Efesios 3
3
Ambe enga Páblu míndanhaka úni
1Ísï jimbosïni ji Páblu, Krístuni jimbo ónhakata jaka chári sési jimbo engajtsï no judioueka. 2Chájtsï mítetini jáka ambe engarini Diósï míndaka imeri kóntperatakua jimbo chánksïni aianguni: 3Diósïrini jánhastasti ka aianguntastirini ambe enga imajku mítepka, ísï eskaksïni íri ambe urhetku na karachepka. 4Engajtsï arhintaaka, úakajtsï kurhanguni ambe engani ji jánhaskani jaka Krístueri ambe, enga no uánekua mítenhapka; 5ima ambe iásï Espiritu, uandakua párichani ka Diósïri uandarichani jánhastaastia. 6Eskajtsï chájtu no judiuecha p'iuaka ambe engaksï judiuecha míndamenhatini jaka, eskajtsï Krístuni jimbo májkuentaska, ka eskajtsï márku p'iuaka ambe enga míndanhatini jaka ambakiti aiangperakuani jimbo, 7imani engani ji uandantani jámani jáka. Jimbokarini Diósï imeri kóntperatani míndaska uandantani jámani, jimbokarini ima uinhaperasïnga.
8Ji míndanhaska indeni kóntperakuani no judiuechani aianguantaani engani imeri erakukatecha jinguni sánderu nómbe méka, Krístueri xáni ambarhati kóntperakuechani. 9Ka k'amak'amasï jánhastpeni na enga úkorheka ima ambe enga méntkisï Diósïjku mítetini jápka, enga iámendu ambe kueraaka, 10eska iásï jakajkutichani jimbo, ánjelicha ka nóambakiticha ka ima engaksï auandarhu juramujka míteauaka Diósïri mímixekuechani, 11ísï eska Diósï, uénakuarhutki juchari Acha Krístu Jesusini jimbo námendu eratseni jápka úni. 12Engachi jucha Krístuni mintsikaaka, Krístujtsïni uinhaperantasïndi eskachi úaka Diósïni mintsikaparini andarherani. 13Ísï jimboksïnisï ji kómarhini jaka eskajtsï no p'ikuarheraaka iásï engani ji chánksïni jimbo xáni nósesi nitamakorheni jaka, jinijtsïsï tsípeaka.
Diósï k'éri ambe arhinhe
14Íni jimbosïni ji Táteni tinguixurhikujka, 15enga iámendu auandarhu anapuechani ka echerirhu anapuechani kueraaka ka jakangurhitaani. 16Eskaksïni imeri xáni k'éri kóntperakua jimbo, Espirituni jimbo mintsitechani uinhaperacheantauaka, 17ka Krístuntsï sésimendu mintsikani jarhani, ka imeri xénhchperakuantsï chári irekuarhu sési marhuatani jarhani. 18Ísïjtsï úaka jánhaskani, iámendu Diósïricha jinguni na enga xáni káneka ka nani enga jamberi niárajka, ka enga xáni k'éka, ka nani enga jamberi Krístueri xénhchperakua niáratspejka; 19eskajtsï Krístueri xénhchperakuani míteaka enga iámendu jurhenguechani uanokuajka, ka eskajtsï iámendu Diósïri kóntperatechani p'iuauaka.
20Diósï k'éri ambe arhinhe, enga juramujka ka enga jucha jinguni xarharajka, engajtsïni jukari jamberi íntskujka engachi eranhaskajka kurhakuni. 21¡Iásï ka méntkisï anapuecha engachi Krístu Jesusini jakajkujka, Diósïnksï k'éri ambe arhi méntkisï! Ka ísïsti.
Currently Selected:
Efesios 3: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.