ǂHanuǂhanu-aogu 2
2
ǃKhūb di ǀhomǃgāb Bokims tawa
1 ǃKhūb di ǀhomǃgāb ge Gilgalsa xu Bokims tawa sī tsî Israelǁîn ǃoa ge mî: “Tita ge sado Egipteba xu ū tsî sadu aboxaga ta ge mîmâiba ǃhūb ǃnâ ge hā-ū. Tsî ta ge ge mî: ‘Ti ǃgaeǀhaos sadu ǀkha ta ge dīsa ta ge ǀnîtsē khôa tide. 2Nē ǃhūb ǃnâ ǁan hâ khoen ǀkha du ge ǃgaeǀhao-e dī tide. ǁÎn di altarde du ge nî khôaǁnâ.’ Xawe du ge tita ge mîba du khami dī tama ge i. Tare-i ǃaroma du kha ǁnāti ge dī?#Eks. 34:12-13; Deu. 7:2-5 3ǁNā-amaga ta ge nēsi ra mîba du nē khoena ta sadu aiǃâ ǁgariǂui tidesa. ǁÎn ge khākhoese nî ība du tsî ǁîn elona ǀgoreǀîs ge ǁnoa-i ase nî ība du.” 4ǀHomǃgāb ge nēsa a mî, on ge Israelǁîn hoana ǃgarise ge ā, 5ǁnā-amagan ge ǁnā ǃkhaisa Bokim#2:5 Bokim: Nē ǀons ge Hebregowab ǃnâ ā ran ti ra ǂâibasen. ti ge ǀonǂgai. Tsîn ge ǃKhūba ǁnāpa ǁguibade ge hā-ūba.
Josuab di ǁōb
6Josuab ge Israelǁîna a ǃgû kai, o i ge mâ-i hoa-e ǁî-i di ǃhūǃâs ǂûsa sī ge ūbasen. 7Josuab ûiǁaeb hoaban ge Israelǁîna ǃKhūba gere ǃoaba, tsîn ge ǁîb ge ǁōs khaoǃgâs tsîna ǃKhūb ge Israela a dība kai xūn hoana ge mû ǂgaeǂgui-aogu a ûitsamas kōse ǁnās ǀkha gere aiǃgû.#Jos. 24:31 8ǃKhūb di ǃgāb Josuab, Nunni ôab ge ǀguikaidisi tsî disi kurixab a hîa ge ǁō.#Jos. 24:29 9ǁÎb ge ǁîb di ǃhūǃâs ǂûs ǃnâ Timnat-Heres, Efraimmi di ǃnâuxa ǃhūb ǃnâ Gaasǃhommi di ǀapasǀkhāb ai ǂnôas tawa ge ǁkhōhe.#Jos. 19:49-50 10ǁNā hoaraga surib ge ge ǁōǂoa, tsî sao ra surib ge ǃKhūb tsî ǁîb ge Israela dīban tsîna ge ǀuru.
Israelǁîn ge ǃKhūba ra ǀgoreǀîǀû
11Israelǁîn ge ǃKhūb ǃoagu ǁore tsî Baala ge ǃoabatsoatsoa. 12ǁÎn ge ǃKhūb, ǁîn aboxan di Elob, ǁîna ge Egipteba xu a ǂgaeǂguiǂuiba ǀgoreǀîǀû tsî ǀkhara elon, ǁîn ǂnamipe hâ khoen dina ge ǀgoreǀîtsoatsoa. ǁÎn ge ǁnā elon aiǃâ ǃhonǁgoa tsî ǃKhūba ge ǁaiǁai. 13ǁÎn ge ǃKhūba ǀgoreǀîǀû tsî Baalgu tsî Astartedi tsîna gere ǃoaba. 14Ob ge ǃKhūba Israelǁîn ǀkha kaise ǁaixa tsî ǁkhâuǁnâ-aon xan nî ǃnariǀhanahesa ge mā-am. ǁÎb ge ǁîn ǂnamipe hâ khākhoen xan nî danhesa ge mā-am, tsî Israelǁîn ge ǃaruǀî ǁî-aitsama ge ǁkhaubasen ǁoa i. 15ǃKhammi ǃoan ga ǃgûǂoa ǃnās hoasab ge ǃKhūba ǁîn ǃoagu ge hâ i, ǀnaib ge aiǃâ ǁîna mîba hâ i khami. Israelǁîn ge kaise ǃgomma gere tsâ.
16Ob ge ǃKhūba ǁîna ǂgaeǂgui-aoga ge mā, ǁîna ge ǁkhâuǁnâ-aona xu a huiǂuiga. 17Xawen ge Israelǁîna ǁîga ǃgâ ǂgao tama ge i. ǁÎn ge ǃKhūba ǂgomǂgomsase hâba tama i tsî ǀkhara elona gere ǀgoreǀî. ǁÎn aboxan ge ǃKhūb di mîmāde ge ǁnâuǀnam hâ i, xawe ǁîn khaoǃgâ ra sao surib ge ǁnāsa ge dīǀû. 18ǃKhūb ge Israelǁînab ga ǂgaeǂgui-aoba a mā ǃnās hoasa ǁîba gere hui, tsî ǁnā ǂgaeǂgui-aob ûi hâs kōse ǁaesa khākhoen âna xu gere huiǂui. ǃKhūb ge ǁîn di tsâb tsî ǁgâiǀāb ǃnân ga ǃgae, o ǁîna gere ǀkhomxa. 19Xawe ǂgaeǂgui-aob ga ǁō on ge ǁkhawa ǁîn di ǀoro ǁnaetiga ǃoa gere oa tsî aboxan ǃgâ-ai ǂkhawase gere tanisen. ǁÎn ge ǀkhara elona ǃoaba tsî gere ǀgoreǀî, tsî ǁîn di ǂkhaba ǁnaetiga ǁnāxū ǂgao tama gere i. 20Ob ge ǃKhūba Israelǁîn ǀkha ǁaixa tsî gere mî: “Nē ǁaes ge ti ǃgaeǀhaos ǁîn di aboxana ta ge dīn nîse mîmāsa go khôa. Titan go ǁnâuǀnam tama i, 21amaga ta ge Josuab ge ǁō ǁaeb ai ge noxopa ǁnā ǃhūb ǃnâ hâ i ǃhaodi di ǀguis xawes tsîna ǃaruǀî ǁgariǂui tide. 22ǁNā ǃhaodi ǀkha ta ge nî ǂanǂui, nē Israelǁîn, ǁîn di aboxan khami ti daoga nî saos tamas ka io ǁnāsan dī tidesa.” 23ǁNā-amagab ge ǃKhūba ǁnā ǃhaode ǃaruǀî ǃhūb ǃnâ ge hâ kai. Josuabab ge ǁîdi ǂama dansa mā tama ge i, tsîb ge ǁîde ǁkhāti Josuab di ǁōb khaoǃgâs tsîna ǃhaese ǃhūba xu ǁgariǂui tama ge i.
Currently Selected:
ǂHanuǂhanu-aogu 2: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.