarhuspti, jimpokaksï mítespka eska nanaka sapichu uarhirixapkia. 54Ka Jesusi jupik'uspti nanaka sapichuni ka uinhachaspti uantani:

–¡Nanaka sapichu, Jauara!

55Ka ima nanaka sapichu tsíntaspti; ka jauarapaspti, ka Jesusi juramuspti eskaksï t'irerapirinka. 56Tátjempa ka amampaksï kánekua ísku pakareraspti, ka Jesusi juramukuaspti eskaksï nónemani aiankupirinka néna enkaksï jámapka.”

Currently Selected:

Sáni Lúkasï 8: DKPJ

Highlight

Copy

Compare