2 Gao-aogu 2
2
Eliab ge ǀhomma ǃoa ra ūǃapahe
1 ǃKhūb nî Eliaba ǁgaoǂoa-i ǃnâ, ǀhommi ǃoa ūbē ǁaeb ge ge ǀgū. Eliab tsî Elisab tsîkha ge Gilgalsa xu a ǃgû, 2ob ge garu kha a hîa Eliaba Elisab ǃoa ge mî: “Nēpa hâ re, ǃKhūb go tita Betels ǁga sî xuige.”
Xaweb ge Elisaba ge ǃeream: “ǃKhūb tsî sats tsîn a ûitsama ǃkhais ao ta ǀguri ǃgû kai tsi tide.” Tsî kha ge Betels ǁga ge ǃgû.
3O gu ge ǁnāpa ge ǁan hâ i kēbo-aoga Elisab tawa sī tsî ǁîba ge dî: “Xare ǂants a ǃKhūb nî sa ǀhonkhoeba nētsē satsa xu ūbēsa?”
Ob ge Elisaba “Î ǂan ta a, xawe sago aibe ǃnō” ti ge ǃeream.
4Ob ge Eliaba Elisab ǃoa ge mî: “Nēpa hâ re, ǃKhūb go tita Jerixos ǁga sî xuige.”
Xaweb ge Elisaba ge ǃeream: “ǃKhūb tsî sats tsîn a ûitsama ǃkhais ao ta ǀguri ǃgû kai tsi tide.” Tsî kha ge Jerixos ǁga ge ǃgû.
5O gu ge ǁnāpa ge ǁan hâ i kēbo-aoga Elisab tawa sī tsî ǁîba ge dî: “Xare ǂants a ǃKhūb nî sa ǀhonkhoeba nētsē satsa xu ūbēsa?”
Ob ge Elisaba “Î ǂan ta a, xawe sago aibe ǃnō” ti ge ǃeream.
6Ob ge Eliaba Elisab ǃoa ge mî: “Nēpa hâ re, ǃKhūb go tita Jordanna ǃoa sî xuige.”
Xaweb ge Elisaba ge ǃeream: “ǃKhūb tsî sats tsîn a ûitsama ǃkhais ao ta ǀguri ǃgû kai tsi tide.” Tsî kha ge ǁîkha ge ǃgû. 7Korodisi khoegu, kēbo-aogu digu ge ǁîkha ge sao tsî Eliab tsî Elisab tsîkha ge Jordanni amǃgâ sī a mâo, ǃnūse ǁîkha ǃoa-ai ge mâ. 8Ob ge Eliaba anaǂamsarab âba ū, ǁîba xami tsî ǁgamma ǁîb ǀkha ge ǂnau, ob ge ǁgamma ge ǀgora tsî kha ge ǁîkha ǂnâsa ǃhūb ai ge ǃgâu. 9Tsî ǃgâukha ge ob ge Eliaba Elisab ǃoa ge mî: “Satsa xu ta nî ūbēhes aiǃâ, dība tsi ta nîsats ra ǂgao xū-e mîba te re.”
“As sa gagasa ǀgamǃnâguse tita ai hā re” tib ge Elisaba ge ǃeream.#Deu. 21:17
10Ob ge Eliaba “ǃGom xū-ets ge go ǂgaobasen; satsa xu ta ra ūbēhe ǃkhaisats ga mû, o-i ge ǁî-e nî ība tsi, xawe titats ga mû tama i, o-i ge ī tide.”
11Tsî ǃhoakha garu ra hîa i ge ǃnapetamase ǀaexa kuni-i, ǀaexa hāgu xa ǂgaehe hâ-e ǁîkha ge ǀgora tsîb ge Eliaba ǁgaoǂoa-i xa ǀhommi ǃoa ge ūǃapahe. 12Nēsab ge mû, ob ge Elisaba “Ti îtse, ti îtse, ǀgaisa ǁkhauba-aots Israeli ditse” ti ge ǃauǂgai. Tsîb ge ǁîba Eliaba ǁkhawa mû tama ge i.
Elisab ge ǃoab âba ǁgaus ǃaroma, saran âba ǀgam ǃâra ǃnâ ge ǀkhauǃā.#2Gao. 13:14 13ǁNās khaoǃgâb ge Eliab di anaǂamsarab, ǁîba xu ge ǁnāba ūkhâi tsî ǁkhawa Jordanni amǃgâ sī ge mâ. 14Tsîb ge Eliab di anaǂamsarab ǀkha ǁgamma ǂnau tsî “Mâpab ǃKhūb, Eliab di Eloba hâ?” ti ge mî. Tsî Elisab ge ǁîba ǂnauo, ob ge ǁgamma ge ǀgora tsîb ge Elisaba ge ǃgâu. 15O gu ge Jerixos di kēbo-aogu, ǃnūse mâ tsî gere kōga “Eliab di gagas ge Elisab ai go hā” ti ge mî. ǁÎgu ge ǁîba ǃgûǃoa, ǁîb aiǃâ ǃhon 16tsî ge mî: “Sige ge korodisi ǀgaisa khoege, xuige a ge sa ǀhonkhoeba sī ôa re. ǀNîsib ge ǃKhūb di gagaba ǁîba ūkhâi tsî ǃhom-i ais kas, ǃgoaǃnā-i ǃnâs kas hoasa go ǁnāxū.”
Ob ge Elisaba “Tā go ǃgû” ti ge mî.
17Xawe ǀûs ose gu ge ǁgūǀkhā bi, ob ge ǁîga ge mā-am, î gu ǃgû. Nē korodisi khoegu ge ǃnona tsēdi kōse gu ge ôa, xawe Eliaba hō tama ge i. 18Tsî Elisab hîa ge Jerixos tawa ǃâu hâ ib tawa gu ge hā, ob ge ǁîgu ǃoa “Tā ǃgû, ti mîba go tama ta go hâ i?” ti ge mî.
Elisab di buruxa dīn
19Jerixos di khoen ge Elisab ǃoa ge mî? “Sats tsîn a ǂanses ge nēsa a ǃgâi ǃā, xawe i ge ǁgam-e a ǃgāxa tsî xūn ra ǂkham ǃkhaisa ra ǃaroma.”
20Ob ge Elisaba “ǀAsa ǃoresa hā-ūba te, î ǂō-e ǁîs ǃnâ tsoro” ti ge mî, on ge ge hā-ūba bi. 21Ob ge ǀaus tawa sī, ǂō-e ǁîs ǃnâ tsoroǂgā tsî ge mî: “Nētib ge ǃKhūba ra mî: ‘Tita ge nē ǁgam-e ra ǃanuǃanu tsî-i ge ǃaruǀî ǁōb kas, ǂkhams kas hoasa ǃaroma tide.’ ” 22Tsî-i ge ǁnā ǁgam-e ǁnā ǁaeba xu Elisab ge mî khami ge ǃanu.
23Elisab ge ǁnāpa xu Betels ǁga a ǃgû, o gu ge axaga garub a hîa ǃāsa xu ǂoaxa tsî ǁîba ǃhō tsî “ǃGoradanatse, nēpa xu ǂoa, ǃgoradanatse, nēpa xu ǂoa!” ti ge mî.
24Ob ge Elisaba dabasen, ǁîga kō tsî ǁîga ǃKhūb ǀons ǃnâ ge ǀâxare. O kha ge ǀgam bērkha haiǀgomsa xu ǂoaxa tsî hakadisiǀgamǀa gu ǁnā axagu diga ge ǀkhauǃā.
25Betelsa xub ge Elisaba Karmelǃhommi ǃoa ge ǃgû tsîb ge ǁnāpa xu Samarias ǁga ge ǃkharu.
Currently Selected:
2 Gao-aogu 2: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.