Habakuk 3
3
Habakuki di ǀgores
1Kēbo-aob Habakuki di ǀgores, Sigajons ai:
2 ǃKhūtse sa dīgu xa ta ge ge ǁnâu,
tsî ta ge kaise ge burugâ.
Nēsi sida ûiǁaeb ǃnâs tsîna
ǁîga ǁkhawa dī re.
Sa ǁaib ǃnâs tsîna ǀkhomxa da re.
3Elob ge Temansa xu ra hā;
ǃAnub ge Paranǃhomma xu ra hā.
ǁÎb di ǂkhaisib ge ǀhomma ge ǃgū-ai;
ǁîb di ǃgôasib ge ǃhūbaiba ge ǀoaǀoa.
4ǁÎb ge ǃnâb di ǂkhaib ǀkha ra ǀkhī;
ǃnâb ge ǁîb ǃomǁaeba xu ra ǀkhâuǂoaxa,
ǁnāpa, ǁîb ǀgaib hâpa xu.
5ǂHīǁōb ge ǁîb ais ai garu,
ǁkhōǁkhōsa ǀaesenain ge ǁîba saogaru.
6ǁÎb ga mâ, ob ge ǃhūbaiba ra ǂgubi,
ǁîb ga kō, o di ge ǃhaode ra ǀkhū.
ǀAmosiba xu mâ ǃhomgu ge ra ǂkhūǂkhūhe;
ǀoro ǁaeba xu hâ ǃnâugu ge ra ǂamǂamhe,
ǁnāgu ǀoro ǁaeba xub gere ǃgû-aiga.
7Kusanni tentomdi ǃaob ǃnâ hâsa ta ge ge mû;
Midianǃhūb di ǂgāmâisagu ge ge ǀkhū.
8ǃĀgu ǃoaguts kha ge ǁaixa hâ i ǃKhūtse?
Sa ǁaiba kha ǃāgu ǃoagub ge hâ i,
tamas ka io huribats ge ǁaixaǂam hâ i,
sa hāgu aits ge ǃgapio
sa torokunidi dans didi aits ge ǃnario?
9Sa khāsats ge ge ūǂui
tsî ǂāga khāsǁapab ai ge mâi.
ǃHūbaibats ge ǃāgu ǀkha ge ǀgoraǃā.
10ǃHomgu ge satsa mû tsî ge ǀkhū;
ǁgamgu ge ǀgaisase ge dâuǁgôaxa.
ǃGam ǁgamgu ge ǀgaisase ge ǀō,
tsî gu ge ǁîgu di ǃgabiga ǀgapise ge khâi.
11Sores tsî ǁkhâb tsîra ge ge ǃnōmâ
ǂkhaib sa ǃae-ī ra ǂāgu dib xa,
ǃnâb sa napa ra ǁhâigôab dib xa.
12ǁAixa hâsets ge ǃhūbaiba ge ǃgûǃnâǃganu,
sa ǁaib ǃnâts ge ǃhaode ge dāǂkhū.
13Sa ǁaesats nî oresets ge ge ǃgûǂoa,
sa ǀnausabebats nî orese.
Eloxoresan di ǂgaeǂgui-aobats ge ge ǂkhūǂkhū,
ǁîbats ge ǂaisa xu danas kōse ge ǀkhaiǀkhā kai.
14ǁÎb di ǁhâigôab ǂûb ǀkhats ge
ǁîb khoegu di ǂamkhoeba ra ǃkhāǃganu,
ǁîgu ga sida nî ǃhaiǃāse ǃkhoeǂoaxao,
ǂganǃgâsib ǃnâ ǀgâsana ra ǁgâiǀān khami ra dâse.
15Sats ge sa hāgu ǀkha hurib ai ge dā,
gon ra ǀgaisa ǁgamgu ai.
16Nēna ta ge ǁnâu, o ta ge ge ǀkhū,
ti amǁgaukha ge ǀōb xa ge ǀkhū.
Ti soros ge ge ǂkhabu
tsî ti ǀnūkha ge ge ǁnobe.
Tita ge ǃnōsase ǂōǂōsib di tsēsa nî ǃâu,
îs ǁnā ǁaes sida ge ǁnāǂams ai hā.
17ǀNomahais ga ǂûtani tama i
tsî ǂû-i ga draibehais ai ǀkhai,
ǀkherahais di ǂûtanib ga ī ǁoa
tsî ǃhanagu ai i ga ǂû-i xare-e ǀkhai,
gū-i xare-i ga gūǃharadi ǃnâ ǀkhai
tsî goman di ǃharadi ga ǀkhaiǃnâ,
18xawe ta ge tita ǃKhūb ǃnâ nî ǃgâiaǂgao,
tita ge Elob ti Ore-aob ǃnâ nî dâ.
19 ǃKhūb Elob ge a ti ǀgai.
ǁÎb ge ti ǂaira ǁgû-i ǂaidi khami ra ī kai,
ǁîb ge ǀgapi ǃkhaigu ai ǃgûs
di ǁkhāsiba ra mā te.
ǁNaeǃnans ǂgaeǂgui-aob ǃoa; ǁapaxa ǀkhōxūs ai.
Currently Selected:
Habakuk 3: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.