2 Corintios 1
1
Uandajperata
1Chári sésikua jimbo Korintu anapu jakajkuticha, ji Páblu ka jucheti jarhojpiri Timoteu uandajpaxakaksïni chánksïni ka ístu iámendu Akaia anapu erakukatechani. Diósïrini jíndeni kóndesti Jesukristuni uandakua pákuni jámani.
2Eskaksïni juchari Diósï Táte ka Acha Jesukristu tsípekua kóndeaka ka sési jakuaksïni íntskuni.
Diósï sési jarhojpesïndi
3K'éri ambe arhinhe Acha Jesukristueri Tátjemba, juchari Diósï Táte p'amojkpiri ka karhoatpiri, 4imajtsïni karhoatantasïndi engachi nósesi nitamanchani jarhajka ka juchajtuchi úaka nósesi nitamanchatichani karhoatantani. 5Ekachi jucha Krístueni nósesi nitamanchani jaka, Krístuni jimbochi karhoatanhaaka. 6Jucha uéksïnga eskajtsï cha karhoatanhaaka ka p'ímutanhantani jimbochisï iámu ambe tekantajka; ekani jucha karhoatanhaska, chájtsï xéaka ka uinhapekorhentakajtsï, jiáni engajtsï nósesi nitamanchani jauaka, ísï eskani jucha na p'ikuarherani jarhajka. 7Jucha mintsikaxaka eskajksï sési p'ikuastanhantaka; jimbokachi míteska eskajtsï chájtu sési karhoatanhaaka engajtsï nósesi kánhani jaka.
8Tatecha ka nanecha, aianguxakaksïni eskajtsïni Ásia anapuecha jukari nósesi kántaspka, k'amajkuntaxaptijtsïnia, nóteru mintsikuesptia eskachi uérakuapiringa, 9uarhikuanchi axuterkusï p'íkuarherani jápkia, nóteru juchespkia, Diósïnderkuchisï mintsikani jápkia, enga uarhirichani tsítantajka. 10Ka Diósïjtsïni uarhikuarhu p'íjpantaspti. Ka mintsikaxakachi eskajtsïni p'íjpantani jauakateru 11eskajtsïni cha kómarhijpecheni jauaka, eskajtsïni uánekuecha diósïmaiamu arhijpecheaka, imani engachi jurhengua uánekuecheri jimbo intsïmbenhaka.
Páblu no úspti Korintu nirani
12Jucha tsípeni p'ikuarheraxaka, mítetini eskachi iámenduechani sési káaspka ka chánksïni sánderia, nóchi juchari mímixekuani mintsikaspka, jucha Diósïri kóntperakuani mintsikaspka. 13Nóchkaksïni jukari ambesï arhini jaka, xántku engajtsï cha úaka arhintani ka kurhanguni, ka mintsikaxaka eskajtsï iámu kurhanguaka, 14ísï eskajtsïni na kurhanguchekia sáni. Ka chájtujtsï jucha jinguni k'éramakorheaka jiáni enga juchari Acha Jesusi junguaaka.
15Ísï mintsikaparini uékaska urheta cha jinguni nirani, eskaksïni janochepiringa ménderu kóntperakua tsimani xanhari úni jámani, 16uékaspka Masedonia jamani, nirani jámani, ka ménderu jamonguani, ka tátsekuajtsïni cha jarhuatapiringa Judea nirani. 17¿Andi ji nósesi eratsentaspki? ¿Andi ji ísku jatini eratseni jápi nirani ka tátsekua no ísï úni? 18Jucha ma ambejkuni uandasïnga jimbokachi Diósïri jakajkukua jimbo uandasïnga. 19Nóchka Jesukristu, Diósï Uájpa, méntku íntskukorhentaski andi, nómeni mómuntasti, ka jucha Silbanu ka Timoteu jinguni, imeri ambechisï aiangpeni jámka, 20jimboka Uájpa juáska iámendu Diósïri aiatsperakuechani. Ka Diósïnichi k'éri ambe arhisïnga engachi Jesusini jimbo arhijka: “Ísïmendu ústi” arhini. 21Ka Diósïjtsïni Krístu jinguni márku úntasti ka újchakurantsïni, 22ka míndajtsïni jatsikukorhesti ka imeri aiatsperakuani juchari mintsitarhu pérani engajtsïni Espiritu Santuni íntskuka.
23Kurhajtsïni je, Diósï mítetixati eskani chári sési jimbosïni nótki nirani jaka Korintu. 24Jucha no uéksïnga chári jakajkukuani míngorheni, jinichisï uéjka cha jinguni márku sési p'ikuarherani, jimbokajtsï sési uinhapentatixaka engajtsï Diósïni jakajkuka.
Currently Selected:
2 Corintios 1: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.