Ap 5
5
Li hu rik'in li wuqub' chi tz'apleb'
1Kiwil ajwi' sa' xnim uq' li k'ojk'o sa' li nimajwal k'ojarib'aal jun li hu tz'iib'anb'il chisa' ut chirix, tz'aptz'o rik'in wuqub' chi tz'apleb'.#5,1 Sa' li hu a'in tz'iib'anb'il li tz'aptz'ookil na'leb' chirix li rajom li Yos (cf. Ap 10,4; Ez 2,9; Dn 12,4). 2Ut kiwil jun li ánjel kaw rib', yo chi xpuktesinkil chi kaw xyaab' xkux: “Ani xk'ulub' risinkileb' li tz'apleb' ut xteeb'al li hu?”, chan. 3Ab'anan maajun kitawmank sa' choxa, chi moko sa' ruuchich'och' malaj rub'el ta li ch'och'; maajun kiruhank chi xteeb'al chi moko rilb'al xsa' li hu. 4Ut laa'in k'ajo' naq kinyaab'ak xb'aan naq maa'ani kitawmank xk'ulub' ta xteeb'al chi moko rilb'al xsa' li hu. 5Ab'an jun reheb' li cheekel winq kiyehok we: “Matyaab'ak. Chawil, li Kaqkoj re li xteepal laj Judá, a' li xTuxb' laj David,#5,5 Gn 49,9; Is 11,1. xq'axok u: a'an taa'isinq reheb' li wuqub' chi tz'apleb' ut tixte li hu”.
6Toja' naq kiwil a'in: chi xk'atq li nimajwal k'ojarib'aal sutsu xb'aaneb' li kaahib' chi yo'yookeb' jo'wi' xb'aaneb' li cheekel winq, kiwil jun li Karneer xaqxo aran chanchan kamsinb'il, wank wuqub' xxukub' ut wuqub' xsa' li ru, a'aneb' li wuqub' chi xmusiq' li Yos taqlanb'ileb' sa' chixjunil li ruuchich'och'.#5,6 A'an li Karneer re li Paswa, a'an li Jesus li kikamsiik, ab'an xaqxo anaqwan chirix naq kiwakliik wi' chik chi yo'yo ut kixaqab'aak cho'q xQaawa' li yo'yookeb' ut kamenaqeb' (cf. Ap 14,1; 21,22). Eb' li xukub' a'aneb' reetalil li xwankil li Jesus, ut li wuqub' xsa' li ru a'aneb' reetalil li xnimal xk'a'uxl (cf. Zak 4,10; Is 11,2). 7Ut a'an kolxchap li hu wank sa' xnim uq' li k'ojk'o sa' li nimajwal k'ojarib'aal. 8Ut naq kixchap li hu, eb' li kaahib' chi yo'yookeb' ut li kaahib' xka'k'aal chi cheekel winq ke't'ane'k rub'el roq li Karneer, wankatqeb' x'aarp chixjunqaleb' jo' ajwi' xsek'eb' oor nujenaqeb' chi sununkil b'an, a'aneb' li xtij eb' li sant; 9ut neke'xb'icha jun li ak' b'ich, yookeb' chi xyeeb'al:
“Aak'ulub' xchapb'al li hu ut xteeb'al eb' li xtz'apleb',
xb'aan naq katkamsiik
ut rik'in laakik'el kaloq'eb' li winq ut li ixq cho'q re li Yos
sa' xyanq chixjunileb' li xteepal ut xtenamit li ruuchich'och',
yalaq chanru neke'ilok ut neke'aatinak;
10ut kak'eheb' chi awab'ejink cho'q aj tij cho'q re li qaYos,#5,10 Ex 19,6; Ap 1,6; 20,6.
ut te'awab'ejinq sa' xb'een li ruuchich'och'”.
11Ut sa' li moy u kiwab'i xyaab'eb' xkux li k'iila ánjel chire li nimajwal k'ojarib'aal jo'wi' chi xsutam li yo'yookeb' ut eb' li cheekel winq, k'iila mil o'q'ob' chi o'q'ob' li xk'ihaleb',#5,11 Dn 7,10; Heb 12,22. 12yookeb' chi xyeeb'al chi kaw xyaab'eb' xkux:
“Li Karneer kikamsiik,
a'an xk'ulub' xk'ulb'al xwankil, xb'ihomal, xna'leb', xkawilal, xnimal xloq'al ut loq'onink,
jo' ajwi' naq taaterq'usiiq xk'ab'a'”.
13Ut chixjunileb' li yoob'tesinb'ileb' xb'aan li Yos sa' choxa, sa' ruuchich'och', rub'el li ch'och' ut sa' li palaw, jo'wi' chixjunil li wankatqeb' chisa', kiwab'i naq ke'chaq'ok:
“A' li k'ojk'o sa' li nimajwal k'ojarib'aal jo' ajwi' li Karneer,
chiwanq taxaq xnimal xloq'al, xkawilal
ut chiterq'usiiq xk'ab'a' chi junelik q'e kutan”, chankeb'.
14Ut eb' li kaahib' chi yo'yookeb' ke'xye: “Jo'kan taxaq!”. Toja' naq eb' li cheekel winq ke'xhupub' rib' chi loq'onink.
Currently Selected:
Ap 5: QQC
Highlight
Copy
Compare
Share
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
