Job 2
2
Satanni ge Joba ǁkhawa ra ǃâitsâ
1ǁKhawas ge tsēsa ge hā Elob di ǀhomǃgān ge hāsa, ǃKhūb aiǃân nî ǂhaise. Satanni tsîn ge ǁîn ǁaegu ge hâ i, ǃKhūb aiǃâ nî ǂhaise. 2Ob ge ǃKhūba Satanna ge dî: “Mâpa xūts satsa ra hā?”
Satanni ge ǃKhūba ge ǃeream: “Tita ge ǃhūbaib ai nēpas, naupas ti gere hâma.”
3 ǃKhūb ge ǃaruǀî Satanna ge dî: “Ti ǃgāb Joba kha ǃgaoǃgâts ge? ǁÎb khami ǂnao-o tsî ǂhauǃnâ khoe-i, Eloba ǃaoǃgâ tsî ǂkhababa ǁkhan hâ-i ge ǃhūbaib ai a ǀkhai. ǁÎb ǃoaguts gere xū-eb dī tama, xawe ǁîba ta nî hîkākāse a khâikhâiǃnâ te, xawes tsînab ge Joba ǁîb di ǂgomsa ge ǃkhōǀgara.”
4Ob ge Satanna ǃKhūba ge ǃeream: “Khōb ǃaroma khōb. Khoe-i ge ǁî-i ûiba sâus ǃaroma ū-i hâ xūn hoana nî mā. 5Xawe nēsits ga sa ǃomma ǁîbǀî ǀhōǂui tsî ǁîba ǂnau, ots nî mû ǃkhais ge satsab nî ǀgoesa!”
6Ob ge ǃKhūba Satanni ǃoa ge mî: “ǃGâi a, ǁîb ge sa ǀgaib ǃnaka hâ, ǁîb di ûib ǀguiba sâu re.”
7ǁNās khaoǃgâb ge Satanna ǃKhūb aiǃâba xu ǃgû tsî Joba kaise tsûsa ǀhapidi, ǂaiǃnāba xu ǂamǃnâb kōse ge ǂnauǂoadi ǀkha ge ǂnau. 8Jobi ge tsaob ǃnâ sī ǂnû tsî ǂgoasūǃâro-e ū tsî ǁî-i ǀkha gere xoasen. 9ǁÎb di taras ge ǁîb ǃoa ge mî: “Noxopats kha a ǂgomǂgomsa? Eloba ǀgoe, î ǁō!”
10Xaweb ge ǁîsa ge ǃeream: “ǁNâuǃāoǃnâ taradi di ǀguis khamis ge ra ǃhoa. ǃGâin ǀguina da kha Eloba xu nî ǃkhōǃoa, tsî da tsū-i xare-e a ǃkhōǃoa ǁoa?” Nēn hoan ǃnâb ge Joba mîb ge xūn ǀkha ge ǁore tama hâ i.
Jobi horesagu ra hā
11Jobi ǃnona horesagu ge ǁîb ǀkha ge ī tsūǃgâgu hoaga ǁnâu, ob ge mâb hoaba ǁîb ǂhunuma ǃhūba xu ge hā, Elifasi Temanǁîb, Bildadi Suaǁîb tsî Sofari Namatǁîb tsîga. ǁÎgu ge Joba gu ǀguipa gu hâse sī tsâbaǁhao tsî nî ǁkhaeǂgaose ge ǀhao. 12ǁÎba gu ge ǃnūseba xu mû, o gu ge ǁîba mûǃās tsîna ge hî tama hâ i tsî ǃgarise ge ātsoatsoa. Mâb hoab ǁîgu dib ge sarab âba ǀkhau tsî tsaraba danadi âgu ai tsî ǂoab ǃnâ gere tsoro. 13ǁÎb ge kaise gere tsâ ǃkhaisa gu ge mû, xui-ao gu ge ǁîb tawa hû tsēdi tsî tsuxugu tsîna, xū-i xare-e mî tamase ge ǂnû.
Currently Selected:
Job 2: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.