Daniel 2
2
Nebukadnesari di ǂguro ǁhapos
1Gao-aob Nebukadnesari ge ǀgamǁî kurib ǁîb ǂgaeǂguis dib ǃnâ ǁhapo-e ge ǁhapo. ǁÎb ge nēs xa kaise ǁom ǁoab ges kōse ge ǂhanihe. 2ǁNā-amagab ge ǃgaidī-aogu, aimûǀgaru-aogu, ǀkhūǂnau-aogu tsî ǀgamirokō-aogu tsîga ge ǂgaihā kai.#Gen. 41:8 Hā gu ge 3ob ge ǁîgu ǃoa ge mî: “ǂÂiǂhansen kai te ra ǁhapo-e ta ge go ǁhapo tsî ta ge tare-es nē ǁhaposa ra ǂâibasen ǃkhaisa ra ǂan ǂgao.”
4O gu ge ǁîga gao-aoba Aramiagowab ǃnâ ge ǃeream: “Ats gao-aotsa ǀamose ûi re. ǁHaposa mîba ge re, o ge ge ǁîsa nî ǁguiǃāba tsi.”
5Ob ge gao-aoba ǁîgu ǃoa ge mî: “Tita ge nēti go mîǁgui. Ti ǁhapos tsî ǁîs di ǂâibasens tsîra go ga mîba te tama i, o go ge sago ǃâdi ǃnâ ǁhāǃāhe tsî sago omde nî hîkākāhe. 6Xawe ǁhapos tsî ǂâibasens tsîra go ga mîba te, o go ge ǂgui ǀkhaexūn tsî kai ǃgôasib tsîna nî ǃkhōǃoa. Nēsi ǁnâi ǁhapos tsî ǂâibasens tsîra mā te re.”
7O gu ge ǁkhawa “ǃGôahesatse, ǁhaposats ga mîba ge, o ge ge ǁîsa nî ǁguiǃāba tsi” ti gao-aoba ge ǃeream.
8Nēs aib gao-aoba ge mî: “Tita ge ǃgâise a ǂan, ǁaeǁores ǀguisa go ra hîsa, tita ǁaposase mîǁgui hâ, 9ǁhaposa go ga mîba te tama i, ob ǀgui ǁkharab ǀguiba ǃâu go hâ ǃkhaisa go ra mû xui-ao. ǁNā-amaga go ge tita go nî ǂhumiba ǃkhaisa sago ǃnâ go ǁnâugu, mâsigu ǁaeb ǀkha garu nî ǀkhara ti ǂâi tsî. ǁHaposa aibe mîba te, o ta ge ǂâibasens tsîna go a mîba te ǁkhā ǃkhaisa nî ǂan.”
10O gu ge ǁîga ge ǃeream: “ǃHūbaib ai i ge gao-aots di ǂgaoǀkhās ai dīǀoaǀoa ǁkhā khoe-i xare-e a ǀkhai. ǀGui gao-ao-i tsîn ge mâtikōse ǀgui i ga kai tsî ǀgaisa, xawe nēti i ǁgui-ai-e ǁî-i kēbo-aogu, aimûǀgaru-aogu tsî ǀgamirokō-aogu tsîga ǂgaoǀkhā tama hâ. 11Sa ǂgaoǀkhās ge kaise a ǃgom, khoe-i xare-i ge ǁîsa a dī ǁoa, elogu ǀguigu ge ǁnāsa a dī ǁkhā tsî ǁîgu ge khoen ǁaegu ǁan tama hâ.”
12Nēs aib ge gao-aoba kaise ǁaixa tsî Babilons di hoaraga ǀapemā-aogu, gao-aob digu nî ǃgamhesa ge mîmā. 13Hoagu nî ǃgamhe ǃkhais ge ge ǂanǂanhe, tsî gu ge Danieli tsî ǁîb horesagu tsîna ge ôahe.
Elob ge Daniela ǁhapos di ǂâibasensa ra ǂhaiǂhaiba
14ǁNās khaoǃgâb ge Daniela gao-aob ǃûi-aogu di danab Arioxi, Babilons ǀapemā-aogab nî ǃgamse ge ǂoab tawa sī tsî ǁîba ǃaoǃgâb ǀkha ge dî, 15tare-i ǃaromab ge gao-aoba nēti i ǁkhōǁkhōsa mîmā-e māǂuisa. Ob ge Arioxa ge mîǃāba bi.
16Ob ge Daniela gao-aob tawa sī tsî gao-aob mîmās ǁaeb aibe nî mâiǂuihesa ge ǂgan, îb gao-aoba ǁhapos di ǂâibasensa mîǃāba ǁkhā. 17ǁNās khaoǃgâb ge oms ǁga oa tsî ǁîb horesagu Hananjab, Misaeli tsî Asariab tsîga nē ǃkhaisa sī ge mîba. 18Danieli ge ǁîga ge mîba, î gu ǀhommi di Elob ai ǀkhomxaǂgaosiba ǂgan, îb nē ǂganǃgâsiba ǁîga ǂhaiǂhaiba, î gu ǁîb tsî ǁîb horesaga tā Babilons di ǀapemā-aogu ǀkha ǃgamhe. 19ǁNā tsuxub ǂûb ǃnâb ge Daniela ǁnā ǂganǃgâsiba, ai-i ǃnâ ge ǂhaiǂhaibahe tsîb ge ǁîba ǀhommi di Eloba ge koa:
20“As Elob di ǀonsa koahe re ǀamosiba xu ǀamosib kōse,
gā-aisib tsî ǀgaib tsîkha ge a ǁîb di.
21ǁÎb ge ǁaegu tsî kamaga ra ǀkharaǀkhara;
ǁîb ge gao-aoga ūǁnâ tsî gao-aoga ra mâi;
ǁîb ge gā-aina gā-aisiba ra mā tsî ǂansa ǁnâuǃāxana.
22ǁÎb ge sâusa tsî ǂganǃgâsa xūna ra ǂhaiǂhai;
ǁîb ge ǃkhaenab ǃnâ hâ xūna a ǂan,
ǃnâb ge ǁîb ǂûb tawa hâ.
23Koa tsî ta ge ra kare tsi ti aboxan di Elotse.
Sats ge gā-aisib tsî ǀgaib tsîkha ge mā te.
Sats ge ǂgan tsi ta gena mā te
tsî tare-e ta gao-aoba nî mîbasa ge ǂanǂan te.”
Danieli ge gao-aoba ǁhaposa mîba tsî ra ǁguiǃāba
24ǁNās khaoǃgâb ge Daniela Arioxi, gao-aob ge ǁîb di ǀapemā-aogab nî ǃgamse mîmā hâ ib tawa sī tsî ǁîb ǃoa ge mî: “Tā gao-aob di ǀapemā-aoga ǃgam. Tita gao-aob tawa sī-ū, o ta ge ǁîba ǁîb di ǁhaposa nî ǁguiǃāba.”
25Ob ge Arioxa Daniela ǃhaese gao-aob tawa ǂgâ-ū tsî ge mî: “Jodeǁî ǃkhōsaben ǃnâ ta ge ǀgui khoeb, gao-aotsa ǁhaposa ǁguiǃāba ǁkhāba go hō.”
26Ob ge gao-aoba Danieli, Beltsasar tis tsîna ge ǂansa iba ge dî: “ǁHapo ta ge ǁhapos tsî ǁîs di ǂâibasens tsîra mîba te ǁkhāts a?”
27Ob ge Daniela ge ǃeream: “ǀGuis khami i ǀapemā-ao-i, aimûǀgaru-ao-i, ǃgaidī-ao-i tamas ka io ǀgamirokō-ao-i tsîn ge gao-aotsa ǁnā ǃkhaisa a mîba ǁoa. 28Xawe ǀhommi ǃnâ hâ Elob ge ǂganǃgâsiga ra ǂhaiǂhai. ǁÎb ge ǃgoaxaǁaeb ǃnâ nî ī xūna sats gao-ao Nebukadnesartsa go ǂanǂan. ǁOmts ǁgoe hîats ge ǁhapos ǃnâ nē aisa go mû.
29“ǃGôahesa gao-aotse, sats ge ǁomts hâ hîa ǃgoaxaǁaeb ǃnâ nî ī xūn xa go ǁhapo. Tsîb ge Elob, ǂganǃgâsiga ra ǂhaiǂhaiba ī nî xūna go ǂanǂan tsi. 30Nē ǂganǃgâsiba ta ge tita go ǂhaiǂhaibahe, tita nau khoen xa a gā-aio tama, xawe sats sa ǁhapos di ǂâibasensa ǂanǂanhe tsî sa ǂâide nî ǁnâuǃāga.
31“ǃGôahesa gao-aotse, sa ǁhapos ǃnâts ge kai ība sa ais ai go mûmâ. ǁÎb ge go kaiǃgâ i tsî kaise, ǀgaisase ǂkhai tsî ǃaoǃaosase goro mûsen. 32Danas âb ge go ǃūmû ǃhuniǀuri i, ǀūs tsî ǁôakha tsîna ǀhaiǀuri, ǃnāb tsî ǂnamira tsîna brons, 33ǀnūkha ǀuri tsî ǂaira ge ǃkharese ǀuri tsî ǃkharese go ǂgoa i. 34Noxopats ǁîba ra kō, hîa i ge kaiǃgâ ǀui-e, khoe-i xa i tsâǀkhāhe tamase khôaǁnâ tsî īb di ǂaira, ǀuri tsî ge ǂgoa ira ai ǁnā tsî ǁîra ge ǂkhūǂkhū. 35ǀUrib, ǂgoab, brons-i, ǀhaiǀurib tsî ǃhuniǀurib tsîn hoan ge ǂnoaǂkhūǂkhūhe tsî ǃgaos ǁaeb ai, dāǃnâǃkhais ai ǁgoe ǀapob khami ge ī kaihe. ǁÎn hoan ge ǂoab xa ge ǃgombēhe, ǀgui xū-i tsîn ǃgau tamase. Xawe ǁnā ǀuis, ība ge ǂkhūǂkhūs ge kai ǃhom kai tsî hoaraga ǃhūbaiba ge ǃgū-ai.
36“Nēs ge ǁhaposa. Nēsi ta ge ǁhapos di ǂâibasensa nî mîba tsi, ǃgôahesa gao-aotse. 37Sats ge kai gao-aotsa. ǀHommi di Elob ge gaosib, ǀgaib, ǁkhāsib tsî ǃgôasib tsîga ge mā tsi. 38ǁÎb ge hoaraga khoesib, ǀgurun tsî xamarin tsî ǁkhana ra anin tsîn ǂama ge gao kai. Sats ge ǁnā ǃhuniǀuri danatsa. 39Sats khaoǃgâb ge ǀnî gaosiba nî hā, sab khami kai tamaba tsî ǁnās khaoǃgâ ǃnonaǁîb, brons-i dib, hoaraga ǃhūbaiba nî gaoǂamma. 40ǁNās khaoǃgâb ge hakaǁî gaosiba nî hā, ǀurib kōse ǀgaisab, ǀurib khami hoa xūna ǂnaukhôa tsî ra ǂkhūǂkhūba. ǁÎb ge ǀurib hoa xūna ra khôaǂkhū khami, nau gaosigu hoaga ǂnauǂkhūǂkhū tsî nî hîkākā. 41ǂAira tsî ǀkhunun hîats go mûn go ǃkharese ǂgoa tsî ǃkharese go ǀuri-i, khamib ge nē gaosiba nî ǀgoraǃāsa. ǀUrib di ǀgaibab ge ǁîb ǃnâ nî ūhâ, mûts go khamib ǀuriba ǂgoab ǃnâ a habasa xui-ao. 42ǂAira di ǀkhunun hîa ǃkharese ǀuri tsî ǃkharese a ǂgoan ge nē gaosib ǃkharese ǀgaisa tsî ǃkharese a ǂkhabusa ti ra ǂâibasen. 43ǀUrib tsî ǂgoab tsîn a habasa ǃkhaisats ge go mû. ǁÎn ge ǀguisiba ǀgaiǀgaiǃnâ ǂgaos ǃaroma nî ǃgameǃnâgu, xaweb ge nē ǀguisiba mâǁapo tide, ǀurib ǂgoab ǀkha a habagu ǁoas ǁkhās khami. 44ǁNā gao-aogu di ǁaeb ǃnâb ge ǀhommi di Eloba, tātsē ǀam tide gaosiba nî ǂnûiǂgā. ǁÎb ge ǀnî gaosi-i xare-i xa danhe tide, tsîb ge nau gaosigu hoaga hoaragase nî hîkākā, xawe ǁîb ǂûb ge ǀamos kōse nî hâhâ. 45Sats ge ǀui-i, khoe-i ǃommi xa tsâǀkhāhe tamase ǃgareǀuiba xu khôaǁnâ tsî ǀurib, brons-i, ǂgoab, ǀhaiǀurib tsî ǃhuniǀurib tsîna ra ǂkhūǂkhū ǃkhaisa ge mû. Kai Elob ge gao-aotsa taren ǃgoaxaǁaeb ǃnâ nî ī ǃkhaisa go ǂanǂan.”
Gao-aob ge Daniela ra mādawa-am
46Ob ge gao-aob Nebukadnesara Danieli aiǃâ ǃgamǃgâ tsî ǃgôasiba mā bi tsî ge mîmā, îb Daniela ǂûǁguibas tsî ǀanǀanǁguibas tsîna ǁguibahe. 47Gao-aob ge Daniela ǃoa ge mî: “Sadu Elob ge amase elogu hoagu ǂamai a kai. ǁÎb ge a gao-ao gao-aogu ǂama tsîb ge ǂganǃgâsana ra ǂhaiǂhai, sats go nē ǂganǃgâsiba ǂhaiǂhai ǁkhā i xui-ao.” 48Tsîb ge Daniela ǀgapi ǃharos ǃnâ mâi tsî ǂgui, ǂoaǂamsa ǀkhaexūna ge mā. ǁÎb ge Daniela hoaraga Babilons ǂama gowoniase tsî gao-aob ǀapemā-aogu hoagu di danase ge mâi. 49Danieli di ǂgans aib ge gao-aoba Sadraxi, Mesaxi tsî Abednegob tsîga Babilons di ǀkharisi ǂgaeǂgui-aose ge mâi, xawe Danieli ǂûb ge gao-ommi ǃnâ ge hâ.
Currently Selected:
Daniel 2: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.