Sefanja 2
2
ǃHobasens ǃoa hâ ǂgais
1Tao-oǃnâ ǁaese ǂōrisase ôaǃnâsen re, 2ǀapob khami du nî ǃgombēhes aiǃâ, ǀaexa ǁaib ǃKhūb dib sadu ai nî ǁgôaxas aiǃâ, ǃKhūb ǀkhaob di tsēs sadu ai nî hās aiǃâ. 3ǃKhūba ôa re, ǃhūb ǃnâ hâ ǃgamǃgamsensa khoedu hoadu, ǁîb di mîmāde ra ǁnâuǀnamdo. ǂHanu-aisiba ǁgūba re, ǃgamǃgamsensa ǃoa ǁgū re. ǀNîsi du ge ǃKhūb ǁaib di tsēs ai nî sâuhe.
Israels ǂnamipe hâ ǁaedi ǀgoraǃgâhes
4Khoe-i xare-i ge Gasas ǃnâ ǃgau tide. Askelons ge nî ǀkhaiǃnâ. Asdods ge tsēǃgâǁaeb ai nî ǀkhaiǀkhaiǃnâhe tsî Ekrons ge nî hîkākāhe.#Jes. 14:29-31; Jer. 47:1-7; Ese. 25:15-17; Joe. 3:4-8; Amo. 1:6-8; Sax. 9:5-7 5Tsūba sadu hurib amǃgâ ǁan hâdu, Kretas dido. ǃKhūb di mîs ge sa ǃoagu hâ Filisteǁîn di ǃhūts Kanaantse. Tita ge satsa nî hîkākā, ǀgui khoe-i tsîn ǃgau tides kōse. 6Huri-am ǀkharib ge ǃû-aise ǀgui nî ī, gūǃûi-aogu gūna ra ǃûi ǃkhaise tsî gūǃharadi ǃkhaise. 7Huri-am ǀkharib ge nî ûiǃgau ge khoen Judab din di kai. ǁÎn ge ǁnāpa gūn âna ǃû kai tsî Askelons omdi ǃnâ nî ǁgoe, ǃKhūb ǁîn di Elob nî ǁîna ǀkhomxa tsî ǃgâiǃgâxa kai xui-ao.
8“Tita ge Moabǁîn di ǃkhāǃkhādi tsî Amonǁîn di mîǁgaiǁgaidi tsîna ge ǁnâu, ǁîdi ǀkhan ge ti ǁaesa ǃhō tsî ǀkharib ân ǃoagu gere koasende.#Jes. 15:1—16:14; 25:10-12; Jer. 48:1—49:6; Ese. 21:28-32; 25:1-11; Amo. 1:13-15 9ǁNā-amaga tita ûi hâ ǃkhais ao, tib ge ǃKhūb Hoaǀgaixab, Israels di Eloba ra mî. Moab ge Sodoms khami nî ī tsî Amonǁîna Gomoras khami, ǁîǁhaiben tsî ǂōxa ǂgāgu tsîn di ǃkhaise, ǀamose ǃū-aisase. Ûiǃgau ge khoen ti ǁaes din ge xūn âna ǁîna xu nî ǁkhâuǁnâ tsî ǁîn di ǃhūba nî ǀumi.”#Gen. 19:24
10ǁNātin ge ǁîna nî ǁkharahe, ǁîn di ǀgapiǀgapisenni ǃaroma, ǃKhūb Hoaǀgaixab di ǁaesa mîǁgaiǁgai tsîn ǁîn ǃoagu gere koasen amaga. 11ǃKhūb ge ǁîna ǃaoǃaosase nî ība. ǁÎb ge ǃhūbaib di elogu hoaga nî ǀam kai, tsîs ge mâ ǁaes hoasa ǁîba nî ǀgoreǀî, mâs hoasa ǁîs di ǃhūb ǂûb ǃnâ.
12Sadu Etiopiaǁîdu tsîn ge ti gôab xa nî ǃgamhe.#Jes. 18:1-7
13 ǃKhūb ge ǃommi âba ǀapasǀî ǀhōǂui tsî Siriaba nî hîkākā. ǁÎb ge Ninevesa nî ǀkhaiǃnâ ǃkhai kai, ǂnâsa ǃgaroǃhūb ase.#Jes. 10:5-34; 14:24-27; Nah. 1:1—3:19 14ǂGui ûitsama xūn ge ǁîs ǃnâ nî ǁgoe, ǂguiǃnâgu ǀgurun tsî xamarin ǃaub din hoana. ǀHonedi ge ǁîs di ǂkhâǃnâgu ai nî hâ tsî ǁîdi āb ge mûǂuidaode-u nî ǁnâusen. ǃKhom hâ xūn di ǀapob ge dao-amdi ǃnâ nî ǁgoe tsî sederhaigu ommi digu ge nî ǀkhaiǀkhā. 15ǁNās ge ǀgapi ǃās ǃnorasase gere hōǃâsens, ǁîs ǂûs ǃnâ “Tita khami ī ǃā-i xare-i a ǀkhai” ti gere ǂâisa. Nēsis ge ǁîsa go ǀuiǁkhobo kai tsî ǀgurun tsî xamarin di ǁgoeǃkhaise go ī. ǁNāpa-u ga ǃkharu-i hoa-i ge ǁîsa ǃhō tsî nî ǃnabindana.
Currently Selected:
Sefanja 2: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.