Tt 1

Xk'eeb'al sahil ch'oolej

1Laa'in laj Pablo, xmoos li Yos ut x'apóstol li Jesukriist re naq li sik'b'ileb' ru xb'aan li Yos te'ok sa' li paab'aal ut te'xnaw chi us li yaal jo' chanru naraj li paab'ank 2li nawank sa' xk'ab'a' li loq'laj royb'eninkil li junelik yu'am. Li Yos ink'a' natik'ti'ik, kixyeechi'i chaq li yu'am a'an najter q'e kutan, 3ut naq kixtaw xq'ehil, kixk'ut li rajom rik'in li k'anjel kiq'axtesiik we re xpuktesinkil li raatin jo' chanru xchaq'rab' li Yos laj Kolol qe.

4Jo'kan naq nintz'iib'ak aawik'in, a Tito, tz'aqal walalat sa' li qapaab'aal. Chiwanq taxaq aawik'in li usilal ut li tuqtuukilal nachalk rik'in li Yos Yuwa'b'ej ut rik'in li Kristo Jesus laj Kolol qe.

Eb' laj jolominel tenamit

5A'in aj e naq xatinkanab' chaq Kreta, re naq taachoy xk'uub'ankil ru li k'aru toj uxk traj, ut taaxaqab'eb' aj jolominel tenamit sa' li junjunq chi tenamit, jo' chanru xatintaqla wi'.#1,5 Laj Pablo ka'ajwi' naxpuktesi li Chaab'il Esilal sa' li junjunq chi tenamit ut naxk'e li rub'elankil li Iklees; ab'anan li xk'uub'ankil ru chi chaab'il ut rilb'al chi junelik, a'an naxkanab' sa' ruq'eb' li jalan chik (cf. 1 Ko 1,17; 3,6.10; Ro 15,20). 6Maak'a'aq xq'usb'al li ani taaxaqab', jun sut ajwi' sumsuuq, aj paab'anelaqeb' li ralal xk'ajol ut maak'a'aq xjitb'aleb' chirix wank chi jo'maajo', chi moko aj q'etol aatinaqeb'. 7Xb'aan naq laj ilol re li Iklees, jo' aj k'anjel chiru li Yos, tento naq maak'a'aq xq'usb'al; moko q'etq'etaq ta, ink'a' ch'inpo'aq chi moko aj kalajenaq, maawa'aq aj yoob'anel ch'a'ajkilal chi moko aj rahol ru tumin sa' b'alaq', 8aj k'eholaq ochochnaal b'an, aj raholaq re li us, wanq xna'leb', tiikaq xch'ool, aj paab'anelaq, tixnaw xkuyb'al rib', 9kawaq xch'ool chirix li aatin tz'aqal paab'ajel jo' chanru kitzole'k wi'. Chi jo'kan tixnaw xwaklesinkil xch'ooleb' li kristiyan rik'in li chaab'il na'leb' jo'wi' xtz'apb'al xsa' reheb' li neke'wech'ok.

Eb' laj tzolonel aj b'alaq'

10Xb'aan naq wankeb' naab'al aj q'etol aatineb', maak'a' rajb'al li neke'xye ut aj b'alaq'eb', ma' ta chaye eb' laj sirkunsisyon. 11Eb' a'an tento xch'anab'ankileb', xb'aan naq neke'xpo' xch'ooleb' li junq kab'al rik'in xk'utb'al li maatzole'k naraj, yal tumin neke'raj.

12Jun rech tenamitul, propeet sa' xyanqeb', kixye: “Eb' laj Kreta junelik neke'tik'ti'ik, josq' aj xuleb', aj numwa'ineleb' ut aj q'emeb'”.#1,12 A'an li poeta griego Epiménides xk'ab'a'. 13Ut yaal ajwi' li kixye. Jo'kan naq chaq'useb' chi kaw re naq kawaqeb' sa' li paab'aal, 14ut xkanab'aqeb' rab'inkil li xseeraq'eb' laj Judiiy maak'a' neke'ok wi', jo' ajwi' li xchaq'rab'eb' li winq li neke'xtz'eqtaana li yaal.

15Li saqeb' ru xch'ool chixjunil li k'a'aq re ru maak'a' xtz'ajnil cho'q reheb'; ab'an cho'q reheb' li muxb'ileb' ut li ink'a' neke'paab'ank maak'a' k'aru saq ru chiruheb' xb'aan naq tz'ajninb'il li xk'a'uxeb' ut li xch'ooleb'. 16Neke'xye naq neke'xnaw ru li Yos, ut rik'in li xb'aanuhomeb' neke'xk'ut naq ink'a'; tz'i'b'eetaleb' ru, aj q'etol aatineb', ut maak'a' junaq chaab'il k'anjel truuq te'xb'aanu.

Currently Selected:

Tt 1: QQC

Highlight

Copy

Compare