Ester 2
2
Esters ge ra gao-ao kai
1Egab ge gao-aob Ahasverosi ǁaiba sī a ǁgôaxa, ob ge ǁîba Vastis ge dī ǃkhais xa tsî ǁîs ǂamab ge mā mîmās xa gere ǂâiǂâisen. 2O gu ge gao-aob ǀapemā-aogu, ǁîb ǃoabas ǃnâ mâga ge mî: “Tare-i ǃaromats îxa oaxaede ôa kaibasen tama hâ? 3Mâ ǀkharib gaosib hoab dib ǃnâts ge ǂamkhoega nî ǁgaumâi, î gu îxa oaxaede sa hâǃkhaib, tarekhoedi nî hâǃnâse ib ǃoa nēpa Susas ǃnâ hā-ū. ǁÎde Hegaib, ǂamkhoeb, sa tarekhoede ra mûǂammi di kōǃgâs ǃnaka hâ kai, î ǁîde anu-anuhe di nîse ǃgâihamǁnui-i ǀkha ǂkhauǀkhā. 4ǁNās khaoǃgâ sats ǁîs xa nî ǃgâibahe ǂkham khoesa Vastis di soas ǃnâ gao-aodī.”
Gao-aob ge nē ǀapemās xa ǃgâibahe tsî ǁnāti ge dī.
5Susas ǃnâb ge Jodeǁîb, Mordekai ti ǀon hâb, Jairi di ôab, Benjaminni di ǃhaos tsî Kisi tsî Simeib hâkha suriba xu hâba ge hâ i. 6ǁÎb ge Babiloniab gao-aob Nebukadnesari xa ge Judab gao-aob Jojaginni ǀkha Jerusalemsa xu ǃkhōsabese ǃgû-ūhe khoen di ǀgui ge iba.#2Gao. 24:10-16; 2Kro. 36:10 7Mordekaib ge ǁîb omeb Aminadab ôas Esters, Hebregowab ǃnâ Hadassa ti ra ǀonǂgaihesa ge kaikai. ǁÎs ge îxa ǂkham khoes îxa sorosa ge ūhâ isa; ǁîs îra ǁōb khaoǃgâb ge Mordekaiba ǁîsa ǀgôase ūbasen tsî ge kaikai.
8Gao-aob di ǀasa mîmās ge ǂanǂanhe, o di ge ǂgui ǂkham khoedi, Esters tsîn ǁîdi ǃnâ hâde Susas ǃoa ge hā-ūhe. ǁÎs tsîn ge gao-ommi ǃnâ Hegaib, gao-aob tarade gere ǃûib mûǂams ǃnaka ge ǁnāxūhe. 9Hegaib ge Esters xa îxabahe tsî ge ǃgâibahe tsîb ge ǁnātimîsi îxa-îxas, ǃguris tsî ǀō-aisa ǂûmās tsîn ǀkha ge tsoatsoa. ǁÎb ge hû tarekhoedi gao-ommi dide ǁîsa di nî sîsenbase ge ǁgaumâi tsîb ge ǁîs tsî ǁîs sîsenaodi tsîna tarekhoedi hâǃkhaib ǃnâ ǂoaǂamsa ǃkhaib ai ge hâ kai.
10Mordekaib ǀapemās ais ge Estersa Jodeǁîs a ǃkhais tsî tari-i suriba xus hâs tsîna ǂanǂan tama ge i. 11Mâ tsēs hoasab ge Mordekaiba, Esters ǃgâise hâs tsî taren ǁîs ǀkha ra ī ǃkhaisab nî ǂanga hâǃkhaib di omǂnamib aiǃâ gere ǃgûma.
12Mîǁguisa îxa-îxaǀgaub di sîsenni ǂkham khoedi dib ge disiǀgamǀa ǁkhâga gere dīhe. ǁÎdi ge ǃnani ǁkhâgu ǁaeba mire-oli-i ǀkha tsî sao ra ǃnani ǁkhâga ǃgâihamxūn ǀkha gere sopoǂgāhe. ǁNās khaoǃgâs ge mâ ǂkham khoes hoasa ǁîs di ǃnās gere hā, o gao-aob Ahasverosi ǁga gere ǃgû. 13ǁÎs ge taradi hâǃkhaiba xus ge gao-omma ǃoa gere ǃgû, o ǁîs ra ǂgao xūn hoana gere māhe, îs ūsao. 14ǁÎs ge ǃuia gao-ommi ǃnâ sī tsî nau ǁgoaga ǀnî hâǃkhaib taradi dib ǃoa gere ǃgû tsî ǁnāpa ǂamkhoeb Sasgab di mûǂams ǃnaka gere hâ. ǁÎs ge gao-aob ga ǁîsa ǁâ tama i tsîb ǁkhawa ǂgai si tama hâ, hîa ǁîb ǃoa ge ǃgû tama hâ i.
15Esters, Abigaili, Mordekaib omeb ôas, Mordekaib xa ge ǁîb ôase ūhe tsî kaikaihes di ǁaeb, gao-aob tawas nî sīb ge ge ǀoa. ǁÎs ge hoa xūna Hegaib ge ǁîsa ǀapemā khami ǀgui ge dī tsî ǁîsa ge mû-i hoa-i ge ǁîs xa gere buru. 16Hûǁî kurib gao-aob Ahasverosi dib ǃnâ, disiǁî ǁkhâb, Tebeti ǃnâs ge Estersa gao-ommi ǁga gao-aob ǃoa ge hā-ūhe. 17ǁÎb ge Estersa nau taradi hoadi âb xa ǃnāsase ge ǀnam, ǁîb ge ǁîs xa nau ǂkham khoedi hoadi ǃgâ-ai ǃgâibahe tsî ǁîsa gao-aosi kronsa ǀgapa tsî Vastis ǃās ǃnâ ge gao-aodī. 18Gao-aob ge kai ǂûǁaesa ǁîb ǂamkhoegu tsî ǁîb ǂhunuma ǃoabas ǃnâ mâ khoegu tsîna Esters ǃgôasib ǃaroma ge dība. ǁÎb ge ǁkhāti ǁgui-aimarina hoaraga gaosib ǃnâ ge ǀoroǀoro tsî ǀkhaexūna gao-aosi ǁkhāsib ǃoa ge ǀgoraǂui.
Mordekaib ge gao-aob ûiba ra sâu
19Mordekaib ge ǁnā ǁaeb ǃnâ ǀgapi ǃharos ǃnâ gao-aob xa ge ǁgaumâihe hâ i. 20Esters ge ganupe mâ suriba xus hâs tsî Jodeǁîs as tsîna ge ǂanǂan tama hâ i. Mordekaib ge ǁîsa ge mîba, îs tā ǀgui khoe-i tsîna ǁnāsa mîba. Tsîs ge ǁîba ǂkhams ge i tsî ǁîb mûǂams ǃnaka hâ i, os ge ǁîba ǁnâuǀnam i khami ge ǁnâuǀnam.
21Gao-aob Ahasverosi ge Mordekaiba ǀgapi ǃharos ǃnâ ǁgaumâi, o kha ge gao-aob ǂhunuma ǂamkhoekha gao-ommi dao-aomde ra ǃûikha, Bigtanni tsî Teresi tsîkha kaise ǂkhîoǃnâ tsî gao-aoba kha nî ǃnariǃgam ǃkhaisa ge ǀapeǀhao. 22Mordekaib ge nē ǃkhaisa ǁnâu tsî gao-aos Estersa ge ǂanǂan tsîs ge ǁîsa nē ǃkhaisa gao-aoba sī ge mîba. 23Gao-aob ge nē ǃkhaisa ôaǃnâ tsî amas a ǃkhaisa ge ǂanǂui, tsî kha ge nē khoekha hoakha ǂgāhaib ai ge ǂgāmâihe. Gao-aob ge nē ǃkhaisa, ǀuruhes tidega ǂhanusi xoaǁguigu ǃnâ ge xoamâi kai.
Currently Selected:
Ester 2: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.