1 Kroniks 29
29
Tempeli di ǂnubihes ǃaroma hâ ǀkhaexūn
1Gao-aob Davidi ge ǀhao hâ ǁaes hoaragas ǃoa ge mî: “Ti ôab Salomobab ge Eloba ge ǁhûiǂui, xaweb ge ǁîba noxopa a ǂkham tsî ǀoasa ǂansa ūhâ tama hâ. Sîsenni hîa nî dīheb ge kaise a kai, khoen di gao-om tamab tsî ǃKhūb Elob di Tempeli a xui-ao.#1Kro. 22:5 2Dī ǁkhā ta a xū-i hoa-e ta ge ge dī, Tempeli ǃaroma ta omūxūna nî ǀhaoǀhaose, ǃhuniǀurib, ǀhaiǀurib, brons-i, ǀurin, hain, ǃgomǀgausa ǀuin, ananū ǀuin tsî kaise ǂgui marmer-i tsîna. 3Nē ta ge aiǂhomi xūn xōǀkhā ta ge noxopa ti ǂhunuma xūna xu ǃhuniǀurib tsî ǀhaiǀurib tsîna ge mā, Elob Tempela ta ūba hâ ǀnammi ǃaroma. 4ǀGuikaidisi tongu xa ǃnāsa ǃūmû ǃhuniǀurib tsî ǀgamkaidisihakadisi tongu di ǃūmû ǀhaiǀurib tsîna ta ge ge mā, Tempeli di ǂnubiǂgoagu nî ǃkhûǀkhā-ūhese 5tsî hoaraga xūn ǁkhāǁkhāsa ūhâ aogu nî kuruse in ǃaroma. Tari-e noxopa ǃKhūba ǀkhaexū-e māsa ǃoa a māsenxa?”
6O gu ge ǃhaoǃnādi di danakhoegu, ǃhaodi di ǂamkhoegu, toroǂnubis ǂgaeǂgui-aogu tsî gao-aob ǃoabas ǃnâ mâ aogu hoaga māsenxase, 7sao ra xūna Tempeli di sîsenni ǃaroma ge mā: ǀGuikaidisi tsî hûdisi tongu xa ǃnāsa ǃhuniǀurib, ǃnonakaidisi tsî hakadisi tongu ǀhaiǀurib, ǃnanikaidisi tsî ǀgamdisi tongu brons-i tsî ǃnonaǀoadisi tsî hakakaidisi tongu ǀurin tsîna. 8ǃGomǀgausa ǀuide ūhâgu ge ǁîde Tempeli di ǁuib, Jehieli, Leviǁîn ǃhaoǃnās, Gersonni ǃhaos dib xa ra mûǂamheb ǃaroma ge mā. 9ǁAes ge māsenxase ǃKhūba ge mā, tsîn ge ǁnātikō ǂgui xūn ge māhe ǃkhais xa kaise gere ǃgâiaǂgao. Gao-aob Davidi tsîn ge kaise gere ǃgâiaǂgao.
Davidi di ganganǀgores
10Davidi ge ǁnāpa hoaraga ǁaes hîa ǀhao hâs aiǃâ ǃKhūba ge koa, mî rase: “ǃKhū, sida aboxab Jakob Elotse, ats koahe re ǀamosiba xu ǀamosib kōse. 11Sats ge kai tsî ǀgaisa, koahesa anu, ǂkhaisa tsî a ǀgapi. Hoaraga xūn ǀhommi ǃnâ tsî ǃhūbaib ai hân ge a sa, sats ge a gao-ao; hoan ǂama hâ ǀgapi ǂgaeǂgui-aotsa.#Mat. 6:3 12Hoa ǃkhūsib tsî ǂkhaisib ge satsa xu ra hā. Sa ǀgaib tsî ǁkhāsib ǀkhats ge hoa xūna ra ǂgaeǂgui; sats ge mâ khoe-i hoa-e kai tsî ǀgai kai ǁkhā. 13Sida Elotse, nēsi da ge gangan tsi tsî sa ǂkhaisa ǀonsa ra koa.
14“Tita tsî ti ǁaes tsîda ge xū-e a mā tsi ǁoa, hoaraga xūn ge satsa xu ra hā tsî da ge ǀnai a sa xūn ǁkhāna go mā-oa tsi. 15ǃKhūtse, sida ge sida ûiǁaeba ǃhūsabese tsî ǃhaokhoese, sida aboxan ǁkhān khami ra ûiǃkharu. Sida ûitsēdi ge sommi khami ra ǃkharu tsî da ge ǁōba xu a ǃnora ǁoa. 16ǃKhū, sida Elotse, nē xūn hoana da ge sa ǃanu ǀonsa da Tempela nî ǂnubibase go ǀhaoǀhao, xawen ge hoana satsa xu ra hā tsîn ge hoase a sa. 17ǂAn ta ge a mâ khoe-i hoa-i di ǂgaobats ra ǃâitsâ tsîts ǂhauǃnâ khoen xa ǃgâibahesa. Tita ge ǂhauǃnâsib tsî amab ǃnâ māsenxase nē xūn hoana go mā tsi, tsî ta ge mâtis sa ǁaes nēpa ǀhao hâsa, ǃgâiaǂgaoxase māde goro hā-ūba tsisa go mû. 18ǃKhū, sida aboxagu, Abrahammi, Isaki tsî Jakob tsîgu di Elotse, nē māsenxasiba hoaǁaeb nî hâse sa ǁaes di ǂgaoba ǀgaiǀgai re, î ǁîna ǃkhōǀgaipe, hoaǁaen satsa ǂgomǂgomsase nî hâbase. 19Ti ôab Salomoba mā re, îb ǂgaob hoab ǀkha sats ra mîmā bi xūna ǁnâuǀnam, tsî nē xūna ta ge aiǂhomiba Tempela ǂnubi.”
20ǁNās khaoǃgâb ge Davida ǁaesa ge mîmā: “Koa du re ǃKhūb sadu Eloba.” Os ge hoaraga ǁaesa ǃKhūb ǁîn aboxagu di Eloba ge koa. Tsîn ge ǃhonǁgoa tsî ǃKhūb ǁîn di gao-aoba ǃgôasiba ge mā.
21Sao ra tsēs ain ge ǃKhūba khauǁguibadi tsî ǂāǁguibadi tsîna ǁguiba, tsî ǁkhāti ǁaes tsîna ǂûn nîse ge mā. ǁÎn ge ǀguiǀoadisi ǁgōgu, ǀguiǀoadisi baigu tsî ǀguiǀoadisi ǁkhaogu tsîna altars ai ge ǁguiba. ǁÎn ge ǁkhāti āǁguibadi tsîna ge ǁguiba. 22ǁNātsēn ge kaise ra ǃgâiaǂgaose ǃKhūb aiǃâ ǂû tsî gere ā.
ǁÎn ge ǀgamǁî ǃnāsa Davidi ôab Salomoba ge gao-aodī. ǁÎban ge ǃKhūb di ǀons ǃnâ ǁîn di ǂgaeǂgui-aose ge ǀnauǂgā tsî Sadoka pristerse. 23ǁNātib ge Salomoba ǁîb îb Davida, ǃKhūb ge ǁapoǁapo trons ai ge saoǃgon. ǁÎb ge kaise ǃgâiǃgâxa gao-ao ge i tsî hoaraga Israelǁîn ge ǁîba gere ǁnâuǀnam.#1Gao. 2:12 24Hoaraga ǂamkhoegu tsî toroǃkhamaogu tsî Davidi ôagu hoagu ge gao-aob Salomoba gu ǂgomǂgomsase nî hâba ǃkhaisa ge mîmâi. 25ǃKhūb ge ge dī, Salomob hoaraga Israelǁaes xa nî ǀgapiǃgôahesa, tsîb ge ǁîba ǁîb aiǃâ ge Israela gere ǂgaeǂgui gao-aogu hoagu ǃgâ-ai ge ǀgapiǀgapi.
Davidi ǂgaeǂguis ǁaeb ǃnâ ge ī xūn
26Isaib ôab Davidi ge hoaraga Israela 27hakadisi kuriga ge ǂgaeǂgui. ǁÎb ge Hebrons ǃnâ hû kuriga ge ǂgaeǂgui tsî Jerusalems ǃnâ ǃnonadisiǃnonaǀa kuriga.#2Sam. 5:4-5; 1Kro. 3:4 28ǁÎb ge ǂomxa kuriga ûi tsî kaira hâse ge ǁō, ǃkhū hâ tsî ǃgôahesase, tsîb ge ǁîb ôab Salomob xa gao-aose ge saoǃgonhe. 29Gao-aob Davidi di ǃnaeǃkhaidi ge tsoatsoasa xu ǀunis kōse, ǃnona kēbo-aogu, Samueli, Natanni tsî Gadi tsîgu di ǃnaeǃkhaidi ǃnâ xoamâisa. 30Nē xoadi ǃnân ge mâtib gere ǂgaeǂguis, ǁîb di ǀgaisa dīgu, ǁîb ǀkha gere ī xūn, Israeli ǀkha gere ī xūn tsî ǁîb ǂnamipe hâ gaosigu ǀkha gere ī xūn tsîn hoana a xoamâisa.
Currently Selected:
1 Kroniks 29: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.