Johaneb 21
21
Jesub ge hû ǁkhāǁkhāsabega* ra ǂhai
1Nēn khaoǃgâb ge Jesuba ǁkhawa ǀgui ǃnāsa ǁîb di ǁkhāǁkhāsabegu aiǃâ Tiberiahurirob tawa ge ǂhai. Tsîb ge nēti ge ǂhaiǂhaisen: 2Simon Petrub, Tomab hîa Didimub tis tsîna gere ǂgaiheb, Natanaeli, Galileab ǃnâ ǂnôa ǃās, Kanas dib, Sebedeub ôakha tsî ǀnî ǀgamkha Jesub di ǁkhāǁkhāsabegu dikha tsîgu ge hoatsama ge ǀhao hâ i. 3#Luk. 5:5Ob ge Simon Petruba ǁîgu ǃoa “ǁAuǃkhōǃgû ta ra” ti ge mî.
Tsî gu ge “Sige tsîn ge sats ǀkha nî ǃgû” ti ge mî. O gu ge ǂgaus ǀkha ge ǃgû, xawe gu ge ǁnā tsuxuba xū-i xare-e ǃkhō tama ge hâ i. 4ǁGoaǃaromab ge Jesuba hurirob di ǀnomammi tawa ge mâ i, xawe gu ge ǁkhāǁkhāsabega Jesub a ǃkhaisa ge ǀū i. 5Ob ge Jesuba ǁîga ge dî: “Ti ôago, amase go ǁau-i tsîna ǃkhō tama hâ?”
O gu ge “Hî-î” ti ge ǃeream bi.
6 #
Luk. 5:6
Ob ge ǁîgu ǃoa ge mî: “Sago ǀûisa ǂgaus di amǀkhāb ai aoǂgā, o go ge nî ǃkhō.” ǁNā-amaga gu ge ge aoǂgā. Tsî ǁaun ge kaise ǁîs ǃnâ ǂgui i xui-ao gu ge ǃaruǀî ǁîsa ge ǂgae ǁoa i.
7ǁKhāǁkhāsabeb Jesub ge ǀnam hâ ib ge Petrub ǃoa “ǃKhūb ge!” ti ge mî. Ob ge Simon Petruba ǃKhūb a ǃkhaisab ge ǁnâu, o anaǂamsarab hîab sîsenni gere xui-ao ge ǂgaeǂui hâ iba, ana tsî hurirob ǃnâ ge uriǁgôa. 8Xawe nau ǁkhāǁkhāsabegu ge ǁaun xa ǀoa hâ ǀûisa ǂgae hâse ǂgauros ge khoesedisi metergu ǀguiga ǀnomamma xu ǃnū i xui-ao hurirob ǀnomammi ai ge hā. 9Tsî ǀnomammi ai gu ge hā, o gu ge ǂnomǀae-i ǁî-i ai-i ǁauro-e amhe hâ-i tsî pere-i tsîna ge mû. 10Ob ge Jesuba ǁîgu ǃoa ge mî: “ǁNā ǁaun ǀase go go ǃkhōn xa hā-ū re.”
11Ob ge Simon Petruba ǂgaus ǃnâ ǂgâ tsî ǀûisa ǀnomammi ǁga ge ǂgaeǂui. ǁÎs ǃnân ge ǀguikaidisi tsî korodisiǃnonaǀa kai ǁauna ge hâ i, xawe ǁnātikōsen ge ǂgui i xawes ge ǀûisa ge doa tama hâ i. 12“Hā, î go ǁgoaǂûsa ūhā re” tib ge Jesuba ge mî. ǀGuib ǁkhāǁkhāsabegu dib tsîn ge ǁkhoaǂgaosiba ge ūhâ tama hâ i, ǁîba “Taritsa” ti dîsa, ǃKhūb a ǃkhaisa gu ge ǂan i amaga. 13Ob ge Jesuba hā tsî pereba ū tsî ǁîga ge mā, ǁnās ǁkhāsab ge ǁau-i ǀkha ge dī.
14Nēs ge ǁō hâna xub ge khâis khaoǃgâ ge ǃnonaǁî ǃnā i, Jesub ge ǁkhāǁkhāsabegu âba ǂhaisa.
Jesub tsî Petrub
15ǁGoaǂûs khaoǃgâb ge Jesuba Petruba ge dî: “Simon, Johaneb ôatse, nēgu ǃgâ-ai kha tita ǀnamts hâ?”
Ob ge Petruba ge ǃeream: “Ā ǃKhūtse, sats ge a ǂan ǀnam tsi ta a ǃkhaisa.”
Ob ge Jesuba “Ti ǁkhaona ǃû kai” ti ge mî. 16Tsîb ge ǁkhawa ǀgamǁî ǃnāsa ge dî: “Simon, Johaneb ôatse, ǀnam tets a?”
Ob ge Petruba ge ǃeream: “Ā ǃKhūtse, ǂants ge a ǀnam tsi ta a ǃkhaisa.”
“O, ti gūna ǃûi” tib ge Jesuba ge mî. 17Jesub ge ǁkhawa ǃnonaǁî ǃnāsa ge dî bi: “Simon, Johaneb ôatse, ǀnam tets a?”
Ob ge Petruba ge ǃoa, Jesub ge ǃnonaǁî ǃnāsa “ǀNam tets a” ti dî bi ǃkhais xa. Tsî ǁîb ǃoa ge mî: “ǃKhūtse sats kom hoa xūna a ǂano, tsîts ge ǂan ǀnam tsi ta a ǃkhaisa.”
Ob ge Jesuba ge ǃeream: “O, ti gūna ǃû kai. 18Amase ta ra mîba tsi, ǂkhamts ge i, ots ge aitsama ǃgaesen tsî ǂgaots ra ǃkhai-i ǁga gere ǃgû. Xawe kairats ka, ots ge ǃomkha nî ǀhōǂui tsîn ge ǀkharana ǃgae tsi tsî ǂgao tamats hâ ǃkhai-iǀî nî ǃgû-ū tsi.” 19Jesub ge nēsa Petrub ǃoa ge mî, ǁgaub nîga mâ ǁōǃnôa-i ǀkhab nî Eloba ǂkhaiǂkhaihe ǃkhaisa. Tsîb ge Jesuba ǁîba ǃoa “Sao te” ti ge mî.
Jesub tsî nau ǁkhāǁkhāsabeb
20 #
Jhn. 13:25
Tsî Petrub ge dabasen tsî ǁîb ǃgâb ai ǁnā ǁkhāǁkhāsabeb, Jesub xa ǀnamhe hâb, ǃuiǂûs tawa Jesub ai ǃgâsen tsî “ǃKhūtse, tariba satsa ra ǀapexūba?” ti ge dîba ge mû. 21Tsî ǁîbab ge mû, ob ge Petruba Jesuba ge dî: “O nē khoeb xa mâtis, ǃKhūtse?”
22Ob ge Jesuba ge ǃeream: “Tita ga ǁîb nî tita nî hās kōse hâ ǃkhaisa ǂgao-o, o tare-ets satsa ǁae hâ? Satsa tita sao!”
23Os ge nē ǂhôas ǁnā ǁkhāǁkhāsabeb ǁō tide ǃkhais disa ǃgâsagu ǃnâ ge ǂapaǂoa. Jesub ge ǁîb ǃoa, ǁōb tide ti ge mî tama hâ i, xaweb ge “Tita ga ǁîb nî tita nî hās kōse hâ ǃkhaisa ǂgao-o, o tare-ets satsa ǁae hâ?” ti ge mî.
24Nēb ge ǁnā ǁkhāǁkhāsabeb nēn xa ǃkhō-am tsî ge xoaba tsî da ge ǁîb di ǃkhō-ams a ama ǃkhaisa a ǂan.
ǀAmǀams
25Jesub ge ǁkhāti ǀnî ǂgui xūna ge dī. Hoan ga ǀguiǀguibese xoahe hâ, o ta ra ǂâi ǃkhais ge ǃhūbaib ga xoahe nî ǂkhanide sâuǃkhai-e ūhâba tama hâsa.
Currently Selected:
Johaneb 21: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.