1 Pedro 2
2
Diósïri ireta jimbanhe
1Ísï jimbo, ásteru nósesi ambe u je, ka ásteru k'arhajpe je, ásteru chkuándira je, ka ásteru epurhpe je, ásteru uadatspe je. 2Ísï eskaksï charhakuecha na jámka engaksï kángorhenhatintku jarhajka ambakiti etsukua uékani, chájtu májkueni ambakiti uandakua jirinhantsï je, eskajtsï indeni jimbo uinhapeaka ka p'ímutantskorhentsï, 3ekajtsï cha ts'émutini jakaia eska Acha ambakeska.
4Jesusini andarhera je, tsakapuni enga tsípekueka ka engaksï tsïntsïricha no jaiapanhentaka, ka Diósïri jimbo kánekua ambakitisti. 5Chájtujtsï ísïska eska tsakapu tsípiticha, enga Diósï jakajkutichani jimbo tiósta ma újka, eskajtsï táta kaxumbiti marhuatspiriuaka, eskajtsï Jesukristuni jimbo Espiritueri ambe aiatspentaaka enga Diósï jaiapanheantauaka. 6Karakataka arhisïndi: Ixu Sióni k'énharhi tsakapu ma erakukata péraxaka, sési jásï ma, ka ima enga íni mintsikaaka no k'uratsetanhaati. 7Chánksïni jimbo engajtsï jakajkutika k'éri ambesti; k'óru no jakajkutichani jimbo, ima tsakapu engaksï tsïntsïricha no jaiapanhentapka, tsumbindikua úkorhentasti, 8no jakajkutichaksï imani tsakapurhu atakorhesïndi, jimbokaksï uandakuani no jakajkusïnga; ka indenksïsï uétarhenchani jápti. 9Ka chájtsï sïrukua erakukateska, chájtsï sési jimbo Diósïri tátecheska, Diósïri ireta erakukata, kaxumbiticha, engajtsï úandantaaka Diósïri k'érikuani, cha engaksïni Diósï pájpakandekuarhu uératini ióarhintaaka ka imeri t'ímarhandekuarhuksïni pérani. 10Cha engajtsï urhetku no imeri iretepka ka engajtsï iásï Diósïri iretekia, chánksïni engaksïni Diósï no p'amojkuempka, iásïksïni p'amojkusïndia. 11Pámpiricha, arhixakaksïni, eskajtsï na jimbo parhakpeni terutsemaaka, ásteru nósesi ambe tsiti je, jimboka inde chéti tsípekua jingunksï uarhiperasïnga. 12Kaxumbe je, no jakajkutichani japarini, eskaksï ima engaksïni nósesi úrini arhiparhatani jaka, chánksïni sési ambe úni exerini, Diósïni k'éri ambe arhiaka jiájkani enga ima arhijpeaka imani ambe jimbo enga xáni únhaka.
Juramutichani kurhajchaa je
13Achani jimbo, parhakpeni anapu juramukuani kurhajcha je: Irechani kurhajcha je, jimboka ima juramukua jatsiska, 14juramutichantu kurhajchaa je, jimboka k'éri juramuti axaaska eskaksï no ambarhati k'uiripuechani atauaka ka ambarhatichani sési arhiani. 15Diósï íni ambesï uéjti: Eskajtsï sési ambe úparini, pínasku jatsiantauaka imani engaksï no jánhaskajka ka tandosïksï.
16Chájtsï úsïnga jandiojku jángorheni, ka no jimbokajtsï újkia iámu ambe úni, úakajtsï nósesi ambe úni, sánderu sáni Diósïri jántspirini jáma je. 17Iámenduechani janhanharhia je, ka erachichani xénhchaa je, Diósïni chénharhi je, ka irechani janhanharhi je.
18Jántspiricha, janhanharhia je chári ánchetpirichani, ka no imechantku engaksï sési arhistatspejka, iámechantu ísï engaksï kánekua uinhamarhetspejka. 19Jimboka Diósï újchakurasïnga neni enga tekaantka ka ísku úndani útasï nósesi kánhaani. 20Nómbema sésisti tekaantani engajtsï atanhani janhaaka nósesi ambe úrini. K'óru Diósïri jimbo sésisti engajtsï sési ambe úrini útasï atanhaaka ka cha tekaantani. 21Nóchkajtsï íni jimbosï ióarhinha andi, Krístujtu cha jimbo nósesi nimakorhespti, ka exerastiksïni néna engajtsï jámaaka. 22Krístu nómeni k'amanharhintasti ka nójtu méni tandosï újpesti; 23engaksï Krístuni útakuni jarhempka, ima nónemani útakuntasïrempti; nómbe ma arhiantasïrempti chéraani uékani imechani engaksï nósesi kántani jarhempka, sánderu sáni Diósïni jurajkukusïrempti, imani enga arhijpejka eska na k'uanijka. 24Krístu juchari k'amarhintskuechani ichaparhaaspti enga cháparhatanhapka, ka juchari k'amanharhintskua k'amajkuatinia, juchachi irekaaka ísï eska na k'uanijka; Krístu atanhasti ka chájtsï ambakeranhantaska. 25Chájtsï karichi kuátakateni jámaxapka, k'órujtsï iásï karichi eranguti jinguni niántaskia enga chári tsípekuani eranguni jarhajka ka exeni jarhani.
Currently Selected:
1 Pedro 2: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.