1 Corintios 16
16
Judea anapuechani jarhojperata túmina tánakua
1Ka túmima tánakueri ambe engaksï Diósiri jakajkuticha míndamenhatini jaka, chájtu méntkueni u je eskani ji Galasia anapu tángorhekuechani na arhistakuaka. 2Mándani dominguechani, na engajtsï xani andakorhiaka iámenduechajtsï arhutakoreaka sáni, ka támujtsï patsaaka, ka nójtsï jiáni uénania tánani engani ji jima jauakia. 3Ka engani niarakia, imechani engajtsï cha erakuauaka karakata mítetarantskuachi íntsauaka, engaksï Jerusaleni niuaka jarhojperata túmina pani. 4Ka enga k'uaniska jíjtuni nirani, májku k'érichi niuaka.
Páblu úskuxapti nani nirani
5Niuakaksïni p'urhembeni ka ekani Masedonia na parhiakuakia, jimbokani jimesï nitamaaka. 6Nándikani namuni jurhia úaka cha jinguni pakarani, o jamberini iauantskua jímini nitamani, ka tátsekuajtsïni cha jarhuataakia nani enga k'uaniakateru nirani. 7Nóksïni uéksïnga xani jirejiresï exemani, ekarini Acha sésikua íntskuska, namuni jurhia cha jinguni pakaraaka. 8K'óruni ixu Éfesu pentekostesiri jurhiakua jamberi pakaraaka, 9jimbokani ixu sésikua íntsïnhaxaka eskani ánchekorhiaka, Diósïri uandakua jinguni, nájkirukajtsïni uánekua ikiachejka.
10Eka ambe Timoteu niáraska, jángorhentsï je eska cha jinguni sési p'ikuarheraka, imajtu jíni jámaxati Diósïni ánchekorhekuni. 11Ásïchka nema sapichu erate, sési pájpera je ima jinguni ka jarhuata je eska sési junkuaka, jimbokani jucha máteru erachicha jinguni erontaxaka.
12Apolusïni juchari erachini, ji kánekua kómuarhispka eskaksïni nipiringa máteru erachicha jinguni p'urhembeni, ka ima iásï no uékasti nirani, nándika máteru jimbo úaka nirania.
K'amarhuni jámani arhistatsperakua
13Jinguntkuchka ja je ka méntkisï Diósïni mintsikani jarhani, ka ts'iuentsï ka uínhapekorhentsï je. 14Iámendu ambe tsípekua ka xénhchakua jinguni u je.
15Chájtsï míteskia erachicha, eskaksï Akaio isï anapuecha uénaspka ambakiti aiangperakuani jakajkuni, Estefanio k'umachekuarhu anapuecha, ka jiáni uératinksï jakajkutichani marhuakuaxati. 16Kómarhixakaksïni eskajtsï kurhajchauka imeni jarhati k'uiripuechani, ka máteruechantu engaksï ini ánchekorhetani íntskukorhentajka úni jarhani.
17Ji kanekua tsípexaka engajtsïni Estefanasï ka Fortunatu ka Akaiku juka p'urhembeni, indejtsïni jarhuatasti engajtsï cha no úka jurhani, 18ka jucheti ka chári espirituniksï sési p'ikuastasti. Xárhati k'uiripuechani jurhengorhe je janhanharhiani.
Uanadanuntskua
19Ásia anapu jakajkutichaksïni uandajperata axachexati. Akila ka Prisila ka iámendu engaksï xáni imecho tángorhejka, Acha jimboksïni uandajperata axachexati. 20Iámendu jakajkutichaksïni uandajperata axachexati. Chájtu iámenduecha sési uandajpera je jájki íntsperaparini.
21Íni uandajperataksïni ji Páblu, jucheti jájki jimbo ts'irimerachexaka.
22Eka nema Achani no xenhchajka, ¡Ikimekateuati! ¡Acha juchari, jungua ia!
23Ka eskaksïni Acha Jesusi kóndeni jauaka. 24Jíksïni iámenduechani, Krístu Jesusi jimbo xénhchasïnga.
Currently Selected:
1 Corintios 16: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.