Colosenses 4
4
1Ánchetpiri, chéti jántspirini sési maiamu, ásï mirikurhi eska chéti Acha auandarhu jarhaska.
Máteru arhistatsperakuecha
2Méntku uandamukokorheni ja je, iámu ambe arhiparini ka diósïmaiamu arhiparini, 3ka Diósïntu kómarhi je juchantsïni jimbo, eskachi sésikua intsïnhaka uandantani ka jurhentpeni Krístueri ambe enga no mítekorheka, nóchkani jimbosïni ónhanha andi, 4ka uéksïnga sési ambonhastpeni.
5Sési eratsekuntsï je néna jámani no jakajkuticha jinguni, exeparini ambesï jánhaskorhe. 6Sési uandaxekua je ka tsípekua jinguni, ka úakajtsï mándani arhini sési mókukuani.
Uandanuntskua
7Tíkikuksïni aianguntati sánderu jucheti ambe, xénhchasïnga inde pámpirini jimboka mintsinharhikueska ka márkuchi jámaska Achani marhuakuni. 8Jimboksïnisï axacheni jaka, indeksïni aianguntaati juchari ambe ka karhoatantaatiksïni. 9Onesimujtu pámbexati enga cha jinguni tángorhetika, jucha xénhchasïnga jimboka mintsinharhikueska. Indeksïni aianguntaati iámendu ambe enga ixu úkorheni jaka.
10Aristarku enga jíndeni jínguni ónhakata jaka uandajperakua máksïni axachexati ka Márkusïjtu ísï Bernabeo anapu. Chájtsï kurhariskia Márkusïri ambe, sési káma je ekaksïni ambe niraska p'urhembeni. 11Jesusijtu engaksï Jústu arhijka uandajperata máksïni axachexati, indejtsïni kánekua karhoatasti jimbokaksï judio mínda jukariska ka jarhuataxatijtsïni Diósïri irechekuani uandantani. 12Epafrasi enga cha jinguni tángorhetika uándajperata máksïni axachexati, indeksïni méntku kómarhijpecheni jarhasïndi eskajtsï Diósïni sési mintsikani jauaka ka eskajtsï imani marhuakuni jauaka. 13Ji exeriska eska kánekua uandanheasïnga cha jimbo, ka Laodisea anapuecha jimbo ka ístu Ierapolisï anapuecha jimbo. 14Demasï ka Lúkasïjtuksïni uandajperata ma axachexati, indesï tsinajpiriti ka kánekua xénhchanhasïndi.
15Arhia je sáni Laodisea anapu jakajkutichani eskakï uandajperata ma axakuaxaka, ka Ninfasïni ka iámendu chénjembo tángorhetichani. 16Engajtsï íni karakatani k'amaraaka arhintani, Laoisea anapuechani axakua je jurajkue jimajtu arhinhantani, ka chájtu arhintsï je karakatani engani jini axaka. 17Arkipuntsï arhiaka eska k'amaraaka ánchekorhetani enga Acha míndakuka.
18Ari uandakuechani ji Páblumenduni karhaxaka: “Ásï mirikurhi je eskani ónhakata jarhaska, Diósïksïni újchakure”.
Currently Selected:
Colosenses 4: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.