2 Timoteo 1
1
Uandajperata
1Ji Páblu, Jesukristueri uandakua pari, jimboka Diósï ísï uékaska, engajtsïni tsípekua aiacheka Jesukristuni jimbo. 2Timote, jucheti uátsïti xénhchakata. Eskakini Acha Diósï ka Acha Jesukristu újchakuraaka ka sési jakuakini íntskuni.
Engakini miántka
3Engani uandamukukorhejka chúrekua ka jurhiakua miántasïnkakini ka diósïmaiamukua arhintasïnga Diósïni, engani ji sési marhuakujka, májkueni eskaksï na marhuakupka jucheti tuo anapuecha. 4Mémechani engakini miántajka, imani miántasïnka engari uerapka ka jirinhantasïngakini jimbokarini t'u sési p'ikuastasïnga 5Ka ístuni miántasïnga chéti ambakiti jakajkukuani, ísï eskaksï námendu jakajkuempka chéti nanita Loida ka chéti nánde Eunise.
Ambakiti aiangperakua kéri ambesti
6Uinhaperantapiringari Diósïri kóntperatani engari jiákani p'ípka engakini újchakurapka. 7Jimbokajtsïni Acha Diósï no íntskuska Espiritu chkéri ma o chérperakueri ma, Espiritu uinhapiti ma ka xénhchperakueri ka kaxumbekuerijtsïnisï íntskuti. 8Ísï jimbo, ásï jáma k'uratseni jarhani engari juchari Acheri ambe jámaaka uandantani, níjtu jíndeni jimbo engani k'atakata jaka. Acheri uinhapekua jimbo uinhapekorhentsï ka tekaantsï iámendu kómu nitamakorhekua ambe, engari ambakiti aiangpekuani jimbo ísï nitamanchani jaka. 9Diósïjtsïni p'ímutantasti ka p'ímarhestijtsïni k'axubentani ka ambakiti ambejtsïni míndasti, no juchari jángua jimbo, imeri xénhchperata jimboesti, engajtsïni Jesukristuni jimbo xarhatacheka, 10ka iásï juchari p'ímutantskua Jesukristuni jimbojtsïni xarhatachesti xénhchperata, enga uarhikuani k'amajkuka ka t'ímarhandekuarhu pérasti ambakiti aingperakuani enga tsípekua íntspejka ka enga nómeni k'amakurhiaka.
11Diósïrini míndasti imeri uandakua etsakuni jamani ka jurhentpeni. 12Ísï jimbosïni kómu nitamanchani jaka. Koruni no k'uratsesïnga jimbokani sési mítetixaka nénisïni mintsikajki, ima k'eri ambesti ka mítetixaka eskarini kuájchakuaka ima jurhia jamberi.
13Sési marhuata jurhengua ambe engakini jurhendaka, ka Jesukristueri jakajkukua jimbo xénhchpera je. 14Espiritu Sántueri jarhojperata jimbo sési jurhentpe.
15Eskari na mítekia, eskarini Fijelu ka Ermojenesi jurarkuska ka ístu Ásia anapuecha. 16Eska Acha Diósï púakuantauaka Onesifuroeri k'umanchekuarhu anapuechani, jimbokarini Onesifuru k'óru mémechani uínhaperantaspka ka no k'uratsespti engani ji k'atakata jápka ka mémechandini sési arhintaspti. 17Enga niáratinku jápka Roma, sónditkurini jámaspti jirinhantani ka xentasptirini. 18Eska Acha Jesusï no mirikurhiaka ka eska p'ímutantaaka imani jurhiatekua enga arhinharhikperanhaaka. Iámendu ambe jimbo engajtsïni xáni jarhuataka jimajkani engachi Éfesu jápka, t'úri míaxaka.
Currently Selected:
2 Timoteo 1: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.