Rut 4
4
Laj Bohos kisumlaak rik'in lix Rut
1Laj Bohos koho wan wi' rokeb'aal li tenamit ut kichunlaak aran. Sa' li honal a'an kinume'k li rech'alal lix Rut, a' li winq li xyehom chaq laj Bohos. Ut naq yo chi nume'k, laj Bohos ki'elk chi xk'ulb'al ut kixb'oq rik'in chi hilank. 2Chirix chik a'an kixb'oqeb' lajeeb' li xcheekelal li tenamit re naq te'hilanq chi xk'atq. 3Ak chunchuukeb' chixjunileb' naq kixye re li rech'alal lix Rut:
—Lix Nohemí xsutq'iik chaq aran Mohab ut traj xk'ayinkil li xch'och' laj Elimelek, a' li qech'alal kamenaq. 4Twaj xk'eeb'al chanaw li na'leb' a'in, re naq wi taawaj xloq'b'al, taaloq' chiruheb' li chunchuukeb' arin jo'wi' chiruheb' li xcheekal winqul lintenamit. Wi taawaj xb'aanunkil laataqlankil re rilb'al lix Rut, b'aanu a'an. Wi ut ink'a', ye we re naq laa'in chik tinb'aanunq re.
Kixye li winq:
—Laa'in tinloq'oq re, chan.
5Toja' naq laj Bohos kixye wi' chik:
—K'e reetal. Sa' li kutan taaloq' wi' li ch'och' chiru lix Nohemí, tento ajwi' taak'am lix Rut aj Mohab, rixaqil li kamenaqilq, re naq eb' li ralal xk'ajol te'reechani li xna'aj.
6Kichaq'ok li winq ut kixye:
—Wi jo'kan nakaye, ink'a' tinruuq xb'aanunkil, xb'aan naq ink'a' nawaj naq twanq ch'a'ajkilal sa' xyanqeb' li walal ink'ajol. Jo'kan b'i', tinkanab' sa' laawuq': wi taawaj xloq'b'al, b'aanu laa'at chixjunil a'an.
7Junxil chaq, aran Israel, naq nawank loq'ok malaj xk'ayinkil junaq k'a'aq re ru, li ani nak'ayink, narisi li xxaab' ut naxk'e re li jun chik. Ut a'an a'in reetalil li k'ehok ib' sa' aatin. 8Jo'kan naq li winq li xk'ulub' raj xloq'b'al li na'ajej kirisi li xxab', kixk'e re laj Bohos ut kixye re: “Chap cho'q aawe”.#4,7-8 Dt 25,7-10.
9Toja' naq laj Bohos kixye reheb' li cheekel winq ut reheb' chixjunil li wankeb' aran:
—Laa'ex testiiw anaqwan naq lix Nohemí xk'ayi we li k'aru re chaq laj Elimelek, jo'wi' re laj Kilyón ut laj Majalón. 10Laa'ex ajwi' testiiw naq tink'am cho'q wixaqil lix Rut aj Mohab, li kiwank cho'q rixaqil laj Majalón, re naq li xk'ab'a' li kamenaqilq yo'yooq junelik sa' li reechanihom. Chi jo'kan ink'a' taasachmanq li xk'ab'a' laj Majalón sa' xyanqeb' li ras riitz'in chi moko sa' li tenamit a'in.#4,10 Dt 25,5-6. Laa'ex testiiw anaqwan.
11Naq ke'rab'i a'an, eb' li cheekel winq ut chixjunileb' li wankeb' aran ke'xsume:
—Laa'o testiiw. A' taxaq li Qaawa' chik'ehoq re laawixaqil chi jo'kaq lix Rakel ut lix Liiy: xkab'ichaleb' a'an ke'tikib'ank re li tenamit Israel.#4,11 Gn 29,31. Chinimanq laawankil aran Efratá ut nawb'ilaq aawu chi us sa' li tenamit Belén. 12A' taxaq li Qaawa' chik'ehoq eere naab'al leekok'al jo' kixk'ul li xjunkab'al laj Perés, li ralal laj Judá rik'in lix Tamar.#4,12 Gn 38,27-30.
13Jo'ka'in naq laj Bohos kixk'am lix Rut ut a'an kikanaak cho'q rixaqil. Kiwank rik'in, ut li Qaawa' ki'osob'tesink re: kikanaak chi yaj aj ixq, ut kiwank jun xteelom k'uula'al.
14Toja' naq eb' li ixq ke'xye re lix Nohemí:
—Usilaatinanb'il taxaq li Qaawa' li ink'a' xraj naq jun li tz'aqal rech'alal li kamenaqilq tixq'et li teneb'anb'il sa' xb'een. Chi jo'kan yo'yooq li xk'ab'a' chi junelik sa' xyanqeb' laj Israel. 15Li ch'ina'al a'in taak'ojob'anq aach'ool ut taa'iloq aawe sa' laatiixilal, xb'aan naq li xna', a'an laawalib', li jwal nakatxra ut q'axal us cho'q aawe chiru wuqub' chi alalb'ej.
16Lix Nohemí kixk'ul li k'uula'al, kixq'alu ut kixye chiruheb' li tenamit naq tixk'iiresi. 17Naq ke'ril a'an, chixjunileb' li rechkab'al ke'xye:
—Xwank jun xk'uula'al lix Nohemí.
Ut aj Obed ke'xk'e cho'q xk'ab'a'. Laj Obed a'an xyuwa' chaq laj Jesé, ut laj Jesé xyuwa' chaq laj David.
Eb' li xxe'toonil yuwa' laj David
18A'aneb' a'in li ralal xk'ajol laj Perés: laj Perés a'an xyuwa' chaq laj Jesrón. 19Laj Jesrón a'an xyuwa' chaq laj Ram, ut laj Ram xyuwa' chaq laj Aminadab. 20Laj Aminadab a'an xyuwa' chaq laj Najsón, ut laj Najsón xyuwa' chaq laj Salmón. 21Laj Salmón a'an xyuwa' chaq laj Bohos, ut laj Bohos xyuwa' chaq laj Obed. 22Laj Obed a'an xyuwa' chaq laj Jesé, ut laj Jesé xyuwa' chaq laj David.#4,18-22 1 Kr 2,10-14; Mt 1,3-6.
Currently Selected:
Rut 4: QQC
Highlight
Copy
Compare
Share
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.