San Lucas 23
23
Jesusi Pilatuni japarini
(Mt 27.1-2,11-14; Mc 15.1-5; Jn 18.28-38)
1Iámenduechaksï jauaraspti, ka Jesusinksï Pilatuni pákuspti. 2Pilatuni japarinksï uénaspti Jesusini arhinharhikuni, uandaparini:
–Íni achetinchi p'iáraska juchari iretani támu ísï jánhastani jarhani. Uandasïndi eskachi Sésarini no maiamuaka, ka támu uandasïndi eska inde irecheska, eska Krístueska.
3Pilatu kurhamarhesti:
–¿Jeteru, t'u judiouecheri Irecheski?
Ka Jesusi arhispti:
–T'úri ísï uandaska.
4Jimajkani Pilatu tátecheri urhejtsïkurichani ka máteruechani arhiaspti:
–Nómbema xékuntasïnga íni achetini engani k'amanharhitarantaaka.
5Ka imaksï sánderu uinhamu arhisïrempti:
–Ambe enga inde jurhentpeni jaka, iámu iretani manataxati. Galilea uénasti, ka iásï ixu Judea ísï jámaxatiia.
Jesusi Erodisini japarini
6Enga ísï kurhapka, Pilatu kurhangorhespti ísïspki eska ima Galilea anapuespka. 7Ka enga na mítepka eska Erodesi juramutispka jini enga Jesusi anapuepka, imani axakuspti jimboka imajtu imani jurhiatekuechani isï Jerusaleni jámaxapka. 8Enga Erodesi Jesusini exepka, kánekua tsípespti, jimboka ióni uekaspkia míteni, jimboka imeri ambe t'uíni aiangunhasïrempkia ka uéksïrempti exeni eska milagru ma úpiringa. 9Uánekua ambe kurhamarhespti, ka Jesusi nómbema mókukuspti. 10Tátecheri urhejtsïkuricha ka juramukua jurhentpirichajtuksï chúxapaspti ka inchajtsïmantaxaptiksï ambe arhiparhatani. 11Erodesi ka imeri p'urhejkutichaksï nósesi kámaspti ka teresmarhunksï, ambakiti takusï irecherini jásïksï jatsikuspti. Tátsekua Erodesi ménderu Pilatuni axakuntaspti. 12Ima jurhiatekuaksï ménderu Pilatu Erodesi jinguni sési p'ájperantaspti, engaksï urheta ikiatsperatini jápka.
Jesusi uandikutarkorhenhasti
(Mt 27.15-26; Mc 15.6-15; Jn 18.39—19.16)
13Jimajkani Pilatu tátecheri urhejtsïkurichani ka ireteri achechani ka iámu iretani tánantaspti, 14ka arhijpespti:
–Íni achetintsïni cha juácheska, arhiparhatasïngajtsï eska iretani támu ísï jánhastasïnga; ka ji kurhamarheskia chánksïni japarini, ka nómbema xékuntaska imani ambe engajtsï xáni arhiparhatajka. 15Ka Erodesijtu nómbema xékuntasti, jimbojtsïnisï axachentati. Xéxakajtsïa, nómbema xáni k'éri kántspesïndi enga jukanchaka atanhani uándikunhani. 16Ji k'uikirhetarkorheaka ka tátsekua jurajkuakia.
17[Jimajkani isï p'indekuespti k'atakata ma kuínchekuarhu jurajkunhani]#23.17 Algunos mss. Añaden el v. 17: Probablemente incluido con base en Mt 27.15 y Mc 15.6.
18Enga úpka, iámenduechaksï uénaspti uinhachani:
–¡Indeni ásï jurajku! ¡Barrabasintsïni jurajkuche!
19Barrabasïnksï k'ataperakuarhu jatsispti jimboka iretani manataspka, ka jimboka atajpespka uándikpeni, 20ka Pilatu, ménderu arhiaspti Jesusini jurajkukuekani; 21ka imaksï sánderu uinhachaspti:
–¡Krúsirhu cháparhata! ¡Krúsirhu cháparhata!
22Tanimu uéntani jámani Pilatu arhiaspti:
–¿Andi ambechkamendu nósesi niátaski? Ji nómbema xékuntasïnga enga jimbo jukanchaka eska atanhaaka uándikunhani. K'uikirhetarkorheaka ka tátsekua jurajkuaaka.
23Ka imaksï sánderu méntku ísï uandani uinhachani, eska krúsirhu cháparhatanhapiringa; ka xánksï uinhachatini andaspti eska ísï úkorhepiringa eskaksï na uékani jápka. 24Pilatu juramuspti eska úkorhepiringa eska na kurhajkorhenhani jápka; 25ka ísï jimbo, jurajkukuaspti imani engaksï kurhajkorhepka enga iretarhu manatajpepka ka enga atajpekua jimbo k'atakata jápka, ka juramuspti eskaksï Jesusini kámapiringa eskamenduksï na kurhajkorheni jápka.
Jesusi krúsirhu uarhisti
(Mt 27.32-44; Mc 15.21-32; Jn 19.17-27)
26Ka engaksï Jesusini krúsirhu cháparhatani páni jápka, Sirene anapu ma achetinksï jupikaspti, Simonini, enga jimesï andantani jápka, ka krúsiksï ichanditaspti ka Jesusinksï chúxatapani.
27Uánekuaksï chúxapaxapti ueparini ka uinhachaparini p'amojkuni, 28ka Jesusi erauaspti ka arhiani:
–Jerusaleni anapu nanecha, jíndeni jimbo ásï uera je, chájtsïsï p'amojkukorheaka ka chári sapichani jimbo uera je. 29Jimboka jurhiata janoaka enga uandanhaaka: Tsípeksï ima engaksï no újka sapi káani, nanecha engaksï no úka sapi káani ka nóksï ma sapini t'arhexerani. 30Jimajkanistia enga uénanhaaka juátechani arhiani: ¡Jatajchakujtsïni! Ka k'úmstechani arhiani: ¡Jískajtsïni! 31Jimboka ekaksï p'ukurini enga tsikini jaka ísï kámka, ¿P'ukuri uarhiakukatanksï nándi kámaaru?
32Máteruksï tsimani atajpitichani páaxapti krúsirhu cháparhataani. 33Engaksï niárapka jima enga Uarhiri éjpu arhinhajka, Jesusini ka tsimani atajpitichantuksï cháparhataaspti, ma t'irerkandani ka máteru uikixkandanksï cháparhataaspti, 34[Jesusi uandaspti: “Táte, púakuantsï, jimbokaksï no míteska ambeksïsï úni jaki.”]
Ka p'urhejkutichaksï ch'anakua jimbo arhungurhispti Jesusiri xukuparhakuani.
35Jima janhaspti exenhani; ka juramuticha jamberiksï teresmarhusïrempti, uandaparini:
–Máteruechani p'ímutantaasti; eka sési jimbo inde Krístueka ka erakukateni iásï jandiojku uérakue.
36P'urhejkutichajtuksï Jesusini teresmarhusïrempti. Andarherasïremptiksï ka kauikua tsîjpekataksï inchachatasïrempti, 37arhiparinksï:
–¡Ekari judiouecheri irecheka, kuájpekorhe!
38Ka karakata ma jukarixapti imeri éjpurhu karhakua enga arhimpka: “I judiouecheri irechesti.”
39Ima ma isï atajpiti engaksï tirhipanhapka, Jesusini arhinhchasïrempti:
–¡Ekari Krístueka, kuájpekorhechka ka kuájpejtsïni!
40Ka máteru xukaspti imani enga ísï arhipka, arhiparini:
–¿Nóri chérhesïnki Diósïni, engari t'újtu méntkueni cháparhatakata jaka? 41Juchachi jurhimbekuarhu maiampexaka, jimbokachi nósesi niátaska; ka inde acheti nómbema nósesi niátasti.
42Tátsekua uandasptiteru:
–Jesusi, miántsïrini ekari na uénajka juramuni.
43Jesusi arhispti:
–Sési jimbokini arhixaka eskari iásïtkisï auandarhu jíndeni jinguni jauaka.
Jesusiri uarhikua
(Mt 27.45-56; Mc 15.33-41; Jn 19.28-30)
44Teruxutini uératini ka téjkamatiru jamberi ma parhakpeni pájpakandespti. 45Tata jurhiata pátakorhespti ka tióstarhu arhunhatarakua terujkani karunhespti. 46Ka Jesusi uinhachaspti uandani:
–¡Táte, jucheti espiritungini t'úngeni jurajkuchexaka!
Ka enga na ísï uandapka, uarhisptia.
47Enga Roma anapu p'urhejkuticheri k'éri exepka ambe enga úkorhepka, Diósïni k'éri ambe arhispti uandaparini:
–Sési jimbo i nómbema kántspesïrempti.
48Eska xáni janhapka, ka engaksï exepka ambe enga úkorhepka, uánheparinksï kéndikuspti. 49Iámendu enga Jesusi míteapka iauankuksï jarhaspti; ka uarhitichajtuksï jima jarhaspti engaksï Galilea uératinitki chúxapapka.
Jesusi jántasti
(Mt 27.57-61; Mc 15.42-47; Jn 19.38-42)
50Jarhaspti acheti kaxumbiti ma enga Arimatea anapuepka, enga Judea anapu ireteka. Judiouecheri tátecheri urhejtsïkurispti. 51Ima táta enga Jose arhinhempka, Diósïri irechekuani erokorhexapti ka no jaiapanhentaspti ambe engaksï tátecha tángorhekuarhu úskupka, 52ka niraspti Pilatuni uandaxekuni ka arhispti eska Jesusini jiájkutantapiringa. 53Krúsirhu késkuntatini, takusï irhiirhitaspti ka p'orhonharhitakatarhu ma páspti jatsintani enga nótki nema jima jatsinhantani jápka. 54Ima jurhiatekuespti enga ambe tánakorhenhani janhajka, jimboka sábadu jurhiatekua uénaxamempkia.
55Ka uarhiticha engaksï Jesusini Galilea uératinitki pámbepka, nirasptiksï exeni jima enga jántani jápka, ka exesptiksï néna enga péranhapka. 56Niántatinksï p'untsumekua ka atarhentskua ambe tánaspti.
Currently Selected:
San Lucas 23: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.