1 Pedro 1
1
Uandajperata
1Ji Pédru, Jesukristueri uandakua pári, uandajpaaxaka iámendu erakukatechani engaksï Pónto ka Galasia ka Kapadonia ka Ásia ka Bitinia nireraka irekani, 2jimboka Diósï Táte ísï eratsetixapka, Espiritu pímpinhaxetpiri jimboksïni erakusti, eskajtsï Jesukristuni kurhajchaaka ka imeri iurhiriksïni pímbinhajkuntaati. Eskajtsï kánekua kóndenhaaka ka eskajtsï sési jauaka.
Diósïni k'éri ambe arhini
3Diósï, juchari Acha Jesukristueri Tátjemba xáni k'éristi, engajtsïni p'amojkuka ka Jesukristueri tsíntskua jimbojtsïni jimbanherantasti, ka mintsikakua tsípekuerijtsïni íntskusti, 4eskajtsï p'iuaka ambe engaksïni Diósï auandarhu míndachetini jaka, enga no terejka, ka enga sési jáxeka ka enga no xántkuejka, 5cha engaksïni chári jakajkukua jimbo Diósïri uinhapekua k'uájchakuni jaka, eskajtsï p'ímutanhantaaka, ísï eskajtsï na jatsimenhatini jápkia jiájkani xarhatamenhani engaksï jurhiatekuecha k'amakurhiaka.
6Indeni jimbojtsïsï tsípeni jauaka, nájkiruka k'uanijka eskajtsï namoni jurhiatekuaterku mámaru jásï ts'éjperakua jimbo kómu nitamanchaaka. 7Eka chári ambakiti jakajkukua ts'éjkunhaaka, eska sánderu ambakeaka eska tiripiti enga xántkuejka, ka chári jakajkukua sánderu sési ambesti eska tiripiti. Eska chári jakajkukua k'éri ambe arhinhaaka, ka k'érikurhu péranhani jiájkani enga Jesukristu ménderu xarhantaaka.
8Engajtsï cha Jesusini xáni xénhchajka nájkirukajtsï no míteka; imani engajtsï mintsikajka, nájkirukajtsï iásï no exeni jaka, imani jimbojtsï tsípenitsipexaka. 9Jimbokajtsï mítetixaka eskaksïni Diósï p'ímutantaaka jimbojtsïsï xáni mintsikani jaka.
10Íni p'ímutantskueri ambeksï, Diósïri uandaricha sési jirinhakuntasti mítekuekani, ka uandantastiksï Diósïksïni ambe enga kóndentapiringa, 11Diósïri uandarichaksï jángorhekuntaspti mítekuekani, ambe jurhiatekua ka nénasï Krístueri Espiritu arhiani jápi enga imecha jinguni jámani jápka, na enga jatini Krístu xáni nósesi nitamanchapiringa ka enga tátsekua k'érikuarhu péranhapiringa. 12Ka jánhastanhasptiksï eskaksï ima no jandiojku jángorhexamempka, eska i aiangperakua chári sési jimboespka, i ambakiti aiangperakua engajtsï iásï cha Espiritu Sántu auandarhu uératini axakata jimbo aiangunhantani jaka; íni ambe engaksï ánjelicha jamberi xékuekanhchani jaka. 13Ísï jimbo, jinguntku ja je, ka míakua juka je, ka indeni kóntperakuani mintsikani ja je, engajtsï intsïnhaaka jiájkani enga Jesukristu ménderu xarhantaaka. 14Ísï eskaksï sapicha engaksï kurhandirajka: Ásteru nósesi irekorhe je eskajtsï na jámempka jiájkani engajtsï nótki jánhaskempka, 15sánderu sáni, chájtu iámendu ambe jimbo kaxumbe je, ísï eska ima na kaxumbeka engaksïni ióarhika, 16eska karakatarhu na arhijka: Kaxumbe je, jimbokani ji kaxumbeska. 17Ka engajtsï Táte arhijka imani enga iámenduechani májkueni exeajka, enga arhijpejka imani ambe jimbo enga únhaka, janhanharhi je eskajtsï jamberi xáni chéuaka, 18mítetixakajtsï eskajtsï chári nósesi jánguarhu euajpenhantaska, imani p'indekua ambe engaksïni chári tua anapuecha jurajkuchepka, nóksïni imani ambe jimbo piántasti enga terejka, taiakata jimbo o tiripiti jimbo, 19jinisï Krístueri ambakiti iurhiri jimboeti, karichi sapichu sési jásï ka ambakiti, 20enga t'uíni eratsekata jápkia enga parhakpeni nótki kueraanhempka, chári sési jimbo íni jurhiatekua k'amarhukuecharhu xarharasti; 21chájtsï Krístuni jimbo Diósïni mintsikasïnga, enga uarhiricha jinguni tsíntantaka ka enga k'érikua íntskuka, jimbojtsïsï cha Diósïni jakajkujka ka mintsikani. 22Chájtsï chári tsípekuani pímbinhajkuntaska engajtsï kurhandirakuka imani ambe enga ísïka, eskajtsï mintsita jinguni erachichani xénhchauaka. Méntkisï sési jásï mintsita jinguni kánekua xénhchpera je, 23jimbokajtsï ménderu kángorhenhantaskia, tsïuakua ma jimbo enga no terejka, Diósïri uandakua jimbo, enga tsípitika ka enga nómeni k'amakurhijka. 24Jimboka k'uiripu uitsakueni jáxeska, ka k'uiripueri k'érikua uitsakueri tsïtsïkini jáxesti; uitsakua k'arhisïndi ka tsïtsïki uauarhuni; 25k'óru Acheri uandakua méntkisï jarhasïndi. Ka ísti uandakua: Ambakiti aiangperakua engajtsï aiangunhantakia.
Currently Selected:
1 Pedro 1: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.