Sáni Lúkasï 11

Jesusi uantamukukorheni jurhentpespti

(Mt 6.9-15; 7.7-11)

1Ma xanhari Jesusi uantamukukorhexapti; ka enka na k'amarapka, jurhenkorheri jémpa ma arhispti:

–Acha, jurhentats'ïni uantamukukorheni, méntkueni eska Juánu jurhenkorheri jémpechani na jurhentaapka.

2Jesusi arhiaspti:

–Na enkats'ï jatini uantamukukorheaka, arhi je:

Táte, chéti jakankurhikua k'éristi.

Chéti irechekuats'ïni janoche.

3Mántani pauanits'ïni t'irekua íntsku.

4K'amanharhintskuechantsïni púacheantsï,

ísï eskani juchat'uni na púakuantak'a

iámentu imechani enkats'ïni jánhechek'a.

Ásïts'ïni jiáreta eskachi nósesi jásï ampe únhchaaka,

[sánteru sáni, nóampakitintsïni kéntitache.]

5Jesusi arhiasptiteru:

–Ju je eranhaskani eska cha ma ísï p'íchpirini ma kámsïnka, ka eskaksïni ima teruk'ani chúrekua uámutachesïnka ka arhinksïni: P'íchpiri, tanimu echakua kurhintarini p'ítseta, 6jimpoka jucheti p'íchpiri ma iauani uératini iáiasï janoska, ka nómpema jatsiska ampe íntskuni. 7Ka eska ima incharini jatinku arhintaaka: Ásïrini ók'utani ja; míkorhexatia, ixu k'uínnhaxatia. Nóteruni úakia jauarani t'únkeni ampe íntskuni. 8Arhiakaksïni eska jauaraaka, no jimpoka p'íchpiri jémpeska, sánteru sáni jimpoka niáchataskia, jauaraati ka iámu ampe íntskuati ampe enka xáni uékani jaka. 9Ísï jimpoksïni arhisïnka: Kurhak'orhe je, ka intsïnhakats'ï; jirinha je, ka xéntaakats'ï, uámutatspe je, ka mítamenhaakats'ï. 10Jimpoka ima enka kurhak'orhek'a, intsïnhasïnti; ka ima enka jirinhak'a, xéntasïnti; ka ima enka uámutatspek'a, mítamenhasïnti.

11“Cha ma ísï enkats'ï sapichani káak'a, ¿Tekaapirini akuitse ma íntskuni chári sapini enkaksïni kurucha kurhacheni jauaka? 12O ¿K'uarapu ma íntskuni ekaksïni ima t'irekua kurhacheni jauaka? 13Nántits'ï chéia enkats'ï no amparhaka, jurhenaskats'ï chári sapichani sési ampe íntsaani, ¡Na xáni no Diósï auantarhu anapu Espiritu Sántuni íntsaua imechani enkaksï kurhakuaka!”

Jesusinksï nósesi aiankpekuspti

(Mt 12.22-30; Mk 3.20-27)

14Jesusi nóampakitini petarhetant'a'xapti achetini ma enka nunuxipka; ka enka na nóampakiti uérhentapkia, nunuxi uénaspti uantani. Ka ísku pakareranhaspti, 15ka máruksï uantaspti: “Belsebu, nóampakiticheri k'éri íntskusti uinhapekua eska úaka nóampakitichani petarhpeantani.”

16Máteruksï, uékani ts'ék'uni arhisptiksï eska auantarhu mínta ma xarhatakuapirinka. 17Ka Jesusi, míteparini ampe enkaksï eratseni jápka, arhiaspti:

“Náki uék'i ma juramukua arhukurhitini, jantiok'u k'amakurhikorhesïnti, ka k'umanchekuarhu uarhiperanhatini k'amantenhasïnti. 18Ístu, enka Nóampakiti arhukurhikorheska, ¿Nénateru juramua? Íni ampe uantasïnka jimpokats'ï cha uinhamu uantaxaka eskani ji nóampakiti Belsebu jimpo nóampakitichani petarhpentasïnka; 19ka enka ampe ísïka, ¿Chári jurhenkorherichani ne íntsasïni uinhapekua eskaksï úaka nóampakitichani petarhpentani? Jimpo, imak'uksïni chánksïni uekap'aati. 20Ka enkani ji Diósïri uinhapekua jimpo nóampakitichani petarhpentak'a, arhikuekasïnti eskaksïni Diósïri irechekua janocheskia.”

21“Enka acheti uinhapiti ma atap'etarakuechani jinkunku jatsiaka ka kuáni jarhani imeri k'umanchekuani, nómpema sïpamenhaati enka xáni ampe jima patsani jaka. 22K'óru enka jurhak'a máteru sánteru uinhapiti ma ka antani, euakorheati atap'etarakuechani enka sési xékorhetarempka, ka imeri kánkorhekua arhunkustpeati.”

23“Ne enka no jínteni jinkunika, jucheti ikiatspiristi, ka ima enka no jínteni jinkuni tánantak'a etsanturhisïnti.”

Nósesi jásï Espiritu k'uanhatsentani jámsïnti

(Mt 12.43-45)

24“Enka nósesi jásï espiritu ma nemani uérhentak'a, k'arhik'arhintu jámani jarhasïnti jirinhani nani mintsikorheni; ka enka no xéntak'a, uantasïnti: Jucheti k'umanchekuarhu k'uanhatsentaaka, jima enkani uéraka. 25Ka enka na k'uanhatsentak'a, ísï xéntasïnti eska k'umanchekua ma enka sési péntskata jarhak'a ka sési k'arhatakata. 26Jimak'ani nirasïnti ka máteru iúmu tsimani sánteru nósesi járhatichani espirituechani tánantaasïnti, ka iámentuksï imani incharhesïnti jima irekorheni, ka tátsekua sánteru nósesi jarhasïntia.”

Ima ampe enka sési jimpo jukaparhaka

27Enka Jesusi íni ampe uantani jápka, uarhiti ma teruakuni ísï uératini uinhachaspti:

–¡Tsípe ima nana enkakini kánkorheka ka t'arhexerankini!

28Ima arhispti:

–¡Sánteru sánksï imasï tsípeati enkaksï kurhak'a ampe enka Diósï uantak'a, ka enkaksï kurhantirakuk'a!

Máruksï kurhak'orhespti eska mínta xarhatapirinka

(Mt 12.38-42; Mk 8.12)

29Sánteru uánepanhaxapti Jesusini kurhach'ani, ka ima uénaspti arhiani: “Iásï anapuecha jukari no amparhanhasti; míntaksï kurhak'orhesïnti eskaksï xéranhaaka, enka úka, xánterku ísïksï xarhatamenhaatia eska Jonasi na xarharapka. 30Jimpoka mák'ueni eskaksï Nínibe anapuecha na Jonasini axamenhapka, iásï anapuechat'uksï mák'ueni acheti Uáp'ani axamenhasti. 31Ima jurhia kurhamarhperantskuarhu, enkaksï iásï anapuecha terunharhitanhaaka, kétsemani anapu nana irecha arhinharhikuauati; jimpoka íni parhakpeni ima sánteru iauani uératini jurhaska Salomoniri mímixekuani kurhani, ka ima enka ixu jaka Salomoni jinkuni sánteru k'éri ampesti. 32Imani jurhiatekua kurhamarhperantskuarhu Nínibe anapuechat'uksï jauaraati, enkaksï iásï anapuecha arhinharhikunhani janhaaka, ka imat'uksï arhinharhikuauati; jimpokaksï Nínibe anapuecha móantaspka enkaksï Jonasiri aiankpekuani kurhapka, ka Jonasi jinkuni sánteru k'éri ampesti ima enka ixu jaka.”

Anhanhatakueri erak'utarakua

(Mt 5.15; 6.22-23)

33“Nónema étskusïnti erak'utarakua ma ka jískani o kápchakurani, iótakuarhusï pérat'i, eska ne enkaksï inchaaka erak'uaka. 34Chéti éskuechaksï erak'utarakuesti; ka enkaksï ampakeka, iámu chéti anhanhatakua erak'ukuarhu jámani jauati; ka ekaksï nóamparhaka, chéti anhanhatakorhekua páp'akantu jámani jauati. 35Xéparini eska erak'utarakua enka t'u jatanhetini jaka no páp'akantekueka. 36Jimpoka eka iámu chéti anhanhatakua erak'utarakua kámka ka nósani páp'akaxeni, iámu amperi sési exeaka, ísï eska jiák'ani enkakini erak'utarakua ma t'íntskaracheni jarhak'a.”

Jesusi tátechani xukaaspti

(Mt 23.1-36; Mk 12.38-40; Lk 20.45-47)

37Enka Jesusi k'amarapkia uantani, fariseo ma imo p'imarhespti t'irerani, ka Jesusi niraspti ka uaxakapani t'ireni. 38Fariseo ísku pakaraspti enka exepka eska no urheta jupak'uspka t'ireni jámani, eska no ísï úspka eska na p'intekuepka. 39Ka Acha arhispti:

–Cháts'ï fariseouecha tsúntsuni ka urhanini kutsuparhakuantasïnka, ka incharini ísïts'ï uinirixaka imani ampe enka sïpakateka ka nósesi antakateni. 40¡Inchantimecha! ¿Nóts'ï míteski eska ima enka inchanhetini anapu ampe úka, táparhakuni anapu ampet'u ima úska? 41No jatsikorherichani mintsita jinkuni intsïmpea je, ka ísïts'ï iámu pímpinhaxent'aaka.

42“¡Áke cha, fariseouecha! Enkats'ï Diósïni sáni arhutakuk'a iámentu jásï xakua enkats'ï ikarakorhek'a, ka nóts'ï úsïnka sési páp'erani ka xénhchperani eska Diósï na uék'a. Jimpoka tsimani ampesï úkueka.”

43“Áke cha fariseouecha enkats'ï k'érikuarhu uaxakanhchak'a ka uékantsï eskaksïni xanhari jimpo k'éri ampeni uantap'aaka.”

44“¡Áke cha, enkats'ï ísïka eska uarhiri jatsintskata! Enka t'auach'akunhak'a no míteparini eska jima jarhasïnka.”

45Jimak'ani juramukua jurhentpiri ma arhispti:

–Jurhentpiri, enkari ísï uantak'a juchantsïni jamperits'ïni pát'amasïnka nósesi p'ikuastani.

46Ka Jesusi uantaspti:

–¡Áke chát'u juramukua jurhentpiricha! Enkats'ï máteruechani kuiparhataak'a imani ampe enka nónema úk'a páni, ka cha k'óruts'ï no jamperi uékani pirekorheni.

47“¡Áke cha! Enkats'ï kasïperakuantaak'a jatsintskuani imani Diósïri uantarichani enkaksï chári ióntki anapuecha uántikuaka. 48Inteni ampets'ï úrini xarhatasïnka eskats'ï jaiapanhentaska enkaksï chári ióntki anapuecha úka, jimpokaksï ima uántikuaska ka cháts'ï jatsintskuechani sési ják'ukuani.”

49“Jimposï Diósï imeri mímixekua jimpo uantati: ‘Diósïri uantarichani ka uantakua párichanksïni axacheaxaka, ka máruts'ï atauaka ka máruts'ï no xénhchani káuaka’ 50Jimpoka Diósï iásï anapuechani maiampetarauaka enkaksï xáni Diósïri uantaricha uarhika, jiák'ani uératintki enka parhakpenika. 51Jiák'ani uératintki enka Abeli uarhika ka jiák'ani jamperi enka Sakariasï uarhika, imani enkaksï tiósïo ataka jima teruk'ani enka kéts'ïtatarakua jaka. Ísï jimpo, arhixakaksïni eskaksï imecheri uarhikuani iásï anapuecha arhiparhatanhaaka.”

52“¡Áke cha, juramukua jurhentpiricha! Enkats'ï mítakua jurhenkorhekueri no uinhak'a; ka cha jamperit'uts'ï no inchasïnka níts'ï jiáretaak'i inchani imechani enkaksï inchanhchani jaka.”

53Enka Jesusi jima uéntapka, juramukua jurhentpiricha ka fariseouechaksï kánekua ikiaspti, ka uénasptiksï Jesusini ch'urhureni uánekua ampe kurhamarheparini, 54mámaruksï jirinhakuntaparini nóna imeri uantakua jimpo inchap'eratarani.

Currently Selected:

Sáni Lúkasï 11: DKPJ

Highlight

Copy

Compare